YEHEZKIEL 7:8 - Alkitab Singog In Mongondow Masa In Tanaa

⁸ Diádon moonggot bo moiko in mokonanamdon kon torú-Ku inta motoyang. Moiko in sisigan-Ku podudui in aidmu. Tuḻían-Kubí kon inimu in bayongan in aidmu inta moromú.

YEHEZKIEL 7:8 ပူးပေါင်းရင်းမြစ်များ

TAWARIKH 2 34:21

“Bayádon poḻibó kon i Tuhan sin kopontinganku bo kopontingan in intau mita inta kon Israelpa bo kon Yohuda soaḷ tombonu in buk tanaa. Ki Tuhan in sinumorú kon inaton popisí in mogoguyang naton diá nopobayá in parenta mita inta pinais kon bonunea.”

MAZMUR 79:6

Pobutakdon in torú-Mu kon bangusa mita inta diá nonotaau kon ini-Mu, bo kon dodatuan mita inta diá noibada kon ini-Mu.

YESAYA 42:25

Dá binaḻí-Nea in kita notarima kon torú-Nea inta motoyang, bo nororiga popisí in parang inta motoyang. Torú-Nea nomokak kon Israel naonda bo tuḷú, táe diá kinotaauan naton, bo diá nobalajar nongkon onu inta ain kinorasaan naton.

YEREMIA 36:31

Iko, buímu bo pojabatmu mita in hukumon-Ku popisí in dosa mita inta inaidan monimu. Akuoi in mopoangoibí kon i monimu in bayongan bodito inta ain pinonindoyó-Ku kon inimu, sin pinomayá iko andeka intau inta nogutun kon Yerusalem bo kon Yohuda diábí nopandungmai kon sindoyó-Ku mita.”

YEREMIA 7:20

Akuoi, ki Tuhan Inta Totok in moḷantud, in mopoumabí in torú-Ku inta motoyang kon baḷoi pooibadaan tanaa, kon intau bo kon mahaḷuk, bo kon pangkoi mita in kayu bo kon bungai mita in boyó. Torú-Ku in tumaga-tagab naonda bo tuḷú inta diá kopiongan.”

OMBAḶ 2:17

Ki Tuhan in nogaidon kon onu inta pinogogondoknea inta koḻipod in sinomayá bo pinotoingat-Nea kon inaton. Kita in irimumud takin diábí in tabi, musung in pinountung-Nea binaḻí-Nea noḷunganga in gina monia in nokoontong kon kinoḷabúan naton.

OMBAḶ 2:4

Naonda bo musung, Sia in nomadang kon puḷu in piot-Nea bo pinopotayow-Nea kon i naton in piot-Nea. Bayongan in intau inta nokosanang kon gina naton, nodait iḻimod-Nea. Sia in noporoput in torú-Nea naonda bo tuḷú kon bonu in kotá in Yerusalem tanaa.

OMBAḶ 4:11

Ki Tuhan in nopoumadon in torú-Nea bo nonurub kon kotá in Sion nodapot in noyompat dapot in butá.

YEHEZKIEL 11:21

Táe intau mita inta moibog mosumba kon berhala mita inta moraat bo mokorongó in hukumon-Kubí popisí in dodia monia inta moraat tatua.” Natuata in singog i Tuhan Inta Totok in moḷantud.

YEHEZKIEL 14:19

Dika-dika popoangoi-Ku in yampoi in takit kon butá tatua, bo pobuká-Ku in torú-Ku kon inia modapot in intau andeka mahaḷuk yo moyopú.

YEHEZKIEL 16:43

Akuoi in nohukum kon inimu popisí in kinoḻionganmudon naonda in pinomomiag-Ku kon inimu kon tungkuḷ in iko noguodpa. Pinomukámu in torú-Ku pinodoyon kon aidmu inta moraat tua. Nongonu sin bayongan in aidmu inta mokorongó tua dinuganganmupa doman in totuaḻingan? Akuoi ki Tuhan Inta Totok in moḷantud ain nosingog.”

YEHEZKIEL 16:59

Ki Tuhan Inta Totok in moḷantud noguman, “Popoaid-Kubí kon inimu podudui in aidmu tontaní, sin iko in nonoḻikudon kon ibotmu bo iḻimimpatdon kon dodandian-Ku takinmu.

YEHEZKIEL 18:30

Ki Tuhan Inta Totok in moḷantud, in noguman, “Ei intau mita in Israel, Akuoi in monisigbí kon bayongan in intau podudui in aidnea tontaní. Pogogaidon in mogaid kon dosamu mita. Dika pomayámu mako in dosamu momoguyaat kon awakmu.

YEHEZKIEL 20:13

Táe kon rawang in bungaion doman tatua noḷawang in mosia kon i-Nakó. Mosia in iḻimimpat kon parenta-Ku mita, bo nondoí kon hukum-Ku mita inta nopodandi kon intau mita inta umuran dumudui kon tua in mobiagbí. Mosia in totokbí in noporaa-raatmai kon singgai in Sabat. Tuamai, kon rawang in bungaion tatua nosadiadon in Akuoi mopoḷuai in torú-Ku kon i monia bo moyopú kon i monia.

YEHEZKIEL 20:21

Táe tayowmobiag mita tatua in doí doman nokidongogmai kon i-Nakó. Iḻimimpat in mosia kon hukum-Ku mita bo nonaḷámai kon parenta-Ku mita, inta nopodandi kon intau inta dumudui kon tua in umuranbí mobiag. Mosia in noporaa-raatmaidon kon singgai in Sabat. Tuamai in nosadiadon in Akuoi mopoḷuai in torú-Ku kon i monia kon rawang in bungaion tatua bo moḻimod kon i monia komintan.

YEHEZKIEL 20:33

“Podoyon kon i-Nakó, ki Allah inta nobiag, ki Tuhan Inta Totok in moḷantud, moiko in ogoian-Ku in tompoingat kon moiko in popisí in torú-Ku, dá moiko in parentaan-Ku kotogaton bo korotonon dá konanamandon monimu in kawasa-Ku. Moiko in sipunon-Kubí bo diaan bui nongkon sinangkub in butá inta pinoporaritan kon i monimu.

YEHEZKIEL 20:8

Táe mosia in noḷawang kon i-Nakó bo doí nokidongog kon i-Nakó. Mosia in doíbí noḷumbú kon patong mita inta mokorongó tatua bo diá doman moibog in mogogai in mosumba kon berhala mita in Mesir. Kon tungkuḷ in mosia kon tuapa, Akuoi in nosadiadon kon mopoḷuai in torú-Ku kon i monia.

YEHEZKIEL 22:31

Tuamai in tanaa pinobayá-Kudon in torú-Ku kon i monia, bo naonda bo tuḷú Akuoi in moyompat kon i monia popisí in aid monia. Akuoi ki Tuhan Inta Totok in moḷantud ain nosingog.”

YEHEZKIEL 24:14

Akuoi, ki Tuhan Inta Totok in moḷantud ain nosingog. Noiangoidon in wakutunea mopoaid. Diábí koḻiongan-Ku in dosamu bo diábí doman mongampung andeka monotabi kon inimu. Iko in hukumonbí podudui in bayongan in oaidmu. Akuoi ki Tuhan Inta Totok in moḷantud ain nosingog.”

YEHEZKIEL 30:15

bo kaoyúonan in inggamáan-Ku. Pogabuton-Kubí in torú-Ku kon Pelusium, kotá inta nobaḻí benteng in Mesir,

YEHEZKIEL 33:20

Umpaka natua bangusa in Israel in nogumanbí kon aid-Ku tanaa in diábí moadil. Totuu, hakimon-Kubí in mosia kon batúannea podudui in aidnea.”

YEHEZKIEL 6:12

Mosia komintan in mokonanambí kon bungai in torú-Ku. Intau mita inta moyayú kon poḷumbúan in motakit bo poḷat matoi; inta modiug in matoi kon poparangan; bo kiagatnea in matoi in gogoy.

YEHEZKIEL 7:27

Datu in mogamui, ki adí ḷoḷaki in datu kobuḻian in kamang bo rayat in gugur mako sin moondok. Akuoi in mohukumbí kon i monimu podudui in bayongan in aidmu bo mohakim kon i monimu ná pinohohakim monimu kon intau ibanea. Dá kotaauandon monimu kon Akuoibí in ki Tuhan.”

YEHEZKIEL 7:9

Akuoi in diábí motabi andeka mongampung kon inimu. Akuoi in mohukumbí kon inimu podudui in bayongan in aid moromú inta ain inaidan monimu. Dá kotaauandon monimu kon Akuoibí in ki Tuhan bo Akuoibí in nohukum kon i monimu.”

YEHEZKIEL 9:10

Akuoi in diá bidon motabi kon i monia. Poaid-Kubí kon i monia in onu inta ain pinopoaid monia kon intau ibanea.”

YEHEZKIEL 9:8

Kon bonu in pinoḻimodan tatua pinobayá, akuoi in kon tua aku-akuoi mita. Sinumungkud in akuoi bo nomaḷú, “Tuhan Inta Totok in moḷantud kaasí nádomai tua in torú-Mu kon Yerusalem nodapot in pokiḻimod-Mudon komintan in intau inta kon Israel naa?”

DANIEL 9:11

Bayongan in Israel ain iḻimimpat kon hukum-Mu mita bo doí mokidongog kon singog-Mu. Kami in binaradosa kon ini-Mu, bo tuamai pinouma-Mu kon inami in kutuk inta ain pinais kon bonu in Buk i Musa, mogogundoi-Mu.

DANIEL 9:27

Datu tatua in momiabí kon dodandian moropot takin mobayong in intau pitu notaong in koonggotnea. Kon ruak in wakutu inta sinantú tatua, sia in mopogogaibí in mobogoi in kuruban bo sosumba. Onda intua inta mokokoningkim inta sinangoian Aid moraat inta mokorimumud in ukatonbí kon Baḷoi Tuhan bo umuranbí kon tua modapot in sia inta nogukat kon tua koḷabúan in koyopúan inta ain sinantú i Allah kon inia.”

HOSEA 12:3

Oyúon in pelekara i Tuhan takin bangusa in Yohuda; Sia in mohukum doman kon Israel popisí in dodia monia. Sia in motuḻíbí kon oaid monia.

HOSEA 5:10

Ki Tuhan in noguman, “Akuoi in sinumorú popisí in itoi mita in Yohuda ain nonubu kon Israel bo nogagow kon butánea. Tuamai in popouma-Kubí in hukuman kon i monia naonda bo ḷunud.

NAHUM 1:6

Ki ine in mokotongod aka ki Tuhan tumorú? Diábí in moipaḷuput nongkon torú-Nea! Sia in moponiata in torú-Nea inta modokot batu in morimumud bo mobaḻí ḷobud kon tayowon-Nea.

WAHYU 14:10

yo intau tatua monginum kon anggur i Allah, tuata in torú-Nea inta ain inaḻin-Nea kon bonu in tampat-Nea, bo diábí ginaatan topiḻikpamai! Intau mita tatua in toko sikisaan kon bonu in tuḷu bo balerang kon tayowon in malaekat mita motusi bo kon tayowon Adí in Domba tatua.