YEREMIA 26:2 - Alkitab Singog In Mongondow Masa In Tanaa

² Ki Tuhan in noguman kon inakó, “Bayádon sindog kon palas in Baḷoi-Ku bo posingogdon kon intau mita in Yohuda inta namangoi moibada kon tua. Potaaudon kon i monia komintan in bayongan inta pinoki potaau-Ku kon inimu. Dika gaatan tongopiḻikmai.

YEREMIA 26:2 ပူးပေါင်းရင်းမြစ်များ

YEREMIA 1:17

Posadiadon, Yeremia! Bayádon bo potaaudon kon i monia, bayongan inta pinoki aid-Ku kon inimu. Dika moondok kon i monia, sinbá diá baḻíon-Ku in iko totok in moondok aka moyogintayowan mako monia.

YEREMIA 1:7

Táe ki Tuhan in notubag, “Dika moguman kon noguodpa in iko. Aka Akuoi in mopotabá kon inimu mayá kon i ineka, yo iko in mustibí mayá, bo bayongan inta pokiguman-Ku kon inimu, mustibí potaaumu kon i monia.

YEREMIA 19:14

Bo akuoi in nonaḷámai kon Topet, tampat inta pinopotabáan kon inakó nopotaau in koyow i Tuhan. Akuoi in minayá kon dangkuḷon in Baḷoi Tuhan bo sinimindog kon tua, bo nopotaau kon bayongan in intau,

YEREMIA 23:28

Nabi inta sinumogoindop mustibí moguman, ‘Naa in tongábí togoindop.’ Táe nabi inta nokouḻí kon koyow nongkon i-Nakó mustibí mopotaau in koyow tatua podudui in koyow inta mobanar tua. Gandum in diábí motaau potongkaion in wawa.

YEREMIA 25:2

Akuoi in noguman kon bayongan in bangusa in Yohuda bo intau inta nogutun kon Yerusalem,

YEREMIA 28:5

Dá kon tayowon in imang mita bo bayongan in rayat inta sinimindog kon Baḷoi Tuhan tatua, akuoi in noguman kon i nabi Hananya,

YEREMIA 36:10

Bo ki Barukh in nobaca nongkon ḻitodan in buk tatua in bayongan inta ain pinogumanku, bo bayongan in intau nokidongog. Tua in binaca kon bonu in Baḷoi Tuhan kon kantor i Gemarya, ki adí i Sapan momomais in negara. Kantor tatua in kon palas kon ḻimonik, kon diug in daḷan tumuot kon Bonawang Mobagu kon Baḷoi Tuhan.

YEREMIA 42:4

Akuoi in notubag, “Mopia aka natuabí. Tarimaanku onu in pinoigum tua. Mosambayang in akuoi kon i Tuhan Allah naton, bo onukabí in potubag-Nea, potaaukubí komintan; tobatúmai yo diábí bunionku kon inimu.”

YEREMIA 7:27

Onda intua ki Tuhan in noguman, “Tuamai, ei Yeremia, umpakabí iko mopotaau kon tua mita kon umat-Ku, yo mosia in diábí mokidongogmai kon singogmu mita. Umpaka iko mogoiní kon i monia, mosia in doíbí tumubag.

YEHEZKIEL 3:10

Noiduduimai kon tua ki Allah in noguman, “Ei intau inta ilo-ilow, taridiai kopira bo toropdon in bayongan inta poguman-Ku kon inimu.

YEHEZKIEL 33:7

Ei intau ilo-ilow, iko in dinuí-Ku moḷoḷukad in bangusa Israel. Potaaudon kon i monia in tompoingat tanaa:

YEHEZKIEL 40:4

Ḷoḷaki tatua in noguman kon inakó, “Ei intau ilo-ilow, indongogaidon kopia bo taridiai in bayongan inta poontongku kon inimu, sin tuabí in mangaḻe in pinodiaanku kon inimu namangoi in naa. Potaaudon kon bangusa in Israel in bayongan inta ontongonmu.”

MATIUS 28:20

Bo tundú in mosia mogaid kon onu inta aindon pinoguman-Ku kon i monimu. Bo bá kotaauan monimu, kon Akuoi in umuranbí kotaki-takin monimu modapot in singgai pangabisan.”

LUKAS 19:47

Pomuḷoi in singgai Sia mayá mobogoi in totundú kon bonu in Baḷoi Tuhan. Imang mita itoi bo mototundú mita kon agama takin itoi mita intau Yahudi moibogdon moḻimod kon i-Nia,

YOHANES 18:20

Ki Yesus in notubag, “Akuoi in umuran taran-tarangan kon tayowon intau mobayong. Akuoi umuran doman mobogoi in totundú kon bonu in baḷoi pososambayangan bo kon bonu in Baḷoi Allah inta nobaḻí tampat poyoyosipunan intau in Yahudi. Diábí kon dodai onda Akuoi tongá umuni-uni in mosingog.

YOHANES 8:2

Nopoikoḷomai kon singgai, subupa Sia in minayádon bui in Baḷoi Tuhan, bo nobayong intau in namangoi kon i-Nia. Ki Yesus in iḻimitú bo nomangkoidon nobogoi in totundú kon i monia.

OUMAN IN RASUL MITA 20:20

Táe umpakabí natua yo diábí kon dodai in onda in akuoi nogogai nopotaau kon onu inta mokobaraguna kon i monimu. Tua komintan ain pinotaauku kon i monimu bo ain doman sinundúku kon i monimu kon tayowon in intau mobarong andeka kon baḷo-baḷoiannea.

OUMAN IN RASUL MITA 20:27

Sin diábí kon dodai in onda in akuoi moḷagui mopohabar in bayongan tomayá i Allah kon i monimu komintan, sin tuabí in oaidanku.

OUMAN IN RASUL MITA 5:25

Tongá namangoidon in intau tobatú kon sigad monia tua bo noguman nanaa, “Indoiaika dá intau mita inta binonu monimu kon ponjara, tuabí komintan kon bonu in Baḷoi Tuhan koyogot in motundú kon intau moantó!”

OUMAN IN RASUL MITA 5:42

Bo pomuḷoi in singgai mosia umuran mayá in Baḷoi Tuhan bo mayá doman in baḷo-baḷoiannea mopoyaput in habar kon ki Yesus tua in Datubí Mopoposaḷamat.

ULANGAN 12:32

Aidaidon in bayongan inta pinoki aidku kon inimu; dika dugangan ande gaatan.

ULANGAN 12:5

Nongkon bayongan butá in suku in mita Israel, ki Tuhan Allahmu in momiḻíbí kon tampat tobatú sinbá bangusa naton motaau mamangoi in tayowon-Nea bo mosumba kon i-Nia.

ULANGAN 4:2

Onu in pinogumanku, dika dugangan ande gaatan topiḻikmai. Duduiandon in parenta mita i Tuhan Allahmu inta pinotaauku kon inimu.

YOSUA 8:35

Bayongan in parenta i Musa binaca i Yosua kon bayongan umat in Israel inta noyosipun kon tua, noitakin doman in bobay mita, adí mita, bo intau mita ango-angoi inta nogutun kon sigad monia.

WAHYU 22:19

Bo aka oyúon in intau in monggaat kon tobatúmai in tosingogon inta pinoyaput tanaa, dá gaatan doman i Allah in tonsilainea inta ná ain pinais kon bonu in buk tanaa, silainea inta nongkon pangkoi in kayu inta mobogoi in kobiagan bo nongkon kotá motusi tatua.