YAKOBUS 1:12 - Alkitab Singog In Mongondow Masa In Tanaa

¹² Kosanangdon in intau inta motaba wakutu in kinoantugan in sobaan. Sin aka sia bo mokotahangdon kon sobaan tatua, yo tarimaanneabí in bungainea. Bungainea tua in kobiagan inta ain pinodandi i Allah kon intau inta motabi kon i-Nia.

YAKOBUS 1:12 ပူးပေါင်းရင်းမြစ်များ

KINOBAḺIAN 22:1

Diá noonggot kon tua, kotoindudui Abraham sinungkuḷan i Allah. Ki Allah in nogoiní, “Abraham!” Bo ki Abraham sinumubag, “Ya Tuhan.”

NEHEMIA 1:5

“Oo Tuhan Allah inta nongawasa kon soroga. Iko in Allah Inta Moḷoben bo kami in tumayow kon ini-Mu takin moondok totok. Iko in tantúbí mosatia bo nokadai kon dandi-Mu kon intau mita inta motabi kon ini-Mu bo motoindudui kon parenta-Mu.

AYUB 2:10

Tubag i Ayub, “Iko nion in mosingogbí naonda bo intau dondunguḷ! Umpaka yo tongábí in kita moibog motarima kon onu inta mopia nongkon i Allah, bo inta diá mopia in diábí tarimaan naton?” Dá, umpakabí in ki Ayub kinoantugandon in bayongan bodito tatua, diábí in sia nopoyaput in tosingogon moḷawang kon i Allah.

AYUB 5:17

Nomujurdon totok in iko aka ki Allah nonoboḷow kon inimu! Dika moyaat in gina aka torúan-Nea in iko.

MAZMUR 11:5

Ki Tuhan in nonungkuḷ kon intau mopia bo intau moraat, dinoí-Nea in intau inta moḻingá.

MAZMUR 119:67

Kon dodai in diápa ihukum, akuoi in sinumabat, tanaa in akuoi kinumadai kon parenta-Mu.

MAZMUR 119:71

Totuubí kon mopiabí in Iko in nohukum kon inakó, sinbá kotaauankudon in atorang-Mu mita.

MAZMUR 119:75

Kinotaauanku kon pinononantú-Mu in moadil o Tuhan, Iko in nohukumdon kon inakó popisí in kososatia-Mu.

MAZMUR 5:11

Hukumdon in mosia, o Allah, pomayádon mako in mosia mobodito popisí in tomayánea tontaní. Untundon in mosia sin nobayongdon in dosa monia, sin mosia in nomarontakdon kon ini-Mu.

MAZMUR 94:12

Pia in kamang in intau inta sinundú-Mu, o Tuhan, intau inta sinundúan-Mu in hukum-Mu mita.

IḶUAIAN 20:6

Táe Akuoi in mopoontongbí in tabi-Ku kon ribuan buí in intau mita inta motabi kon i-Nakó bo inta motoindudui kon parenta-Ku.

AMSAL 17:3

Buḷawan bo saḷaka in ujionbí kon tuḷú, táe gina in intau in ujionbí i Tuhan.

YESAYA 64:4

Diápa kon dodai in onda oyúon in nokodongog, bo diápa doman kon dodai in onda oyúon in nokoontong kon koḻikud in Iko, oyúon in ilah inta nogaid kon onuka, kon intau inta noharap mako kon inia.

ZAKHARIA 13:9

Tongádon 1/3 nea in mosaḷamat. Bo mosia tua in potusion-Ku naonda bo saḷaka inta pinomurni in tuḷú. Mosia in ujion-Kubí naonda bo intau moguji kon buḷawan. Bo mosia in mosambayang kon i-Nakó, bo tubagan-Ku in mosia. Akuoi in moguman kon i monia kon mosia in umat-Ku, bo akúon doman monia kon Akuoibí in ki Tuhan Allah monia.”

MATIUS 10:22

Moiko in saturuon in bayongan intau sin moiko in murí-Ku. Táe ki ine in mokotahang modapot in kopaḷutannea, sia tua in mosaḷamat.

MATIUS 25:34

Bo Datu tatua in moguman kon i monia inta kon dotá in koḷanan-Nea, ‘Igai, in moiko inta binarakatan i Amá-Ku, tuotdon kon dodatuan inta aindon sinadia kon i monimu kon wakutupa in dunia naa bagupa binaḻí.

LUKAS 6:22

Pia in kamang in moiko aka moiko sinaturu, diá sinarima, siningkuḻe bo pinoponapudan doman in uboḷ, sin popisí in moiko dumodudui i Adí Intau!

SURAT I PAULUS KON JAMAAT RUM 5:4

Ibog mogaid totu-totuu tua in mokopobaḻí kon intau monahang kon totungkuḷ; bo soaḷ tanaa inta mokopomuká kon harapan.

SURAT I PAULUS KON JAMAAT RUM 8:28

Kinotaauanbí naton kon ki Allahbí in nonoinut kon bayongan yagi-yagi, sahingga in mokopoangoi kon onu inta mopia kon intau mita inta motabi kon i-Nia bo inta inoiní-Nea podudui in tomayá-Nea.

KORINTUS 1 2:9

Tongá soaḷ tatua ain bidon noipais kon Buk Motusi, “Onu inta diá kon dodai in onda inontong andeka dinongog in intau, bo diá doman dodai onda in kinoraian intau, tuatabí in sinadia i Allah kon bayongan intau inta motoindudui kon i-Nia.”

KORINTUS 1 8:3

Táe intau inta totu-totuudon motabi kon i Allah, sia tua in kotaauanbí totok i Allah.

KORINTUS 1 9:25

Pomuḷoi intau inta mobasadia tumakin kon poyotandingan, musti monahang kon yagi-yagi, sinbá mokouḻí kon tombuinag inta diá mononoi kon dunia naa, táe kita in monahang kon yagi-yagi sinbá mokouḻí kon tombuinag inta mononoi.

ULANGAN 13:3

dikadon iko mokidongog kon tosingogonnea. Ki Tuhan Allahmu in nomaké kon intau tatua sin monungkuḷ kon i monimu, sin moindoi mongo totu-totuu in moiko motabi kon i Tuhan ande diá.

ULANGAN 7:9

Pokotorop kon ki Tuhan Allahmu in tongábí Sia-Sia mita in ki Allah, bo Sia in Allah inta mosatia. Ki Tuhan nogintompod kon dandi-Nea bo noponiata in tabi-Nea inta diá modai-dait modapot in toribu nopobuían kon intau mita inta motabi kon i-Nia bo motoindudui kon parenta-nea mita.

ULANGAN 8:2

Toropdon! Opat nopuḷú notaong koonggotnea in ki Tuhan Allahmu nodia kon i monimu kon bonu in binayáan moyayú sinumaḻib kon padang gurun. Binayáan tatua imakusud i Tuhan monungkuḷ kon i monimu, sinbá koontongan-Neadon onu in kon bonu in ginamu bo indoian-Nea mongo moiko mokopotoindudui kon parenta-Nea mita.

TIMOTIUS 2 2:15

Totok poramuji sinbá akuondon i Allah in iko saḷaku intau inta motaau pirisayaan-Nea mogaid kon oaidan-Nea. Poramujibí konbá diá mooyá in iko in mogaid kon oaidan tatua, táe tongádon kabaranian motundú bo mopotaau kon onu inta mobanar nongkon i Allah.

TIMOTIUS 2 4:8

Bo tanaa mako in pinopooḷatdon mako kon inakó in saḷaku intau inta nountung. Kon singgai ponantúan ki Tuhan, hakim inta moadil totok tua in moposarakan in tombuinag tatua kon inakó. Deemanbí doman tongá akuoi in motarima kon tombuinag natua, táe bayonganbí doman intau inta umuran mogoḷat mako kon koangoian bui i Tuhan.

IBRANI 10:32

Toropka in kaadaan monimu koḻipod. Kon wakutu in moiko notarima kon bayag inta pinonindar i Allah, moiko in tantú nokorasa kon yoyiga, táe umuran nobakuat totok in moiko.

IBRANI 11:17

Popisí doman in mopirisaya, dá ki Abraham nobaranibí in noposumba kon i Ishak saḷaku kuruban kon i Allah wakutu in inuji i Allah in sia. Ki Abrahambí tua in pinobogoian i Allah kon dandi-Nea, táe norelabí in sia in noposarakan kon i adínea inta tongá totobatú tua.

IBRANI 12:5

Bo dikabí ḻiongon monimu in tonggina mita i Allah tanaa, inta inogoi-Nea kon i monimu saḷaku ki adí-Nea mita: “Adí-Ku, tarukiradon kopira totok in totundú i Tuhan, bo dikabí tumontoḷ aka torúan-Nea in iko.

IBRANI 6:15

Nosabar in ki Abraham in nogoḷat kon dandi tatua, sahingga nouḻínea in onu inta pinodandi tatua i Allah.

YAKOBUS 2:5

Toropdon, Utatku mita inta kinotabiku! Intau inta nobiag nobogá kon dunia naa, piniḻí i Allah mobaḻí intau inta mooyúon kon bonu in pirisaya. Intau mita tatua in mobaḻíbí anggota in umat i Allah ná inta pinodandi i Allah kon intau mita inta kinotabi-Nea.

YAKOBUS 5:11

Mosia in sinangoi nosanang sin notaba. Dinongogdon monimu in soaḷ kososabar i Ayub, bo kinotaauan monimu kon pangabisannea binarakatan i Tuhan in sia. Sin tabi i Tuhan in totok moḷoben bo Sia in mopia in gina.

PETRUS 1 3:14

Táe umpaka mokorasa kon roriga lantaran mogaid kon soaḷ mita inta mopia, táe mountungbí in moiko! Manangka intua donaaibí moondok kon i inekabí bo donaai doman umuran moḻia-ḻiaw in gina.

PETRUS 1 4:13

Mokoposanangbí kon gina sin moiko in nokorasadon kon ná inta ain kinorasaan i Kristus. Dá aka kamuliaan i Kristus popoontongdon, yo totokbí in mopia in gina monimu.

PETRUS 1 4:14

Kopiabí in gina monimu aka singkuḻeon sin popisí in mopirisaya kon i Kristus, tua in mangaḻenea Roho momulia inta Roho i Allah in umuranbí kotaki-takin monimu.

PETRUS 1 5:10

Táe naonda in moiko nokorasa kon roriga motoyong, yo ki Allah tontaní in moposompurna kon i monimu. Potorindogon-Nea bo iropotan in moiko. Sin Sia in Allahbí inta totok mopia in gina, inta ain nogoiní kon i monimu sinbá moitakin doman mokorasa kon kopia-Nea inta mononoi pongin i Kristus.

PETRUS 1 5:4

Sahingga in kon wakutu Gombala inta momulia mamangoi bui, moiko in motarima kon tombuinag moḷoben inta diá mogogu-goguyaat.

YOHANES 1 4:19

Kita motabi, sin ki Allah ain muna notabi kon i naton.

WAHYU 2:10

Dikabí moondok kon yoyiga inta diádon moonggot in musti korasaan monimu. Pokotorop, oyúon in tongonumai intau kon sigad monimu in potuoton Ibilis kon bonu in ponjara sin mosoba kon i monimu. Moiko in mokorasa kon yoyiga kon bonu in mopuḷú nosinggai. Táe kotoinduduibí tantú in moiko kon i-Nakó modapot in matoi, dá moiko ogoian-Ku in kobiagan mononoi saḷaku tombuinag sin nountungdon.

WAHYU 3:19

Intau mita inta kotabi-Ku, mosia tuata in toboḷowon-Ku bo sambokon-Ku. Manangka intua koropotdon in gina monimu bo pogogaidon in mogaid kon dosa mita.

WAHYU 3:21

Mosia inta mountung, ogoi-Ku ḻimitú takin-Ku kon tampat pomomarentaan-Ku, notongkai doman ná Akuoi inta ain nountung bo tanaa mako in iḻimitú noyotakin i Amá-Ku kon tampat pomomarentaan-Nea.