WAHYU 21:4 - Alkitab Singog In Mongondow Masa In Tanaa

⁴ Paḻitandon i Allah in bayongan ḷuá kon mata monia. Diá bidon in popatoi. Diá bidon in mokoajar kon gina. Amui ande ombaḷ onu inta mokonakitpa kon gina in diá bidon. Soaḷ mita inta nokoyongandon ain noinggamá.”

WAHYU 21:4 ပူးပေါင်းရင်းမြစ်များ

MAZMUR 144:4

Intau tua in naonda bo tompot poginaan, naonda bo oḻinow noitaḻib, natua in kobiagannea.

YESAYA 25:8

Ki Tuhan Inta Totok in mokawasa in monginggamábí kon popatoi modapot in mononoi! Sia in momopatbí kon ḷuá nongkon bayongan in pogot, bo mopoyayú in kohohina inta binaba in umat-Nea kon sinangkub in butá. Ki Tuhan ain nosingog, bo tua in notantúbí kon mobaḻí.

YESAYA 30:19

Ei moiko inta nogutun kon Yerusalem, moiko in diábí tantú mongombaḷ. Ki Tuhan in monotabibí, bo ḷagidon motubag kon i monimu aka moiko mokuani mokituḷung kon i-Nia.

YESAYA 35:10

Intau mita inta pinoḷuat i Tuhan in mobuibí; mosia in tumuot kon kotá in Yerusalem takin giow, pogot monia in moḷumbá popisí in ḷunganga in gina inta mononoi. Mosia in moḷunganga in gina bo morame; robonoḷ in gina bo amui moinggamádon komintan.

YESAYA 51:11

Dá intau mita inta pinoḷuat i Tuhan in mobuidon mosia in tumuot kon Yerusalem takin rogiow pogot monia in motarimbuka popisí in ḷunganga inta mononoi. Mosia in mobarasanang bo morogiow, kinopatoian bo amui noinggamádon.

YESAYA 60:20

Kon inimu in oyúonbí in mata in singgai inta diádon tumoyo-toyop, bo buḷan inta diá kon dodai in onda in tumoyop. Sin Akuoi ki Tuhan in nobaḻí mononimbayag mononoi kon inimu wakutumu mononogumatoi in mopaḷutdon.

YESAYA 61:3

sin mobogoi in pia in gina bo ḷunganga in gina kon intau inta morobonoḷ in gina bo nonogumatoi; sin momaḷui kon inta mokoajar kon gina monia mobaḻí dondong dodayow. Mosia in nádon pangkoi in kayu tobatú inta pinomuḷa tontaní i Tuhan. Mosia in mogaidbí kon onu inta mopia bo mobanar, dá ki Tuhan in poḷantudon.

YEREMIA 31:12

Mosia in mamangoi in Tombuḷud in Sion takin pogot motamburiang, poḷat modondong takin pia in gina popisí in bayongan inta inogoi-Ku kon i monia, gandum, ḷana, anggur, sapi bo domba. Mosia in mobaḻídon naonda bo taman inta mobayong in tubignea, bo diábí kodaitan in onu bo onu.

YEREMIA 31:13

Kon dodai intua mongodeaga mita in motayok takin kinoibog in gina. Guyanga bo tayow mobiag tumpaḷa moḷunganga in gina, sin Akuoi in moḻipoibí kon i monia. Kuyang in gina monia baḷuian-Ku in pia in gina, robonoḷ in gina baḷuaian-Ku in ḷunganga in gina.

HOSEA 13:14

Bangusa tanaa in diábí posaḷamat-Ku nongkon kawasa in dunia in intau minatoi. Ei popatoi, ponimboidon in yampoimu! Aidaidon in oaidanmu inta mokorimumud tua! Akuoi in diá bidon motabi bui kon bangusa tanaa.

MATIUS 24:35

Ḷangit bo butá in moyoyangbí, táe singog-Ku naa in mononoibí.”

KORINTUS 1 15:26

Saturu pangabisan inta potungkudon i Allah in popatoi.

KORINTUS 1 7:31

bo intau inta umuran nobaḻí ki ata in onu inta kon dunia naa, yo donaaidon in sia moibog tonggataan in dunia naa. Sin dunia naa in motoyong bidon moyoyang takin kaadaannea masa in tanaa!

KORINTUS 2 5:17

Intau inta notobatúdon i Kristus in totu-totuu bidon sinoimbagu. Inta ain nokoyongan in diá bidon, komintan bidon sinoimbagu.

KORINTUS 2 6:17

Manangka intua, taḷaaidon in intau mita inta diá nonotaau kon i Allah, bo pokopoyayúdon in moiko kon i monia. Donaaidon moibog moḻiai kon onu inta diá mopia, aka natua in moiko, yo tarimaan-Kubí.

IBRANI 12:27

Tosingogon “komintanpa doman” mogumanbí kon bayongan in dunia inta ain pinomia naa in dandúon bo ḷumbúon, sinbá dongkadon inta diá modandú in kotaḷáan.

PETRUS 2 3:10

Táe Singgai koangoian i Tuhan in diábí butungonmai, sin naondabí bo koangoi in mononakow. Kon singgai tatua ḷangit moyoyang takin gotup inta totok in mokoondok, bo onukadon in kon ḷangit modaitbí mopokak, natua doman in butá bo bayongan in tombonunea modait doman moinggamá.

YOHANES 1 2:17

Dunia naa bo bayongan tombonunea inta kinoibog in intau koyogotdon in moyoyang. Táe intau inta dinumudui kon ibog i Allah, i mobiagbí mononoi.

WAHYU 20:13

Bo dagat noposarakan domandon in intau mita inta kon bonunea. Popatoi bo dunianea in noposarakan doman in intau mita minatoi inta kon i monia. Bo intau minatoi mita tatua in komintan pinopoḷabúan in hukuman pinodudui kon oaid monia.

WAHYU 20:14

Onda intua popatoi bo dunianea in pinogambat kon bonu in dagat in tuḷu. (Dagat in tuḷu tanaa in kopatoian inta induanea.)

WAHYU 21:1

Bo akuoi in nokoontong kon ḷangit mobagu bo butá mobagu. Ḷangit bo butá inta muna in diádon, takin dagat in noinggamá domandon.

WAHYU 22:3

Kon bonu in kotá tatua diá bidon in kotugatan kutuk i Allah. Tampat pomomarentaan i Allah bo i Adí in Domba tatua in kon bonudon in kotá tatua. Bobantung-Nea mita moibada kon i-Nia.

WAHYU 7:17

Sin ki Adí in Domba inta iḻimitú kon tampat pomomarentaan tatua in mobaḻí gombala monia, bo diaan-Nea in mosia mayá kon bokaká in tubig inta mokobiag. Bo inggamáandon i Allah in bayongan ḷuá kon mata monia.”