YEREMIA 17:8 - Alkitab Singog In Mongondow Masa In Tanaa

⁸ Sia in naonda bo pangkoi in kayu kon bingkí in ongkag moiḻig; uakatnea in noidapot in tubig sia in diábí moondok kon sempo in poninggai daunnea mita in tantúbí moḷunow. Umpakabí butá inonag in singgai yo sia in diábí moḻia-ḻiaw in gina sin sia in umuran momungai.

YEREMIA 17:8 ပူးပေါင်းရင်းမြစ်များ

AYUB 29:19

Akuoi in naonda bo pangkoi in kayu inta nobiag noḷumbá, uakatnea tugat diá kodaitan in tubig bo oḷú momuntad kon tanganea.

AYUB 8:16

Naonda bo padang, mosehat in intau inta diá kotuhan; aka sindaran in singgai, mobiag in sia moḷumbá bo momuḻing kon gobá.

MAZMUR 1:3

Intau tatua in mokodapot kon bayongan totayaknea; sia in naonda bo pangkoi in kayu inta kon bingkí in tubig inta momungai kon sempo in pomomungainea bo inta diá moḷaḷo-ḷaḷow in daunnea.

AMSAL 11:28

Ki ine in mopongata in kaoyúonan in mototakbí naonda bo dáun noingkag; intau inta mobanar in modugangbí mobayong naonda bo tokat moguod

YESAYA 58:11

Akuoi in umuranbí mokapit kon i monimu bo mopobotug kon i monimu kon butá inta noingkag; Akuoi in moḷukadbí kon i monimu sinbá umuran mosehat bo moropot. Moiko in nádon onda bo taman inta tugat in tubignea, naonda bo bokaká inta diá mogio-giot.

YESAYA 61:3

sin mobogoi in pia in gina bo ḷunganga in gina kon intau inta morobonoḷ in gina bo nonogumatoi; sin momaḷui kon inta mokoajar kon gina monia mobaḻí dondong dodayow. Mosia in nádon pangkoi in kayu tobatú inta pinomuḷa tontaní i Tuhan. Mosia in mogaidbí kon onu inta mopia bo mobanar, dá ki Tuhan in poḷantudon.

YEREMIA 39:18

Iko in diábí ḻimodon, sin Akuoi in moposaḷamatbí kon inimu. Nyawamu in mosaḷamatbí sin iko in inumandoḷ kon i-Nakó. Akuoi ki Tuhan, ain nosingog.”

YEHEZKIEL 31:3

Iko in naonda bo ḷokuyú in Libanon inta mogaga nopuḻing in tanga inta nobambar bo mogaga. Pangkoinea in notuḻid bo noḷantud ḷuntungnea in nodapot in goḷom.

YEHEZKIEL 47:12

Kon kinoouput in bingkí in ongkag tatua nobiag in noyagi-yagimai in pangkoi in ayop. Daun in pangkoi in kayu mita tatua in diábí moḷaḷo-ḷaḷow, bo bungainea in diábí modai-dait. Pangkoi mita tatua in mopomungaibí in bungai in ayop inta mobagu pomuḷoi in buḷan, sin tubig inta nomuntad kon inia in noiḻig nongkon Baḷoi Tuhan. Bungainea mita in nobaḻí kokaanon bo daunnea mita in pakéon mobaḻí undam.”