YEHEZKIEL 5:6 - Alkitab Singog In Mongondow Masa In Tanaa

⁶ Táe Yerusalem ain nondoí kon parenta-Ku bo noniata magí noiḻiudon kon kororaat in bangusa mita ibanea, nodapot in noiḻiudon in diá kototoinduduinea kon negara mita inta kon ḻibuneamai. Yerusalem iḻimimpat kon parenta-Ku mita bo doí dumudui kon hukum-Ku mita.”

YEHEZKIEL 5:6 ပူးပေါင်းရင်းမြစ်များ

DATU MITA 2 21:11

“Ki Datu Manasye in moraatbí totok. Oaidnea in moraa-raat nongkon oaid in intau in Kanaan. Pinongin berhala mita inta pinomianea, sia in nokopopisídon kon intau in Yohuda binaradosa.

DATU MITA 2 21:9

Táe intau in Yohuda in diá motoindudui kon i Tuhan, bo ki Manasye in nokopopisídon kon i monia nogaid kon dosa inta moiḻiu in raatnea nongkon dosa inta pinomia in bangusa mita inta pinoguntun i Tuhan nongkon Kanaan kon dodai in umat in Israel sinumuot kon butá tatua.

NEHEMIA 9:34

Mogoguyang nami, datu, imang bo guhanga mita in ḻipú, iḻimimpat kon hukum-Mu bo diá nopandungmai. Bayongan in parenta bo toboḷow inta inogoi-Mu, diábí inindoianneamai, diá doman inindongogan.

NEHEMIA 9:35

Inogoi-Mu in datu mita inta momarenta kon umat-Mu, naonda in mosia nogutun kon butá inta mobanat bo mopia inta inogoi-Mu. Tongá diábí in mosia nonaḷámai kon kobobiag inta moraat, doí mogundoi kon ini-Mu poḷat moibada.

MAZMUR 106:20

Mosia in noponoḻiu kon i Allah inta moḷantud takin patong in sapi mokokaan kon bonok.

MAZMUR 78:10

Mosia in iḻimimpat kon dodandian i Allah takin i monia, bo doí sinumoḷutui kon hukum-Nea.

IḶUAIAN 16:28

Bo ki Tuhan noguman kon i Musa, “Dapotpa in toonu moiko doí mokidongog kon parenta-Ku mita?

YEREMIA 11:10

Mosia in nogaidon kon dosa inta pinomia in mogoguyang monia inta doí motoindudui kon i-Nakó, Mosia in nosumba kon ilah mita ibanea bo doí dumudui kon parenta-Ku. Pinomayá Israel andeka Yohuda iḻimimpatdon kon dodandian inta ain pinomia-Ku takin mogoguyang monia.

YEREMIA 5:3

Inta sinuntut i Tuhan in kososatiabí. Ki Tuhan in noḷubok kon i monimu, táe diá in pandung monimu. Sia in nomutuk kon i monimu, táe moiko in doí sambokon. Moiko in pamandot, bo doí mogogai in mogaid kon dosamu mita.

YEREMIA 8:5

Táe nongonu sin moiko, umat-Ku in umuranbí monoḻikud bo monaḷámai kon i-Nakó? Moiko in rimigonbí in kumadai kon berhalamu, bo doí mobui mangoi kon i-Nakó!

YEHEZKIEL 11:12

Dá kotaauandon monimu kon Akuoibí in ki Tuhan bo moiko in hukumon popisí in iḻimimpatdon kon atorang-Ku mita bo diádon dinumudui kon parenta-Ku mita takin dinumudui kon hukum mita in bangusa mita ibanea inta kon diugmumai.”

YEHEZKIEL 16:51

Totuu kon Samaria in moraat, táe dosanea in diábí tugat tongobotak in dosamu mita. Dodiamu in moraa-raat. Ki utatmu mita bobay naonda bo diá kotaḷá aka poyotongkaion kon inimu. Mustibí mooyá bo moempeng in iko!”

DANIEL 9:15

Oo Tuhan, Allah nami, Iko in nopoontongdon in kawasa-Mu pinongin nodia kon umat-Mu iḻumuai nongkon Mesir, bo kawasa-Mu tatua in umuranpabí toro-toroponmai. Kami in binaradosadon bo nogaid kon noitaḷá.

DANIEL 9:5

Kami in binaradosadon, kami in nogaidon kon inta moraat, bo nogaidon kon inta noitaḷá. Kami in nomarontakdon bo iḻimimpatdon kon parenta-Mu poḷat sinumabat kon atorang-Mu mita.

DANIEL 9:8

Datu mita nami, itoi mita nami bo mogoguyang nami ain nogaid kon inta mokooyá bo ain binaradosa kon ini-Mu, o Tuhan.

ZAKHARIA 7:11

Táe umat-Ku motontogat in uḷu bo totokbí in doí mokidongog; mosia in nomaḷon kon bongoḷan monia sinbá diá mokodongog.

KORINTUS 1 5:1

Akuoi in sabanarnea nokodongog bidon kon lapuran kon naanta oyúon bidon kon sigad monimu in moibog mogaid kon inta mokotor: Oyúon in kon sigad monimu in nonuaḻing takin i inánea uatok. Intaupa inta diá nonotaau kon i Tuhan diábí doman mogaid kon natua!

YUDAS 1:4

Sin diá kinotaa-taauanmai, naanta oyúon bidon in intau mita ibanea inta umuni-uni mako bo sinumuot kon yua-yuak naton. Mosia tua in intau mita moraat inta mopoyotuuy in habar soaḷ totabi i Allah naton. Makusud monia tua in motayakbí kon kasampatan mopoaid in onu inta kinoibog in awak monia. Mosia tua in diá mopirisaya kon ki Yesus Kristus tua in mongongawasa bo Tuhan naton. Nongkon tungkuḷpabímai hukuman kon i monia tua aindon pinotaau muna kon bonu in Buk Motusi.