ULANGAN 7:1 - Alkitab Singog In Mongondow Masa In Tanaa

¹ “Ki Tuhan Allahmu in modiabí kon i monimu mayá in butá inta bain pogutunan monimu, bo mobayongbí in bangusa inta poguntunon-Nea nongkon tua. Koonto-ontongmubí in Sia moguntun kon pitu in bangusa inta moḷobe-ḷoben bo moropo-ropot nongkon i monimu, tuata in intau mita in Het, Girgasi, Amori, Kanaan, Peris, Hewi bo Yebus.

ULANGAN 7:1 ပူးပေါင်းရင်းမြစ်များ

DATU MITA IMITÁNEA 16:31

Diápa doman tugat kon inia in mobiag momia kon dosa naonda bo ki Datu Yerobeam, sia in notonibuḷoidon i Izebel ki adí i datu Etbaal inta nongkon Sidon, bo nosumbadon in sia kon i Baal.

TAWARIKH 1 1:14

Ki Kanaan in mogoguyang doman in intau in Yebusi, Amori, Girgasi,

TAWARIKH 2 8:7

Bayongan in buí in bangusa in Kanaan inta diá motaau ḻimodon komintan in intau in Israel kon dodai in iḻimitú kon butá tatua, pinoki aidan i Salomo nobaḻí ata. Mosia tua in intau in Het, Amori, Peris, Hewi bo Yebus. Umaai in tanaa mosia tua in umuranpa doman ata.

EZRA 9:1

Naonda intua komintan nodaitdon inaidan, tongonumai in intau inta sinon itoi kon bangusa in Israel namangoi kon inakó. Mosia in nopotaau kon inakó kon rayat in Israel, noitakin doman in imang mita, bo intau mita in Lewi in diábí sinumondí kon bangusa mita inta nogutun kon diugmai tua, inta bangusa in Amon, Moab, Mesir, Kanaan, Het, Peris, Yebus bo Amori. Nodapotbí in imang mita bo intau mita in Lewi sinumakin doman nomia kon natua. Mosia komintan in nogaidon kon aid mita inta mokorongó inta inaidan in bangusa mita tatua.

NEHEMIA 13:23

Kon tungkuḷ intua inontongku doman kon nobayong intau in Yahudi in notonibuḷoidon in bobay mita nongkon bangusa in Asdod, Amon bo Moab.

MAZMUR 78:55

Kon tayowon in umat-Nea Sia nopoguntun in intau inta nogutun kon tua bodongka sinila-silai-Neadon in butá tatua kon bayongan in suku in bangusa in Israel, umat-Nea, dá mosia in motaaudon mogutun kon ḷoḷaigan mita in musung.

IḶUAIAN 15:7

Takin kawasa-Mu inta moḷoben iyompat-Mu in bayongan inta momusung kon ini-Mu. Torú-Mu nodokot ná tuḷú, bo nomokak kon i monia naonda bo pangkoi in payoi.

IḶUAIAN 23:28

Musungmu mita in potombaukon-Ku, bo bangusa mita in Hewi, Kanaan bo Het untunon-Ku nongkon tayowonmu sinbá moiko in motaaudon mongingguput kon bobayáan.

IḶUAIAN 23:32

Dika mogaid kon dodandian takin intau mita tatua ande takin ilah mita monia.

IḶUAIAN 23:33

Dika pomayá mako monimu intau mita tatua mogutun kon butámu, sinbá moiko diá moidudui kon i monia mosumba kon ilah mita monia bo baradosaandon kon i-Nakó. Aka moiko mosumbadon kon ilah mita monia, yo moiko in noituotdon kon poyogaḷap inta mokopatoi.”

IḶUAIAN 33:2

Potabá-Kudon mangoi in malaekat tobatú sin modia kon i monimu. Untunon-Kubí in bangusa Kanaan, Amori, Het, Peris, Hewi bo Yebus.

IḶUAIAN 6:8

Bayongan koyow i Tuhan tatua pinotaau i Musa kon bangusa Israel, táe mosia in doí mopandungmai kon i Musa, sin pinononggataan inta totok in moraat tatua ain nokoinggamádon kon kamang monia.

IMAMAT 14:34

in atorang mita soaḷ baḷoi inta kinodakitan in ponopadan inta ḷumekep. Atorang mita tanaa pinaké naonda in bangusa Israel sinumuot kon Kanaan, butá inta inogoi i Tuhan kon i monia.

PINOGIAPAN 13:29

Intau in Amalek nogutun kon dotá in toḷatan butá tatua; Intau in Het, Yebus bo Amori nogutun kon buḷud; bo intau in Kanaan in nogutun kon butá inta kon bingkí in dagat bo kon bingkí Ongkag in Yordan.”

PINOGIAPAN 14:31

Moiko ain noguman kon ki adí mita monimu in dakopon. Táe mosiabí tuata in diaan-Ku mayá in butá inta kinodoí monimu tua, bo butá tatua in mobaḻídon butá inta kobiagan monia.

OUMAN IN RASUL MITA 13:19

Bo pitu nobangusa in pinutúan-Nea kon butá in Kanaan tatua sin mosila-silai mako kon butá tatua kon bayongan in intau Israel sinbá mobaḻí kapunyaan monia.

ULANGAN 11:29

Naonda in ki Tuhan Allahmu nodia kon i monimu sinumuot kon butá inta pogutunan monimu kon singgai moiduduimai, barakat tatua musti singogon monimu nongkon Buḷud in Gerizim bo kutuk tatua in kon Buḷud in Ebal. (

ULANGAN 20:1

“Aka moiko mayá moparang moḷawang kon musungmu mita, dika moondok in mokoontong kon kereta in parang bo kabaḷo monia inta mobayong takin tontara monia inta noiḻiu in kobayongnea nongkon i monimu. Ki Tuhan Allahmu inta nopoḷuai kon i monimu nongkon Mesir, in motuḷungbí doman kon i monimu.

ULANGAN 20:16

Táe aka kotá tatua kon bonu in butá inta inogoi i Tuhan Allahmu kon inimu, yo bayongan in intau inta nogutun kon tua musti yopúdon.

ULANGAN 31:20

Mosia in diaan-Ku kon butá inta nooyúon bo mopia, ná inta pinodandi-Ku kon mogoguyang monia. Kon tua in mosia mobiag mosanang bo mokouḻí kon bayongan kaanon inta paraḷuon monia. Táe moiduduimai kon tua mosia in monoḻikudon bo mosumba kon ilah mita ibanea. Mosia in mondoídon kon i-Nakó bo monoḻikudon kon dodandian-Ku,

ULANGAN 31:3

Ki Tuhan Allahmu tontaní in mayá kon munamu bo moyopú kon bangusa mita inta nogutun kon tua, dá moiko in mokoḻitúdon kon butá monia. Ki Yosua in mobaḻí itoimu, ná inta pinoguman i Tuhan.

ULANGAN 4:38

Bangusa mita inta moḷobe-ḷoben bo moropo-ropot pinoguntun-Nea nongkon tayowonmu, sin mogatod kon i monimu mayá in butá monia inta inogoi-Nea kon inimu, butá inta masai naa nobaḻídon kapunyaanmu.

ULANGAN 6:1

“Ki Tuhan Allahmu in nopotabá kon inakó motundú kon bayongan hukum tanaa kon inimu sinbá aidan monimu kon butá inta diádon moonggot bo bayáan monimu pogutunan.

ULANGAN 6:10

“Ki Tuhan Allahmu nodandi kon mogoguyangmu ki Abraham, ki Ishak bo ki Yakub kon Sia in mobogoibí in butá tatua kon inimu. Kotánea mita moḷoben bo mopia, bo deemanbí moiko in noposindog intua.

ULANGAN 6:19

bo moiko in moguntunbí kon musungmu mita ná inta pinodandi i Tuhan.

ULANGAN 6:23

Iḷuat-Nea in kita nongkon Mesir, sin diaan-Nea mangoi in naa in kita, bo butá tanaa inogoi-Nea kon i naton ná inta pinodandi-Nea kon mogoguyang naton.

ULANGAN 9:1

“Indongogai Utat mita! Singgai naa moiko ḷumoḷandon kon Ongkag in Yordan sin mayá ḻimitú kon butá in bangusa mita inta moḷobe-ḷoben bo moropo-ropot nongkon i monimu. Kotá mita monia mongoḷoben bo dininding nodapot in ḷangit.

ULANGAN 9:3

Táe tanaa, ontongonbí monimu tontaní naonda in ki Tuhan Allahmu mayá kon muna monimu naonda bo tuḷú inta mokopokak. Sia in monaḷowbí kon i monia kon tayowonmu, dá kountunan bo koyopúanbí monimu in mosia motoyong ná inta pinodandi i Tuhan.

ULANGAN 9:4

Naonda in ki Tuhan Allahmu mopoguntun kon i monia kon tayowonmu, dikabí morai kon moiko in dinia-Nea minayá intua sin pobogoian kon butá tatua popisí in moiko mopia bo nogaidon kon onu in kinoibog i Tuhan Allahmu dá patusdon in moiko motarima kon tua. Deemanbí natua! Ki Tuhan nopoguntun kon bangusa mita tatua kon tayowonmu sin moraat in mosia. Pinomayá mako i Tuhan in moiko mogamá kon butá monia, sin Sia moibog mogintompod kon dandi-Nea kon mogoguyangmu ki Abraham, ki Ishak bo ki Yakub.

YOSUA 11:3

Sia in nopotabá doman in intau minayá kon intau in Kanaan inta kon dotá in toyopan bo kon dotá in pomukaan kon Yordan, kon intau in Amori, Het, Peris, bo intau in Yebus inta kon buḷud mita, bo kon intau in Hewi kon sipangkoion in Buḷud in Hermon kon butá in Mizpa.

YOSUA 24:11

Onda intua moiko iḷumoḷan kon Ongkag in Yordan, bo nodapot kon Yerikho. Intau mita in Yerikho nonubu kon i monimu, natua doman intau in Amori, intau in Peris, Kanaan, Het, Girgasi, Hewi bo intau in Yebus. Táe Akuoi nopountung kon i monimu nongkon i monia komintan.

YOSUA 3:10

Aka moiko mayádon monubu, yo notantú bidon kon untunonbí i Tuhan in intau in Kanaan, Het, Hewi, Peris, Girgasi, Amori bo Yebus. Bo kon dodai in Poti Dodandian i Tuhan inta nomaḻí kon dunia naa ḷumoḷandon kon Yordan umuna kon i monimu, yo ontongondon monimu kon ki Allah inta nobiag in kon yua-yuakdon monimu.