YEHEZKIEL 38:11 - Alkitab Singog In Mongondow Masa In Tanaa

¹¹ Iko in monantúdon kon monubu kon butá inta diá dininding tatua, inta intaunea mita nogutun takin pia-pia mako bo notompia kon kotá mita inta diá dininding bo diá doman in pakakat mita in parang.

YEHEZKIEL 38:11 ပူးပေါင်းရင်းမြစ်များ

IḶUAIAN 15:9

Musung noguman, ‘Mosia in aḷowanku bo domokon, rabutonku in pitow, bo rataanku in mosia. Bo bayongan kaoyúonan monia agowonku, sila-silaionku bo pakéonku modapot in moorop.’

YEHEZKIEL 30:9

Aka singgai tatua moiangoidon, bo Mesir in norimumudon, yo potabá-Kubí mangoi in totabá mita tumakoi kon kapaḷ mita sin mopotaḻikokog kon intau mita in Sudan inta diábí noiraimai kon i monia, dá angoiandon in ondok in mosia. Totuu, singgai tatua in moiangoibí!”

YEHEZKIEL 34:27

Pangkoi mita in kayu in momungaidon, pinomuḷa mita kon gobá in mobogoidon in bungainea, bo bayongan in intau in mogutunbí moodom kon butánea tontaní. Aka rante pinotogot kon umat-Ku bo botowandon bo mosia in poḷuaton-Kudon nongkon intau mita inta nononggata kon i monia, dá kotaauandon monia kon Akuoibí in ki Tuhan.

YEHEZKIEL 38:14

Manangka intua ki Tuhan Inta Totok in moḷantud nopotabá kon inakó mopotaau kon i Gog in koyow tanaa, “Kon dodai in umat-Ku Israel nobiag pia-pia mako bo noodom, iko in mamangoi monubu.

YEHEZKIEL 38:8

Tongonupamai notaong sia in parentaan-Kudon monubu kon butá tobatú takin intaunea inta ain sinipun nongkon sigad in nobayong in bangusa bo inta kon singgai noiduduimai mogutun kon butá tatua takin moodom. Ki Gog in mongawasabí kon buḷud mita in Israel inta noonggotdon in noingongow bo nopuḻingdon in apug mita, táe tanaa inutunandon in rayat mita inta nobiagdon noodom.

ZAKHARIA 2:8

Ki ine in monubu kon i monimu, in monububí kon batoḷ in dodob-Ku.” Dá Ki Tuhan Inta Totok in mokawasa in nopotabá kon inakó mopotaau in koyow tanaa kon bangusa mita inta ain nogagow kon umat-Nea,

SURAT I PAULUS KON JAMAAT RUM 3:15

Ḷangkad monia in moḻikat aka mayá moposikisa bo moḻimod kon intau.

ULANGAN 12:10

Naonda in moiko ḷumoḷan kon Ongkag in Yordan, ki Tuhan Allahmu in motuḷungbí kon i monimu ḻimitú bo mogutun kon butá inta kon ḷoḷan in ongkag tatua. Sia in mogoḻingoibí kon i monimu nongkon bayongan musung, bo moiko in mobiagbí moaman bo motompia.

HAKIM MITA 18:27

Naonda in suku mita in Dan tatua nodia minayá kon imang tatua takin pakakat mita in ibada inta pinomia i Mikha tatua, minayá in mosia nonubu kon Lais, kotá inta intaunea mita nobiag noaman bo nobiag nooyúon. (Kotá tatua noiukat kon bonu in ḷopá tobatú takin kotá Bet-Rehob.) Intau mita in Dan tatua noḻimod kon bayongan in intau inta nogutun kon Lais bodongka nonurub kon kotá tatua. Diábí in namangoi notuḷung kon intau mita in Lais sin tampat monia tua in noitontaní bo noyayú nongkon Sidon. Nopaḷut mako kon tua intau mita in suku Dan noposindogdon bui in kotá tatua bo nogutun kon tua.

HAKIM MITA 18:7

Nopaḷut mako kon tua taya ḻima tua minayá in Lais. Kon tua nonaridimai in mosia kon intau mita inta nogutun kon tua. Noniata magí kobobiag in intau mita in Lais tatua naonda bo kobobiag in bangusa in Sidon. Umpakabí noitontaní in mosia, bo noyayú nongkon bangusa in Sidon, mosia tua in nobiagbí noaman bo motompia, diá in musung, nooyúon, bo diábí in diá kon i monia.