WAHYU 5:13 - Alkitab Singog In Mongondow Masa In Tanaa

¹³ Bo akuoi in nokodongog kon bayongan in mahaḷuk kon ḷangit, kon butá, kon ḻimonag in butá; kon bonu in dagat--singog mopoḷok mako bayongandon mahaḷuk kon dunia naa, nodondong nanaa, “Sia inta iḻimitú kon tampat pomomarentaan tatua bo ki Adí in Domba tatua, mosia tuata inta popoyaputan in bayongan dodayow, horomat, poḷantudon bo mokawasa modapot in mononoi!”

WAHYU 5:13 ပူးပေါင်းရင်းမြစ်များ

TAWARIKH 1 29:11

Iko in totuu moḷoben, bo nongawasa. Iko in momulia, ponango-nangoian bo moagung. Bayongan in yagi-yagi kon ḷangit bo kon butá Ikobí in kitogi. Iko in Datu Moḷoben, pongawasa kon bayongan in yagi-yagi.

YESAYA 24:14

Intau mita inta mosaḷamat in modondong takin pia in gina. Intau kon toyopan in mopotaaubí in koagung i Tuhan

YESAYA 42:10

Podondong in dondong mobagu kon i Tuhan, dayowdon in Sia ei sinangkub in dunia! Ponggonugurdon, ei dagat bo bayongan in tombonunea, ḻipú mita inta moyayú bo bayongan in intau inta nogutun kon tua!

MATIUS 6:13

Donaaidon pomayá mako in kami kobuḻian in pirisaya kon dodai in kami koantugan in totungkuḷ, táe pilataidon in kami nongkon kawasa i inta Moraat! [Sin Ikobí in Datu inta mokawasa bo momulia dapot in mononoi. Amin.]’

LUKAS 2:14

“Dinayo-dayowdon in ki Allah kon tampat inta Totok in Moḷantud! Bo dodamean umuran kotaki-takin monimu, intau inta umuran mogaid kon mokosanang kon gina i Tuhan!”

YOHANES 1:29

Nopoikoḷomai kon singgai, indoianmai Yohanes ki Yesus namangoi kon inia. Bo ki Yohanes in noguman, “Indoiai, tuata in ki Adí in Domba i Allah inta momopat kon dosa in dunia.

SURAT I PAULUS KON JAMAAT RUM 11:36

Ki Allah in nomia kon bayongan yagi-yagi. Komintanbí nongkon i Allah bo pinomakusudbí doman kon i-Nia. Dinayo-dayowdon in ki Allah nodapot in kopaḷutan dunia naa! Amin.

SURAT I PAULUS KON JAMAAT RUM 16:27

Tongábí Sia-sia mita in Allah, mobijaksana totok in Sia. Poigumondon mako Sia in umuran duíon bo dayowon pomuḷoi mako pongin i Yesus Kristus! Amin. Horomat nami, Ki Paulus, mogogaid kon oaidan i Kristus Yesus

SURAT I PAULUS KON JAMAAT RUM 9:5

Mosia in buíbí doman in mogoguyang naton. Awak i Kristus naa in nongkon bangusabí monia tua. Táe Siabí in moḷantu-ḷantud nongkon bayongan in yagi-yagi. Dinayo-dayowdon in ki Allah modapot in kopaḷutannea! Amin.

EPESUS 3:21

Ki Allah in musti umuran dayowon, modapot kon adí bo ompu kon bonu in jamaat, pongin i Yesus Kristus. Dinayo-dayowdon in ki Allah modapot in kopaḷutannea! Amin.

PILIPI 2:10

Sinbá kon bonu in tangoi Yesus, bayongan in mahaḷuk inta kon ḷangit, kon butá ande kon ḻimonag in butá, komintandon mosumba kon i-Nia.

KOLOSE 1:23

Manangka intua, moiko in musti umuran mosatia in mopirisaya bo umuran doman kumadai mokoporopot kon onu inta ain pinirisaya monimu. Dika modapot in ukatan monimu harapan inta ain inogoi kon i monimu wakutu in moiko notarimadon kon Habar Mopia nongkon i Allah. Habar Mopia tatua ain pinotaau kon bayongan intau kon dunia naa. Bo popisíbí in tuata, akuoi ki Paulus in nobaḻí mogogaid kon oaidan i Allah.

TIMOTIUS 1 4:16

Ḷukadai in awakmu bo ḷukadai doman in onu inta ain sinundúmu. Musti in iko mokopotoindudui kon tua komintan, sin aka tantúmu aidan intua komintan, yo mangaḻenea kon tua iko in moposaḷamat bidon in awakmu bo moposaḷamat doman kon intau mita inta moibog mokidongog kon inimu.

PETRUS 1 4:11

Intau inta mopoyaput in habar, sia mustibí mopoyaput in habar nongkon i Allah, intau inta mobantung kon intau ibanea, mustibí pakéonnea in ropot inta nongkon i Allah, sinbá kon bayongan in yagi-yagi ki Allah in dayowon pongin i Yesus Kristus. Sia tua in kitogi kamuliaan bo kawasa inta mononoi. Amin.

PETRUS 1 5:11

Siabí doman tua inta mongawasa modapot in kopaḷutan in yagi-yagi! Amin.

YUDAS 1:25

Tongábí Sia tua in ki Allah, Mopoposaḷamat naton pongin i Yesus Kristus Tuhan naton. Siata in ki Allah inta momulia, Moḷoben, mokawasa bo inta mokobangkaḷ nongkon tungkuḷpa intua, masai naa bo modapot kopaḷutan in dunia naa! Amin.

WAHYU 1:6

bo baḻíon-Nea tobatú bangusa in imang mita in kita, inta mogaid kon oaidan i Allah, ki Amá-Nea. Ki Yesus Kristus tuata inta momulia bo inta mongawasa modapot in kopaḷutannea. Amin!

WAHYU 13:8

Mahaḷuk tatua sumbáanbí in bayongan intau inta nobiag kon dunia naa. Intau mita inta diápa kinopaisan in tangoi monia kon bonu in buk kobiagan inta kapunyaan i Adí in Domba inta ain iratá, pinangkoipamai kon dunia naa diápa pinomia.

WAHYU 5:1

Noiduduimai kon tua akuoi in nokoontong kon ḻitodan buk kon ḻima koḷanan i Intau inta iḻimitú kon tampat pomomarentaan tatua. Buk tatua nopuḻing in pais kon posi-ḷosi bo kinompitan in meterai pitu.

WAHYU 5:12

Bo mosia in nodondong noropot nanaa, “Ki Adí in Domba inta ain iratá tatua, patusbí motarima kon kawasa, kaoyúonan, kabijaksanaan bo ropot; Sia in patusbí horomaton, poḷantudon bo dayo-dayowon!”

WAHYU 5:3

Táe pinomayá kon soroga, ande kon dunia naa, ande kon ḻimonag in butá Diábí tobatúmai intau in nokosanggup nobuká kon buk tatua, bo noindoi kon bonunea.

WAHYU 5:6

Noiduduimai bui kon tua akuoi in nokoontong kon tobatú ki Adí in Domba sinimindog kon yua-yuak in tampat pomomarentaan tatua bo iḻibu in mahaḷuk opat bo bayongan itoi tatua. Ki Adí in Domba tatua in nádon onda bo ain iratá. Pitu in tungoi-Nea bo pitu doman i mata-Nea. Tuata in Roho i Allah inta ain pinotabá-Nea kon bayongan dunia naa.

WAHYU 5:9

Mosia nopodondong in tobatú dondong mobagu, nanaa: “Iko in patus mogamá kon buk tatua bo moḷosi kon meterainea mita. Sin Iko ain iḻimod, bo dugú-Mu tatua, in pinoguboḻi-Mu kon intau nongkon bayongan suku, bahasa, negara bo bangusa sin ogoi kon i Allah.

WAHYU 6:16

Bo mosia in nomaḷú in noguman kon batu mita, “Bumbunaidon in kami! Bo bunidon kon i-Nia inta iḻimitú kon tampat pomomarentaan tatua bo nongkon torú Adí in Domba tatua!