YEHEZKIEL 7:19 - Alkitab Singog In Mongondow Masa In Tanaa

¹⁹ Buḷawan bo saḷaka in ḷumbúonbí monia kon daḷan naonda bo apat, sin kon singgai ki Tuhan mopoaid in torú-Nea, yo buḷawan bo saḷaka tua in diábí mokoposaḷamat kon i monia, nodapotbí in tongá mokopopisí kon i monia mogaid kon dosa. Diá bidon in mosia motaau mopomaké intua sin mopoorop kon ibog monia andeka pomonu monia kon sian.

YEHEZKIEL 7:19 ပူးပေါင်းရင်းမြစ်များ

DATU MITA 2 7:15

Minayá in mosia nodapot kon Ongkag in Yordan. Kinoouput in daḷan nokoontong in mosia kon pakeang bo pakakat mita positabud. Bayongan intua pinogambatdon mako natua in intau mita in Siria kon dodai in mosia noḷagui. Totabá mita tatua in nobui bo nopotaau intua kon i datu.

AMSAL 10:2

Kaoyúonan inta nouḻí pinongin tombogá diábí mobogoi in kauntungan; táe, gina motuḻid in mokosaḷamat.

AMSAL 11:4

Aka tumayowdon kon popatoi, yo kapunyaan in diá bidon in mangaḻenea; mosaḷamatbí in iko aka motuḻid in ginamu.

MOHOHUTUBA 5:10

Kodugang-kodugang in kaoyúonan in intau dá kodugang-kodugang doman in intau ibanea in musti pokaanonnea. Diábí in kauntungan kon i toginea, tongábí kinotaauannea kon sia in nooyúon.

YESAYA 30:22

Patong mita in berhalamu inta inoḻitan in saḷaka bo buḷawan in ḷumbúonbí monimu naonda bo apat, poḷat moguman, “Bayádon nongkon tayowonku!”

YESAYA 55:2

Onubí in mangaḻenea in motaḷui kon onuka inta diá mokoguḻí kon ibog, bo mogaid kon onu inta diá mokobotug? Duduiaidon in parenta-Ku dá moiko in mokaanbí kon inta mopia, bo mokaan kon kaanon inta mopia in nanamnea.

OMBAḶ 4:1

Buḷawan inta mopouḻi-uḻinag in nobuḷoḷowdon batu mita in Baḷoi Allah noiraritdon kon daḷan.

YEHEZKIEL 13:5

Mosia in diábí noḷukad kon tampat mita inta dinding mita in kotá ain noumpag, bo diá doman nonompia kon dinding mita tatua. Dá, Israel in diá bidon motaau tahangon aka mobaḻí in parang kon singgai Akuoi, ki Tuhan mamangoi mohukum.

YEHEZKIEL 14:7

Pomuḷoi in intau in Israel andeka intau ango-angoi inta nogutun kon sigad in bangusa in Israel, inta iyumayú kon i-Nakó bo noposarakan in awaknea kon berhala, bodongka mopoigum in tonggina kon nabi tobatú, yo tubagan-Kubí tontaní.

YEHEZKIEL 44:12

Táe popisí in mosia ain nomia kon upacara posumbaan kon berhala sin kopontingan in bangusa in Israel, bo pinongin aid monia tatua mosia in nokopopisídon kon bangusa tatua nogaid kon dosa, dá Akuoi, ki Tuhan Inta Totok in moḷantud, mongibot kon mosia in mustibí hukumon.

ZEPANYA 1:18

Kon singgai inta motoyang tatua ki Tuhan in mopoontongbí in torú-Nea, dá bayongan in buḷawan bo saḷaka monia in diábí mokoposaḷamat kon i monia. Sinangkub in dunia in morimumudbí moḷoḷayat tubáan in tuḷú in torú-Nea. Bo daḻi-daḻíbí rabuton-Nea in bayongan nyawa kon butá tanaa.

ZEPANYA 1:3

bayongan in intau bo bobiagon, moitakin doman in ḷagapan bo toyá. Intau moraat in yompaton-Kubí. Bayongan umat intau in yompaton-Kubí, diábí tobatúmai in intau in pomayá-Ku mako in mobiag. Akuoi, ki Tuhan, ain nosingog.

MATIUS 16:26

Onubí in baragunanea aka intau mokouḻí kon bayongan inta koibognea kon dunia naa, táe sia in matoi?

SURAT I PAULUS KON JAMAAT RUM 11:9

Ki Daud in noguman doman nanaa, “Pomayádon mako in rame monia tua mobaḻí naonda bo poyogaḷap kon i monia tontaní bo mobaḻí bubú inta koḷabúan monia bo morimumud!