ULANGAN 32:4 - Alkitab Singog In Mongondow Masa In Tanaa

⁴ Ki Tuhan in mododuḷumu inta moroton, oaidan-Nea in motonggimok, bo bayongan daḷan-Nea in motuḻid. Ki Allahmu in mosatia, diábí in tombogá kon i-Nia, Sia in nogaid kon onu inta mopia bo totuu.

ULANGAN 32:4 ပူးပေါင်းရင်းမြစ်များ

KINOBAḺIAN 1:31

Ki Allah in inimindoi kon bayongan inta ain pinomia-Nea tatua, bo nopia totok in gina-Nea. Doḷom noitaḻib bo namangoidon in doḷo-doḷom. Tuata in singgai inggonomnea.

KINOBAḺIAN 18:25

Donaaidon intau mita inta diá kotaḷá tua poyoyanúon ḻimodon takin intau mita inta kotaḷá. Donaai kaasí Tuhan! Sin aka aidan i Tuhan intua, yo intau inta diá kotaḷá tua in pasti hukumon doman moyotakin in intau mita inta kotaḷá. Umpaka hakim in dunia naa mogaid kon inta diá moadil!”

SAMUEL 2 22:47

Ki Tuhan in nobiag! Dinayo-dayowdon in mototuḷungku! Poḷantudon in ki Allah, mopoposaḷamatku!

SAMUEL 2 23:3

Ki Allah i Yakub ain nosingog; kon inakó moḷoḷukad in Israel in noguman: “Datu inta nomarenta kon rayat takin moadil inta nonongganut takin toindudui kon i Tuhan,

TAWARIKH 2 19:7

Moiko in mustibí motoguondok kon i Tuhan, bo mokopopia in mopobayá, sin ki Tuhan Allah naton in doíbí kon intau mita inta diá moadil, inta mobogat kon toḷosi andeka inta motarima kon bogoi pomompon kon bibig.”

NEHEMIA 9:8

Nouḻí-Mu in sia umuran mosatia kon ini-Mu bo motoindudui. Bo inaidan-Mu takinnea in dodandian inta moroton. Butá in Kanaan, Het bo Amori, butá in Peris, Yebus bo Girgasi, tua komintan in ogoi-Mu kon inia; mobaḻí pogogutunan in bayongan buínea. Noiduduimai inintompodan-Mu in dandi tatua kon inia, sin Iko in moadil bo mosatia.

AYUB 34:10

Ei intau mita inta moarip, indongogai! Umpaka dá ki Allah Inta mokawasa totok mogaid kon moitaḷá?

AYUB 35:14

Ayub, apadoman aka iko in moguman kon iko in diá nokoontong kon i-Nia, bo pelekaramu in kon tayowon-Neadon bo iko in mogoḷat mako kon i-Nia!

AYUB 36:23

Ki ine in motaau monantú kon daḷan kon i-Nia andeka mokobaḻí in moguman kon Sia in nogaid kon noitaḷá?

AYUB 8:3

Ki Allah in diábí kon dodai in onda in momelung kon koadilan; diábí kon dodai in onda in diá mokoposindog kon inta mobanar.

MAZMUR 100:5

Sin ki Tuhan tua in mopia; tabi-Nea in mononoi, bo kososatia-Nea in modapot in adí bo ompu.

MAZMUR 138:8

Iko in mogintompodbí kon dandi-Mu kon inakó; dikabí mogogai in motuḷung kon umat-Mu.

MAZMUR 145:17

Ki Tuhan in moadil kon bayongan onu in oaidan-Nea bo nopuḻing in tabi kon bayongan in aid-Nea.

MAZMUR 146:6

Siabí inta ain nomaḻí kon ḷangit bo butá, dagat bo bayongan in tombonunea; Sia in umuranbí mosatia modapot in mononoi.

MAZMUR 18:2

Akuoi in motabi kon ini-Mu, o Tuhan, Ikobí in nobaḻí ropotku.

MAZMUR 18:46

Barani monia in noinggamádon; nourot in mosia bo iḻumuai nongkon poḷoḷukadan monia.

MAZMUR 19:7

Sia in noḻibu kon ḷangit nongkon popodnea tobatú nodapot in popodnea ibanea; diábí in kotaḻiban in patúnea.

MAZMUR 31:5

Poḷuatdon in akuoi nongkon potait inta sinaan kon inakó, sin Ikobí in pogogadopanku.

MAZMUR 33:4

Bayongan in tosingogon i Tuhan in totuubí; Sia in mosatiabí kon bayongan in oaidan-Nea.

MAZMUR 78:35

Mosia in nokotorop kon ki Allah in moḷoḷukad monia, bo ki Inta Totok in moḷantud in mopoposaḷamat monia.

MAZMUR 9:16

Bangusa mita inta diá nonotaau kon ini-Mu notopak kon bubú inta kinaḻi monia tontaní; mosia in noibaaḷ kon pukot monia tontaní.

MAZMUR 90:16

Poontongdon kon inami inta pinomia-Mu kon inami mogogundoi-Mu mita, bo kawasa-Mu inta mogaga kon buí nami.

MAZMUR 92:15

pangkoi in kayu inta tantúpa nomungai umpaka nogurangdon, umuran noḷunow bo notompia.

MAZMUR 97:2

Sia in iḻipung in goḷom bo sindip; kooadil bo hukum in nobaḻí dodoyonan in pomarentaan-Nea.

MAZMUR 98:3

Kinotoropan-Nea in tabi bo kososatia-Nea kon Israel, umat-Nea. Bayongan in bangusa kon sinangkub in butá ain nokoontong kon kinountungan i Allah naton.

MAZMUR 99:4

Kawasa in kon ini-Mu, datu inta motabi kon hukum; Iko in noposindogdon in inta mobanar; Iko in nopobayá in hukum bo kooadil kon Israel.

IḶUAIAN 34:6

Onda intua ki Tuhan sinumaḻib kon tayowon i Musa bo noguman, “Akuoi ki Tuhan, in ki Allah inta nopuḻing in pia in gina bo tabi. Tabi-Ku mobarong totok, Akuoi naa in motoḷutui bo diá ḷagi tumorú.

MOHOHUTUBA 3:14

Kinotaauanku kon bayongan inta inaidan i Allah in tantúbí mononoi. Intau in diábí motaau modugang andeka monggaat kon tua. Tua in inaidan i Allah sinbá kita in motoguondok kon i-Nia.

YESAYA 17:10

Israel, iko in nokoḻiongdon kon i Allah inta noposaḷamat bo noḷukad kon inimu naonda bo buḷud batu inta moroton. Noyoḻiu kon tua, iko in nomuḷadon kon gobá mita sin ogoi kon dewa mita.

YESAYA 25:1

Tuhan, Ikobí in ki Allahku, poḷantudonku in Iko bo dayowonku in tangoi-Mu. Sin oaidan-Mu mita totok in mokoherang; Nongkon dungkuḷmai Iko in nonomayá, bo umuran mosatia in Iko in nogaid kon tua.

YESAYA 26:4

Umurandon popirisaya kon i Tuhan, sin ki Tuhan Allah tantú moḷukad kon i naton.

YESAYA 28:16

Tuamai, ki Tuhan Inta Totok in moḷantud noguman nanaa, “Akuoi in mogukat kon dodoyonan inta moropot bo motorindog kon Sion; batu orotan tobatú inta moḷoben in mangaḻenea inta pinaisan: ‘Ki ine in morigon in pirisayanea, diábí umundok popisí in taḷowon.’

YESAYA 30:18

Umpaka natua, ki Tuhan in mogoḷatbí mako kon wakutunea mopoontong in totabi-Nea kon inimu. Sia in tantúbí nosadia in monotabi kon inimu. Sin ki Tuhan in Allah inta nogaid kon onu inta noitutui. Pia in kamang in intau inta inumandoḷ mako kon i-Nia.

YESAYA 32:2

Kon batúannea mosia in naonda bo tampat pogogadopan kon tompot bo deḷang. Mosia in naonda bo ongkag inta moiḻig kon rawang in bungaion, naonda bo batu moḷoben pononiungan kon butá inta noḷogatdon.

YEREMIA 10:10

Táe Iko, Tuhan, Allah inta mobanar, Ki Allah in mobobogoi in kobiagan, datu mononoi. Aka Iko tumorú, modandú in dunia, aka Iko rumogi yo bangusa mita in diábí mokotongod. (

YEREMIA 9:24

Ki ine in moibog mopoyunggaga in onuka, yo mustibí moyunggagá sin sia in nonotaaudon bo nomangaḻedon kon i-Nakó; bo kinotaauanneadon kon tabi-Ku modapot in mononoi bo Akuoi in moposindogbí in hukum bo inta moadil kon dunia. Tua komintan in mokosanangbí kon gina-Ku. Akuoi, ki Tuhan, inta ain noguman kon tua.”

DANIEL 4:34

Naonda in pitu notaong inta sinantú tatua noitaḻibdon, iḷumangag in akuoi kon ḷangit, bo nosadardon bui in ginaku. Dá dinayowku in ki Allah Inta Totok in moḷantud. Inuntu bo pinomuliaku in Sia inta nobiag mononoi tua. “Ki Allah in mobaḻí datu modapot in mononoi. Sia in nongawasa modapot in kopaḷutannea.

DANIEL 4:37

Dá tanaa in akuoi, ki Nebukadnezar modayow, mopoḷantud bo mopomulia kon i Datu in Soroga. Bayongan in oaidan-Nea in moitutui bo moadil, bo Sia in mokopotungkudbí kon intau mita inta moḷoḷatú.

HABAKUK 1:12

Tuhan, nongkon koḻipodpabímai Ikobí in ki Allah. Iko in ki Allahku inta motusi bo mononoi. Tuhan, Allahku bo moḷoḷukadku, bangusa in Babel tatua in piniḻí-Mu bo binaḻí-Mu noropot sin mohukum kon inami.

HABAKUK 1:13

Táe naondabí sin Iko in mokotahangbí in moindoi mako kon intau mita moraat bo moḻingá tatua? Kinotaauanku kon Iko in noiḻiubí kon motusi in moindoi kon aid moraat! Kinotaauanku kon mototukabí in Iko in mokoontong kon aid diá moadil! Dá, nongonu sin Iko in tongábí kibio-biómai kon tungkuḷ in intau motoḷutui irimumud in intau moraat?

ZEPANYA 3:5

Táe ki Tuhan in oyúonpabí in kon kotá tatua; Sia in umuranbí mopobayá in onu inta mobanar bo diábí kon dodai in onda in inta moitaḷá. Pomuḷoi in doḷo-doḷom notantúbí kon Sia in mobogoi in inta moadil kon umat-Nea. Táe, intau inta diá nonotaau in inta moadil kon kotá tatua in umuranbí mogaid kon inta moraat bo diábí in oya-oyá mako.

MATIUS 5:48

Manangka intua moiko in musti mogaid kon inta totok in mopia ná ki Amámu inta kon soroga ain nogaid kon inta totok in mopia.”

YOHANES 1:14

Pirman ain nobaḻí intau, Sia in nogutun kon sigad naton, bo kita ain nokoontong kon kamuliaan-Nea. Kamuliaan inta sinarima-Nea saḷaku Adí tuḷong i Amá. Pinongin i-Nia tua kita mokoontong kon i Allah bo tabi-Nea kon i naton.

YOHANES 1:17

Hukum i Tuhan sinarima naton nongkon i Musa. Táe tabi bo kososatia i Allah in pinoniatadon kon i Yesus Kristus.

YOHANES 14:6

Ki Yesus in notubag, “Akuoibí naa in daḷan kon monotaau kon i Allah bo mokouḻí kon kobiagan. Diábí in tobatúmai intau in mokoyaput kon i Amá, aka diá mongin i-Nakó.

YOHANES 5:22

Bo ki Amá in diá bidon mohakim kon i ineka, sin pinosarakan-Nea bidon intua kon i Adí-Nea.

SURAT I PAULUS KON JAMAAT RUM 1:32

Kinotaauanbí monia, kon podudui in hukum i Allah, intau inta mogaid kon bayongan tua in patusbí hukumon modapot matoi. Táe umpakabí natua yo aidanbí doman monia intua komintan; bo nodapotbí in aka intau ibanea in momia kon soaḷ mita ná inta inaidan monia tua yo mosatujubí doman i mosia.

SURAT I PAULUS KON JAMAAT RUM 2:2

Kinotaauan bidon naton kon aka ki Allah in mopoḷabú in hukuman kon intau mita inta nogaid kon soaḷ mita ná tatua, yo noitutuibí in kaputusan i Allah tatua.

SURAT I PAULUS KON JAMAAT RUM 2:5

Táe moiko totok motogat in gina bo doí momaḷui kon gogutú. Dá mangaḻenea kon tua moiko bidon tontaní in modugang kon roriga in hukuman kon i monimu kon Singgai Tumi, aka popoontongdon i Allah in torú-Nea bo hukuman inta moadil.

SURAT I PAULUS KON JAMAAT RUM 3:5

Táe aka koadilan i Allah moniatadon totok, popisí in kita nogaid kon inta diá totuu, yo onu in singogon naton? Degá diá moadil aka ki Allah mohukum kon i naton? (Ḷoḻibó tanaa in mopiabí saḷaku intau.)

KORINTUS 1 10:4

bo nonginum kon tubig inta ain doman sinantú kon inumon monia. Mosia komintan in nonginum kon tubig nongkon buḷud batu inta umuran kotaki-takin monia; buḷud batu tatua in ki Kristus.

ULANGAN 10:18

Sia in mopotutui kon hak in adí uno-unon bo inta dongka bobay-bobay sinbá moadil in popoaid kon i monia; Sia motabi kon intau ango-angoi inta nobiag kon yua-yuak in bangusa naton bo mobogoi kon i monia in kaanon bo pakeang.

ULANGAN 32:15

Umat i Tuhan nobaḻí nobiag nooyúon, táe moibog momarontak, mosia in nongoḷongó, nobotug in kaanon. Bo mosia in nonaḷámai kon i Allah, inta nomaḻí kon i monia bo nondoí kon Mopoposaḷamatnea inta moroton.

ULANGAN 32:18

Mosia in nonoḻikudon kon Mopoposaḷamat monia inta motoyang, noḻiongdon kon i Allah monia inta nobogoi in kobiagan.

ULANGAN 7:9

Pokotorop kon ki Tuhan Allahmu in tongábí Sia-Sia mita in ki Allah, bo Sia in Allah inta mosatia. Ki Tuhan nogintompod kon dandi-Nea bo noponiata in tabi-Nea inta diá modai-dait modapot in toribu nopobuían kon intau mita inta motabi kon i-Nia bo motoindudui kon parenta-nea mita.

YAKOBUS 1:17

Pomuḷoi in oogoi inta mopia bo tombuinag inta mosompurna, namangoibí intua nongkon soroga, pinopoponag i Allah inta nomia kon bayongan inta nobayag kon ḷangit. Sia tua in ki Allah inta diá kon dodai in onda mobaḷui bo diábí doman mokopopisí in mogaid kon inta mosindip.

YAKOBUS 4:12

Bokaka tongábí tobatú in kokawasa mobogoi in hukum kon intau bo mohakim kon intau. Sia tuata in ki Allah inta kokawasa moposaḷamat bo momutú. Dá, ki ine in moiko nion, sahingga in moiko moibog mopotaḷá kon tumpaḷa intau?

PETRUS 1 2:6

Sin kon bonu in Buk Motusi ain pinais nanaa, “Akuoi ain nomiḻí kon tobatú batu inta totok koboḻi, inta sinampat-Ku kon Sion bo binaḻí-Kudon batu inta totok in moponting; bo intau inta mopirisaya kon i-Nia, diábí pokopooyáanmai.”

SAMUEL 1 2:2

Diábí inta motusi ná ki Tuhan! Tongábí Sia in pononiungan.