YAKOBUS 3:1 - Alkitab Singog In Mongondow Masa In Tanaa

¹ Utat mita! Dikabí mobayong in kon sigad monimu in moibog mobaḻí guru. Kinotaauanbí monimu kon kita inta mobaḻí guru in adilonbí moboga-bogat nongkon intau ibanea.

YAKOBUS 3:1 ပူးပေါင်းရင်းမြစ်များ

IMAMAT 10:3

Bo ki Musa in noguman kon i Harun, “Tuata in makusud i Tuhan kon dodai in Sia noguman, ‘Bayongan intau inta mogaid kon oaidan-Ku musti mohoromat kon kotusian-Ku. Poniata-Kubí in kawasa-Ku kon bayongan bangusa-Ku.’ ” Táe ki Harun tongádon kibio-biómai.

MALEAKHI 2:12

Igumon mako intau mita inta nogaid kon natua in poyayúondon i Tuhan nongkon umat in Israel. Igumon mako mosia in diádon dumudui kon bangusa naton moposumba in kuruban mita kon i Tuhan Inta Totok in mokawasa.

MATIUS 10:24

Diábí in murí moiḻiu kon gurunea, andeka simpaḷ moiḻiu kon i tuangnea.

MATIUS 23:13

“Koboditodon in moiko, ei mototundú kon agama Yahudi! Ei moiko intau inta mongomunapik. Sin moiko in moḷamboi kon intau inta mamangoi kon i Allah. Moiko tontaní in doíbí mobaḻí umat i Allah, bo intau ibanea inta moibog in ḷamboianbí monimu. [

MATIUS 23:14

Koboditodon in moiko, mototundú mita kon agama bo intau mita in Parisi: Moiko in intau mita inta mongomunapik. Moiko monguboḷ kon intau mita inta dongkadon boba-bobay bo mogagow kon baḷoi monia. Moiko in mosambayang koḷanggo-ḷanggóon sin ponaḷob kon oaid monimu inta moraat tatua. Tuamain hukuman i Allah kon i monimu in pastibí kon moboga-bogat nongkon intau ibanea!]

MATIUS 9:11

Tua mita inontong in intau mita in Parisi, dá mosia in noguman kon murí mita i Yesus, “Nongonu sin gurumu in nongaanbí moyotakin mononagi kon pajak bo intau baradosa?”

LUKAS 16:2

Dá inoiníneadon in bendaharanea tatua bo pinoḻiboan nanaa, ‘Degá totuu in bayongan inta ain dinongogku soaḷ oaidmu? Aka totuu kon natua, yo tanaa mako posarakaidon modait kon inakó in lapuran in bayongan oaidanmu, sin pogogaionkudon in iko.’

LUKAS 6:37

“Donaai in moiko mohakim kon intau, sinbá diá doman hakimon i Allah in moiko. Bo donaai doman mohukum kon intau. Sinbá diá doman hukumon i Allah in moiko. Ampungaibí in intau inta kotaḷá kon i monimu, sinbá ampungan doman i Allah in taḷá monimu.

YOHANES 3:10

Tubag i Yesus, “Iko nion guru kon Israel, umpaka yo diá kotaauanmu in soaḷ tatua?

OUMAN IN RASUL MITA 13:1

Wakutu intua kon jamaat in Antiokhia oyúon in tongonumai in nabi bo guru, naa in tangoi monia tua: Ki Barnabas, ki Simeon inta dinonoi ki Niger, ki Lukius intau in Kirene, ki Menahem inta noyobiag i Datu Herodes, bo ki Saulus.

KORINTUS 1 12:28

Natua doman in kon jamaat. Tampat in bayongan intau ain bidon sinantú i Allah. Muna in rasul mita; nogindua in nabi mita, nogintoḷu in guru mita bo intau mita inta nogaid kon mokoherang, onda intua intau mita inta inogoian in totabi mongundam bo motuḷung kon intau ande inta mobaḻí duduianmai, ande mosia inta inogoian totabi mosingog kon mokoherang.

KORINTUS 2 5:10

Sin notantúbí kon kita in diaanbí kon tayowon pongadilan i Kristus, bo pomuḷoi intau in motarimabí kon inta patus tarimaannea podudui in oaidannea kon wakutu in kon duniapa naa – oaid mopia andeka moraat.

EPESUS 4:11

Sia doman tua inta nobogoi in rasul, nabi bo intau mita inta mopoyaput in Habar Mopia, gombala bo guru mita.

TIMOTIUS 1 1:7

Mosia tua inta moibog totok mobaḻí mototundú kon hukum i Musa bokaka mosia tontaní in diábí doman momangaḻe kon onu inta siningog ande sinundú monia tua.

TIMOTIUS 1 2:7

Dá tuamai akuoi in pinotabá-Nea mayá kon yua-yuak in intau mita inta deeman Yahudi sin mopoyaput in habar mopia inta mobanar nongkon i Allah. Onu inta pinogumanku naa in totuubí, deemanbí uboḷ.

TIMOTIUS 2 1:11

Bo popisíbí in mopoyaput in Habar Mopia tatua dá inoiní i Allah in akuoi mobaḻí rasul bo guru.

IBRANI 13:17

Duduiaibí onu in pinarenta in itoi mita monimu bo kodu-kodudui doman kon i monia. Sin mosia in umuran monarukira mako kon kobiaganmu bo mustibí in mosia motanggung jawab kon i Allah. Aka moiko bo motoindudui kon i monia, dá mosanangbí in gina monia in mogaid, táe aka diá yo monakit in gina monia in mogaid, bo tua in diábí mobogoi in kauntungan kon i monimu.

YAKOBUS 1:16

Utat mita inta kinotabiku, dika moibog koakaḷan in moiko!

YAKOBUS 1:19

Utat mita inta kinotabiku, tarukira kopira in naa! Pomuḷoi in intau musti ḻimikat in mokidongog, tongá mokopoḷaḷoi in mosingog bo donaai doman baḷú tumorú.

YAKOBUS 3:10

Nongkon bibig inta notongkai ḷumuai in singog posukur bo singog doman pogodi-godi. Utatku mita, diábí motaau in natua!

PETRUS 1 5:3

Bo dikabí in moiko naonda bo pongawasa kon i monia inta pinoki ḷukad kon i monimu, táe moiko in mustibí mobaḻí contoh kon i monia.