YEHEZKIEL 45:4 - Alkitab Singog In Mongondow Masa In Tanaa

⁴ Butá tatua in motusi, bo sinadia kon imang mita inta mopobayá in oaidan posumbaan kon Baḷoi Tuhan. Tongosilai nongkon butá tatua in mobaḻíbí tampat poposindogan in baḷoi monia, bo tongosilai doman in pakéon poposindogan in Baḷoi Tuhan.

YEHEZKIEL 45:4 ပူးပေါင်းရင်းမြစ်များ

YEHEZKIEL 40:45

Ḷoḷaki tatua in noguman kon inakó kon los inta noitayow in toḷatan tatua in sinadia kon imang mita inta mopobayá in oaidan kon Baḷoi Tuhan,

YEHEZKIEL 40:46

bo los inta noitayow kon utuan sinadia kon imang mita inta mopobayá in oaidannea kon mezbah. Bayongan in imang tatua musti nongkon buí mita i Zadok. Sin nongkon suku i Lewi tongábí buí i Zadok in motaau mayá tumayow kon i Tuhan sin mogundoi kon i-Nia kon ibada.

YEHEZKIEL 43:19

Tongábí imang buí i Zadok nongkon suku Lewi in motaau mamangoi in tayowon-Ku sin mopobayá in oaidan pogundoian. Akuoi, ki Tuhan Inta Totok in moḷantud in nomarenta nokiaid intua. Ogoidon kon i monia in sapi koḷakian tobatú inta batáneapa sin pokuruban potobut kon dosa.

YEHEZKIEL 44:28

Imang mita in nogabat kon oaidan in imang tatua nobaḻí tonsilai kon i monia nongkon onu inta ogoi-Ku kon Israel modapot in adí bo ompu. Mosia in diábí motaau monongkapunyaan onuka kon Israel: Akuoibí naa in kapunyaan monia.

YEHEZKIEL 45:1

Kon tungkuḷ in butá tatua diápa silaion mobaḻí butá budel kon batúan in suku, yo mustibí tontaníon in tongosilai kon i Tuhan. Butá tatua in kobanatnea in musti mopuḷú bodoyowá noribu bo ḻima nogatut nometer, bo kooḷadnea in mopuḷú noribu nometer. Komintan butá tatua in sinantú motusi.

YEHEZKIEL 45:3

Tongobotak in butá tatua, inta kobanatnea in mogatut bo doyowa nopuḷú bo ḻima noribu nometer, bo kooḷadnea in ḻima noribu nometer musti sadiaan kon poposindogan in Baḷoi Tuhan, tuata in butá inta totok in motusi.

YEHEZKIEL 48:8

Tonsilai noiduduimai nongkon butá tatua musti poyotondíon kon inta sinantúdon kon pakéon. Kobanatnea in mogatut bodoyowá nopuḷú boḻima noribu nometer nongkon sigad kon utuan nodapot kon toḷatan. Sigad mita kon dotá in pomukaan bo toyopan mustibí motongkai in kobanatnea takin tonsilai mita inta inogoi kon suku mita in Israel. Baḷoi Tuhan in posindogon kon tonsilai tatua.

PINOGIAPAN 16:5

Bo sia in noguman kon i Korah bo dumoduduinea mita, “Ikoḷom doḷo-doḷom ki Tuhan in mopoontongdon kon i naton mongo ki ine in kapunyaan-Nea, bo ki ine inta sinondí kon i-Nia. Intau inta piḻíon-Nea tua in motaau dimiug kon i-Nia.