WAHYU 17:4 - Alkitab Singog In Mongondow Masa In Tanaa

⁴ Bobay tatua nogi ḷambung in ḷambung nopars bo nopura noguyang, bo iḷambáan in buḷawan mita, permata bo mutiara. Sia in kokada-kadai in tobatú palo buḷawan inta nopuḻing in soaḷ mita inta moraat bo mokotor, bungai mita in aid monia inta mongokotor.

WAHYU 17:4 ပူးပေါင်းရင်းမြစ်များ

DATU MITA IMITÁNEA 14:24

Kon tampat mita tatua mosia sumundaḷ sin mosumba kon dewa. Nodapot in ḷoḷaki mita mopobayá doman in oaidan nobaḻí sundaḷ. Intau in Yohuda nomia kon bayongan oaidan inta moromú inta pinomia in bangusa mita inta ain pinoguntun i Tuhan kon dodai in intau in Israel tumuotdon kon butá tatua.

DATU MITA 2 21:2

Ki Manasye in binaradosa kon i Tuhan, sin dinumudui kon kabiasaan mita inta moraat in bangusa mita inta pinoguntun i Tuhan nongkon Kanaan kon dodai intau in Israel sinumuot kon butá tatua.

EZRA 9:11

inta inogoi-Mu kon inami pinongin nabi, mogogundoi-Mu mita. Mosia in nopotaau kon inami kon butá inta bain pogutunan nami in diá nodarit popisí in bayongan intau inta nogutun kon tua nongkon popod tobatú nodapot in popod ibanea in nogaidon kon inta mokotor bo inta moraat.

YESAYA 66:3

Táe bangusa tatua in mogaid kon onu in koibog monia; mopia in gina monia kon pooibada inta mokorongó. Kon i monia diábí in yoposinea: mopokuruban in sapi koḷakian bo mopokuruban in intau, mopokuruban in ki adí in domba bo momutoḷ kon sigogow in ungkú; moposumba in gandum bo mopokuruban in dugú in boké, motubá kon kamania bo mosumba kon patong.

YEREMIA 51:7

Babel inta koina in naonda bo galas buḷawan inta kinadaian-Ku bo nokopopisí kon bayongan inta kon dunia noḷoḷangu. Bangusa mita in nonginum kon anggur nongkon galas tatua, dá mosia in nobaḻídon nobundai.

OMBAḶ 1:9

Kinononajisnea in noniatadon táe diábí pinandungneamai in onu inta ain nobaḻí kon inia. Motoyang totok in kinoumpagannea, táe diábí tobatúmai in nopoḻipoi kon inia. Dá nopoigum in sia kon totabi i Tuhan, popisí in musungnea mita in nountungdon.

YEHEZKIEL 20:30

Dá potaaudon kon intau in Israel in onu inta pinotaau-Ku kon i monia, Akuoi ki Tuhan Inta totok in moḷantud. ‘Nongonu sin moiko in nomiabí kon dosa mita ná inta pinomia in mogoguyangmu? Ná mosia, moiko in dinumudui doman kon berhala mita inta mokorongó tua.

YEHEZKIEL 24:11

Tanaa ukatdon in kuyon porunggu inta diá in bonunea kon tudu in tuḷú bo pomayádon mako modapot in mopura monombaga. Naonda in mopokak in kaḻiotánea, modaritdon bui in kuyon tatua podudui in atorang in agama.

YEHEZKIEL 24:13

Ei Yerusalem, oaidmu mita inta mokotor noponajisdon kon awakmu. Sinungkuḷan-Kudon dinaritan in iko, táe diá in mangaḻenea, sin iko in umuranbí nonajis. Iko in diábí modarit bui modapot in poḷuaion-Ku in torú-Ku kon inimu.

YEHEZKIEL 28:13

Pogogutunanmu in kon Eden, taman i Allah. Pakeangmu iḷambáan in noyagi-yagimai in permata: batu delima bo intan, topas, batu pirus, batu yakut, ratna, cempaka, batu nilam, zamrud bo batu alkali nopura. Ḷambá buḷawanmu in mobayong doman. Pakakat mita tatua in pinomia kon inimu kon singgai iko binaḻí.

YEHEZKIEL 36:25

Mopaḷut mako kon tua moiko in pisikan-Ku in tubig inta mosilang, sinbá modaritdon nongkon bayongan in berhalamu bo nongkon bayongan yagi-yagi inta ain nokokotor kon i monimu.

DANIEL 11:38

Noyotoḻikudon intua, sia in mohoromatbí kon dewa inta diápa kon dodai in onda in sinumba in mogoguyangnea, ná dewa moḷoḷukad kon tondok dinding mita. Sia in moposumbabí in buḷawan, saḷaka, permata bo sosumba mita inta nopia totok ibanea kon dewa inta diápa kon dodai in onda in sinumba in mogoguyangnea.

HOSEA 9:10

Ki Tuhan in noguman, “Kon tungkuḷ in Akuoi dungkuḷ nokouḻí kon Israel, nopia in gina-Ku naonda bo intau nokouḻí kon bungai in anggur kon padang gurun. Kon tungkuḷ in Akuoi dungkuḷ nokoontong kon mogoguyangmu, nopia totok in gina-Ku naonda bo intau inta nokoontong kon bungai in ara inta dungkuḷ. Táe, kon dodai in mosia minayá in Buḷud in Peor, mosia in nomangkoidon nosumba kon Baal, dá nonajisdon in mosia naonda bo dewa inta kinoibog monia tatua.

ULANGAN 29:17

Moiko ain nokoontong kon patong mita berhala monia inta mokorongó nongkon kayu, batu, saḷaka bo buḷawan.

WAHYU 14:8

Malaekat induanea in dinumudui kon malaekat inta muna bo sindaḷan mopobaḷú, “Ain noḷabú! Kotá in Babel inta moḷoben tatua ain noḷabú! Sia inta ain nopoḷoḷangu kon bayongan in bangusa takin tubig in anggur – tuata in anggur nongkon ibognea inta mokotor!”

WAHYU 18:12

Diádon in motaḷui kon buḷawan, saḷaka, permata bo mutiara monia; kaeng moaḷus inta momahaḷ, kaeng nopars, kaeng sutra, bo kaeng inta nopura nogurang; bo norupa-rupamai in bahan inta nongkon kayu inta moḷawádon mouḻí, norupa-rupamaidon in bahan inta nongkon gading, norupa-rupamai domandon in bahan inta pinomia nongkon kayu momahaḷ, inta nongkon tambaga, nongkon uatoi, bo nongkon batu permata.

WAHYU 18:16

poḷat mosingog, “Adodoia kaasí, totokdon moḷoben in bodito in kotá inta moḷoben tanaa! Biasamai mogiḷambung in sia nongkon kaeng inta moaḷus, kaeng nopars, bo kaeng nopura inta noguyang; biasamai sia nopuḻing in ḷambá buḷawan, permata, bo mutiara!

WAHYU 19:2

Sin pohohakim-Nea in moadil bo mobijaksana! Sia ain nopoḷabú in hukuman kon sundaḷ moḷoben, inta nomoguyaat kon dunia naa takin aidnea inta mokotor. Ki Allah ain nohukum kon sundaḷ tatua, sin sia in noḻimod kon intau mita inta nogaid kon oaidan i Allah.”

WAHYU 21:21

Ngara mopuḷú bodoyowá tatua in mutiarabí inta mopuḷú bodoyowá doman. Pomuḷoi in ngara pinomia nongkon mutiara tobatú doman. Daḷan kon kotá tatua in pinomia nongkon buḷawan taakan, nosilang naonda bo kaca inta mopouḻi-uḻinag.

WAHYU 9:21

Mosia in diápa doman mogogai in moḻimod, monggaing, mogaid kon inta diá patus aidan bo monakow.