YEHEZKIEL 5:12 - Alkitab Singog In Mongondow Masa In Tanaa

¹² Tongosilai in intaumu in matoibí popisí in yampoi in takit bo malarat in gogoy inta moiuma kon kotá. Tongosilai doman in tota-totadon in kedang kon ḷuai in kotá, bo tongosilai doman in porariton-Ku kon bayongan in tampat bo batukon-Ku in kedang.

YEHEZKIEL 5:12 ပူးပေါင်းရင်းမြစ်များ

YESAYA 1:24

Tuamai in ki Tuhan Inta Totok in Mokawasa, ki Allah in Israel in noguman: “Ei, musung-Ku mita, Akuoi in motuḻíbí kon yaat in gina-Ku kon i monimu, modapot in moiko diádon mokoposusamai kon i-Nakó bui.

YEREMIA 13:24

Akuoi in moporaritbí kon i monimu naonda bo baḻeká inirup in tompot nongkon padang gurun.

YEREMIA 14:12

Umpakabí in mosia mopuasa, doíbí in Akuoi moindoimai kon kuani monia mokituḷung; bo umpakabí in mosia moposumba kon i-Nakó in kuruban payongon bo kuruban gandum, yo diábí mosanang in gina-Ku kon i monia. Noyotoḻikudon kon tua, yopúon-Kubí in mosia in parang, in gogoy, bo in yampoi.”

YEREMIA 15:2

Aka ḻibóon monia kon inimu mongo kon onda in bayáan monia, yo tubagai nanaa, ‘Ki Tuhan in noguman, inta sinantú matoi popisí in takit yo biódon mako in sia matoi in takit. Inta sinantú matoi kon poparangan yo biódon mako in sia matoi kon parang. Inta sinantú matoi popisí in gogoy yo biódon mako in sia matoi in gogoy. Inta sinantú dakopon, yo biódon mako in sia diaan saḷaku intau dinakop!’

YEREMIA 15:9

Ki iná inta kinobuḻian in adí ḷoḷaki taya pitu in sinogopuḷong sin mosisí in poginaannea. Singgai kinobiagannea in nosindipdon, kinorasaannea kon sia in pinopoompámai bo pinokopo oyámai. Musungmu mita pokiḻimodan-Ku in inta nobiagpa kon sigad monimu. Akuoi, ki Tuhan, ain nosingog.”

YEREMIA 21:9

Bayongan in intau inta mogutun kon bonu in kotá in matoibí popisí in parang, gogoy, andeka yampoi in takit. Táe mosia inta ḷumuai sin tumungkud kon intau in Babel inta koyogot in nonubu kon kotá tanaa, in kotaḻibanbí bo diá ḻimodon.

YEREMIA 24:10

Akuoi in mopoangoibí kon i monia in parang, gogoy, bo yampoi in takit dá mosia komintan in matoi bo diá in kotaḷáan kon butá tanaa inta ain inogoi-Ku kon i monia bo kon mogoguyang monia.”

YEREMIA 42:22

Tuamai, toropdon: kon butá inta koibog monimu bayáan sin mogutun kon tua, yo matoibí in moiko kon parang, andeka matoi in gogoy andeka matoi in yampoi in takit.”

YEREMIA 44:27

Ḷongasion-Kubí sinbá mobodito in moiko bo diá mosanang, modapot in moiko matoi komintan, pinomayá matoi in parang andeka popisí in yampoi in takit.

YEREMIA 9:15

Tuamai, indongogaidon onu in aidan-Ku, Tuhan Inta Totok in mokawasa, Allah in Israel: umat-Ku in ogoian-Ku pinomuḷa mopait sin kaanon bo rasum sin inumon.

YEREMIA 9:16

Mosia in porariton-Ku kon sigad in bangusa mita inta diá kinotaauan monia andeka in mogoguyang monia. Akuoi in umuranbí mopotabá in tontara inta monubu kon i monia modapot in Akuoi momutú kon i monia komintan.”

YEHEZKIEL 12:14

Bayongan in mogogutun kon komaḻig, takin doman monononggina bo moḷoḷukad i datu tua in porariton-Kubí kon bayongan in tampat. Mosia in duduran-Kubí bo ḻimodon.

YEHEZKIEL 14:17

Dika-dika popoangoi-Ku in parang kon butá tatua, bo popoangoi-Ku in ḷoḷutam mita inta motoyang sin moyopú kon intau bo mahaḷuk.

YEHEZKIEL 14:19

Dika-dika popoangoi-Ku in yampoi in takit kon butá tatua, bo pobuká-Ku in torú-Ku kon inia modapot in intau andeka mahaḷuk yo moyopú.

YEHEZKIEL 14:21

Ki Tuhan Inta Totok in moḷantud in noguman, “Akuoi in mopoḷabú in opat in hukuman-Ku inta totok in motoyang kon Yerusalem sin moyopú kon intau andeka mahaḷuk. Naa in hukuman mita tatua: parang, malarat in kaanon, mahaḷuk moraat bo yampoi in takit.

YEHEZKIEL 16:42

Baintua bo moinggamádon in rogi-Ku, bo moonowdon bui in Akuoi. Diá bidon in Akuoi tumorú andeka mointoi.

YEHEZKIEL 21:22

Noniata magí dá piot inta kinogamáan in ḻimanea koḷanan pinaisan in Yerusalem! Dá mangaḻenea kon tua ki datu in musti monubu kon kotá in Yerusalem, mopobaḷú in kokow in parang bo mopotabá in tontaranea kon moposadia in pakakat mita podumpak, posindogon kon bonawang mita in Yerusalem, momontuyung kon butá baḻíon dinding pongopungan bo mongaḻi kon got mita.

YEHEZKIEL 24:13

Ei Yerusalem, oaidmu mita inta mokotor noponajisdon kon awakmu. Sinungkuḷan-Kudon dinaritan in iko, táe diá in mangaḻenea, sin iko in umuranbí nonajis. Iko in diábí modarit bui modapot in poḷuaion-Ku in torú-Ku kon inimu.

YEHEZKIEL 33:27

Podoyon kon i-Nakó, ki Allah inta nobiag, ki Tuhan Inta Totok in moḷantud, intau mita inta nogutun kon apug in kotá tatua in matoibí ḻimodon. Mosia inta nogutun kon rawang mita in kaanonbí in mahaḷuk mita inta moraat. Mosia inta nogadop kon buḷud mita bo kon angob mita in matoibí kotugatan in yampoi in takit.

YEHEZKIEL 36:19

Mosia in ihukum-Ku pinodoyon kon kobobiag bo dodia monia, bo pinorarit-Ku in mosia kon butá mita in intau ibanea.

YEHEZKIEL 43:8

Dungkuḷmai in datu mita monia in momia kon ḷoḷuang mita bo oigi mita in komaḻig monia kon sí in ḷoḷuang bo oigi mita in Baḷoi-Ku, dá tongádon dinding tobatú in kon sigadnea. Mosia in nongotordon kon tangoi-Ku inta motusi pinongin aid monia inta mokorongó. Tuamai in iyopú-Ku in mosia kon bonu in torú-Ku.

YEHEZKIEL 5:10

Guyanga in mokaandon kon i adínea tontaní bo adí in mokaandon kon guyanganea. Natuata in pohohukum-Ku kon i monia, bo inta mobiagpa in porariton-Ku kon bayongan in tampat.

YEHEZKIEL 5:17

Koḻikud in malarat in gogoy yo popoangoi-Kubí doman in yampoi in takit, aid moromú bo parang sin moḻimod kon intaumu, bo mahaḷuk mita inta mokokaan kon intau sin moḻimod kon i adí mita monia. Akuoi, ki Tuhan, ain nosingog.”

YEHEZKIEL 5:2

Tongosilai in musti tubáanmu kon yua-yuak in kotá tatua naonda in mopaḷutdon in pongopungan. Tongosilai doman in musti tota-totadonmu in kedangmu sindaḷan moḻibu kon kotá tatua. Bo tosilai imbuitnea musti potabudonmu kon baḷangon, bo batukon-Ku in kedang-Ku.

YEHEZKIEL 6:8

Topiḻik nongkon i monia in posaḷamaton-Kubí nongkon ponotadan tatua táe mosia in poraritonbí kon sigad in bangusa mita;

YEHEZKIEL 7:15

Kon daḷan mita in kotá oyúon in parang, kon baḷo-baḷoiannea oyúon in yampoi in takit bo malarat in gogoy. Ki inekabí in kon ḷuai in kotá yo matoibí kon bonu in parang, bo inta mogutun mako kon bonu in kotá in matoibí in takit bo gogoy.

YEHEZKIEL 7:3

Ki Tuhan in noguman, “Ei Israel, tanaa in noiangoidon in kopaḷutanmu. Iko in mokonanamdon kon torú-Ku. Iko in sisigan-Ku podudui in aidmu inta moromú.

IMAMAT 26:33

Popoangoi-Ku in parang kon butá monimu bo poyayiton-Kudon in moiko kon butá in intau. Gobá mita monimu moibiardon mako, bo kotámu mita pomayádon mako in mogoguyaat.

AMOS 9:4

Aka mosia dakopon in musung, yo pokiḻimod-Kubí in mosia. Niaton-Kubí yompaton in mosia, bo diábí in motuḷung kon i monia.”

AMOS 9:9

Akuoi in momarentabí bo moguab kon bangusa in Israel naonda bo intau moguab kon gandum kon bonu in digu. Sin moḷumbú kon bayongan inta diá in mangaḻenea kon sigad monia, Poyotombaukon-Kubí in mosia kon yua-yuak in bangusa mita.

ZAKHARIA 7:14

Naonda bo deḷang, Akuoi in nongaitdon kon i monia dá pakisadon in mosia nogutun kon butá mita in intau. Butá inta mopia tanaa ain nobaḻí noingongow diádon in mogogutun bo noḷogatdon.”

ULANGAN 28:65

Kon sigad in bangusa mita tatua moiko in diábí mokouḻí kon kobiagan mopia, bo diábí in tampat inta motaau tangoion monimu kapunyaanmu; Baḻíon i Tuhan in moiko totok in moondok bo koinggamáan in rigon in gina takin diá in andoḷan.

WAHYU 6:8

Bo inontongku in tobatú kabaḷo inta nobilai. Ki inta sinumakoi tua tangoinea in ki Maut. Bo dumuduianmai kon inia in dodatuan popatoi. Tokoar in kawasa kon dunia naa in pinosarakan kon i monia, sinbá mosia in motaau moḻimod popototoi kon parang, malarat bo popototoi kon takit mita bo popototoi kon mahaḷuk mita inta mokokaan kon intau.