WAHYU 11:19 - Alkitab Singog In Mongondow Masa In Tanaa

¹⁹ Dá nobukatdon in Baḷoi Allah kon soroga, bo kinoontongandon in Poti Dodandian kon bonunea. Bo nongilatdon moyo-moyodudui bo gonugur in gotup inta modowawá mako, takin doman ḻinug bo uyan eis inta totok morogot.

WAHYU 11:19 ပူးပေါင်းရင်းမြစ်များ

MAZMUR 105:32

Sia in nopoonag in uyan eis, bo nopoangoi in kilat inta monampí magí mako.

MAZMUR 18:12

Sia in nopongaḷumbun in sindip; goḷom morondí inta mobunod iḻimibu kon i-Nia.

YESAYA 28:2

Ki Tuhan in mopotabábí mangoi kon intau tobatú inta moropot bo motorindog. Koangoinea in naonda bo deḷang kotaki-takin in uyan eis, naonda bo uyan morogot bo ḷunud inta mokoiḻig. Pongin ropotnea pogambatnea in mosia kon butá.

YESAYA 29:6

Ki Tuhan Inta Totok in mokawasa mopoḷuatbí in kotá tatua pongin deḷang bo ḻinug inta motoyang totok. Sia in mopoangoibí in deḷang bo tuḷú inta tumagab.

YESAYA 30:30

Ki Tuhan mopodongogbí in singog-Nea inta momulia, bo pomuḷoi in intau in mokorasabí kon kawasa-Nea inta motoyang. Torú-Nea in mokopoangoibí kon tuḷú inta mokopokak, uyan morogot, uyan batu bo deḷang.

YESAYA 32:19

Totuu mosanang in moiko komintan sin tugat in tubig kon pinomuḷamu, bo bobiagonmu in kon ondakabí in bayáannea pongaanan takin diá in monuyayow. Táe musungmu in nádon onda bo kayuon inta inonag in uyan batu bo kotá monia in rumbunon.

YEHEZKIEL 13:11

Ei nabi mita inta deeman totuu nabi, dindingmu in moumpagbí. Poangoi-Kubí in uyan morogot. Dinding tatua in dangatanbí in deḷang bo onagon in uyan eis

YEHEZKIEL 13:13

Ki Tuhan Inta Totok in moḷantud noguman, “Kon bonu in torú-Ku, Akuoi in mopoangoi in deḷang, uyan morogot bo uyan eis sin morimumud kon dinding tatua.

YEHEZKIEL 38:22

Sia in hukumon-Kubí in yampoi in takit bo mosiḻimodan. Uyan morogot bo uyan in eis, tuḷú bo balerang in popobutak-Kubí kon inia bo kon tontaranea bo kon mobayong in bangusa inta dinumugang kon inia.

PINOGIAPAN 10:33

Naonda in bangusa Israel nonaḷámai kon Sinai, buḷud i Tuhan, mosia in minayá toḷu nosinggai in koonggotnea. Poti Dodandian i Tuhan umuran diaan pouna kon i monia sin motayak kon tampat pononḷoḷaigan kon i monia.

PINOGIAPAN 4:15

Ki Tuhan noguman kon i Musa bo kon i Harun, “Kon dodai in moiko mongokai kon ḷoḷaigan, ki Harun bo ki adínea mita musti tumuot kon bonu in ḷoḷaigan-Ku bo mongoḷob kon bayongan in pakakat bo touḷutnea mita inta kon tua. Bo mopaḷut mako kon tua, intau mita i Kehat motaaudon mamangoi bo mogamá kon tua. Táe mosia in diábí motaau moindoi, dimiug andeka moḻiai kon pakakat mita tatua, sin aindon sinondí kon i-Nakó. Aka aidan doman monia intua, yo matoi in mosia. Dá, bá intau mita in Kehat tatua diá moyopú nongkon sigad in suku Lewi, dá ki Harun bo ki adínea mita in musti monantú kon onu in motaau diaan monia kon batúannea. Tuata in oaidan intau in Kehat kon dodai in Ḷoḷaigan-Ku pampingon. Ki Eleazar, adí i Harun, in kitogi totaau kon bayongan Ḷoḷaigan-Ku, ḷana in togá, dupa, kuruban gandum inta baḻíon kuruban oḷudon, ḷana upacara bo bayongan inta kon bonu in Ḷoḷaigan-Ku tatua.”

PINOGIAPAN 4:5

Ki Tuhan nobogoi in atorang tanaa kon i Musa: Aka wakutuneadon mongokai kon ḷoḷaigan, yo ki Harun bo ki adínea mita in musti tumuot kon Ḷoḷaigan i Tuhan, moḻitod kon toḷipoi inta kon tayowon in Poti Dodandian, bo pongoḷob kon poti tatua.

YOSUA 10:11

Kon tungkuḷ in intau mita in Amori nosiḻig kon buḷud tatua sin moḷagui nongkon tontara mita in Israel, ki Tuhan nopoḷabú in uyan eis inta moḷoben nongkon ḷangit kon i monia kinoouputbí in daḷan nodapot kon Azeka. Inta minatoibí kinoḷabúan in uyan eis in mobayo-bayong nongkon inta iḻimod in intau mita in Israel.

WAHYU 11:13

Dá dodai intua nobaḻídon in ḻinug inta totok in moropot. Bo sepersepulú nongkon kotá tatua norimumud. Pitu noribu intau minatoi wakutu in ḻinug tatua. Intau mita ibanea in totokdon in noondok, dá nodayowdon in mosia kon koḷoḷoben in kawasa i Allah inta kon soroga.

WAHYU 11:15

Bo malaekat impitunea in nogirup kon torompetnea, dá kinodongogandon in singog mita inta mongoḷangon totok nongkon soroga noguman, “Kawasa momarenta kon dunia naa, masai naa kinadaiandon i Tuhan naton, bo i Datu mopoposaḷamat inta pinodandi-Nea. Sia bidon in momarenta modapot in mononoi!”

WAHYU 12:1

Bo kinoontongandon kon ḷangit in tobatú tanda mokoherang inta totok in motoyang. Tobatú bobay inta nopogiḷambung mata in singgai, simindog mako kon tudu in buḷan. Kon uḷunea oyúon in bandow inta pinopobandangan in tundi mopuḷú bodoyowá.

WAHYU 16:1

Bo akuoi in nokodongog kon singog moḷoben nongkon bonu in Baḷoi Allah noguman kon malaekat pitu tatua, “bayádon bo pobutakdon bonu in palo in torú i Allah inta pitu tanion kon tudu in butá!”

WAHYU 16:18

Bo nongilatdon moyo-moyodudui bo gonugur in gotup mokoondok totok, bo ḻinug inta totok in motoyang. Diápa dodai onda in noḻinug námai tua in koropotnea, mulaipamai dunia naa pinomia. Tua in ḻinug inta totok in motoyang!

WAHYU 16:21

Uyan eis moḷoben, inta toḷoḻima nokilo in kosibuḷnea, noḷabú nongkon ḷangit bo noidantug kon intau mita. Dá mosia in nohojat kon i Allah popisí bodito uyan eis inta totok in motoyang tua.

WAHYU 19:11

Noiduduimai kon tua inontongku in soroga nobukat, bo inontongku oyúon in tobatú kabaḷo nobudó. Ki inta sinumakoi kon kabaḷo tatua, tangoinea ki Mosatia bo ki Mobanar. Sia in moadilbí in monantú kon hukuman bo kon parang.

WAHYU 4:1

Nopaḷut mako intua nanaa in bui inontongku. Inontongku in tobatú ḷoḻingkop nobukat kon soroga. Bo dinongogkudon bui in singog inta noguman kon inakó koina inta naonda bo singog in torompet. Singog tatua in noguman, “Poponikdon mangoi kon naa, bá popoontong-Kudon kon inimu onu in mobaḻí kon singgai moiduduimai.”

WAHYU 4:5

Nongkon tampat pomomarentaan tatua noisindar magí in kilat bo iḷumuai in singog in gotup inta moyo-moyodudui. Bo kon tampat pomomarentaan tatua oyúon in poḷombow pitu inta koyongki-yongkit; tuata in Roho i Allah taya pitu.

WAHYU 7:15

Manangka intua mosia in sinimindog kon tayowon pomomarentaan i Allah, bo moibada kon i-Nia doḷom bo singgai kon bonu in Baḷoi Allah. Bo Sia inta iḻimitú kon tudu in tampat pomomarentaan tatua in mamangoi kon yua-yuak monia bo mogoḻiung kon i monia.

WAHYU 8:5

Nopaḷut mako kon tua malaekat tatua in nogamá kon tampat pototubáan kon kamania bodongka binonuannea in tuḷu inta nongkon tampat pobobogoian kon sosumba. Nopaḷut mako pinogarabnea kon butá naa. Dá totokdon nonggotup bo nongilat inta moyodudu-duduimai bo nobaḻídon in ḻinug.

WAHYU 8:7

Malaekat muna in nogirup kon torompetnea, dá uyan in eis bo tuḷu noyobauk in dugú norogot totok noḷabú monag kon butá. Bo sepertiga in dunia naa nodait nopokak, ná doman tua, sepertiga doman in kayu bo bonok in noḷaḷow.