ULANGAN 13:2 - Alkitab Singog In Mongondow Masa In Tanaa

² takin makusud sinbá moiko mosumba bo mogundoi kon ilah mita inta diá dodai onda in kinotaauan monimu, umpakabí onu inta pinodandinea tatua totu-totuu kon nobaḻí,

ULANGAN 13:2 ပူးပေါင်းရင်းမြစ်များ

DATU MITA IMITÁNEA 13:3

Guman i nabi noiduduimai, “Mezbah tanaa in morumbunbí, bo ḷobud inta kon tudunea in moitabud. Tua in poniataan kon akuoi in pinotabábí i Tuhan.”

IḶUAIAN 22:19

Intau inta mongibog kon mahaḷuk musti ḻimodon.

IḶUAIAN 7:22

Táe intau mososihir mita kon Mesir nomia doman kon natua takin pongotahuan monia, dá ki datu tantú mokopotontogatpa doman kon gina. Ná inta ain pinoguman muna i Tuhan, kon datu in doí mokidongog kon i Musa bo kon i Harun

YEREMIA 23:32

Akuoi, ki Tuhan, in moḷawangbí kon nabi mita tatua inta nopotaau in togoindopnea mita inta nopuḻing in uboḷ. Mosia in nopoḷangkam in umat-Ku pinodoyon kon uboḷ bo ambungangaḷ monia. Akuoi in diábí nopotabá kon nabi mita tatua. Mosia in beresibí diá baraguna kon umat-Ku. Akuoi, Tuhan, ain nosingog.”

YEREMIA 27:9

Dikadon mokidongog kon nabi mita andeka ki ineka doman inta mongampag kon i monimu mokiompu kon i datu in Babel, umpaka in mosia ain nongaku kon notarimadon kon topotundú nongkon togoindop, dimukud mita, andeka nopomaké in totaau mita.

YEREMIA 28:9

Táe nabi inta nonoḷanow kon kaadaan modame, in tongábí motaau akúon saḷaku nabi inta totu-totuu pinotabá i Tuhan, aka toḷanownea mita moniata.”

ZAKHARIA 10:2

Intau mita mopoigum in topotundú kon berhala mita bo mononoḻindap mita, táe tubag mita inta nouḻí monia in uboḷ bo tongábí kon bibig. Oyúon in noginsilang kon togoindop, táe insilang monia in tongábí mokopoḷaḻe kon i monimu, bo ḷoḻipoi inta inogoinea diá in mangaḻenea. Tuamai in rayat noirangkapdon magí-mako naonda bo domba. Moajar monia sin diá in itoi.

MATIUS 24:24

Sin oyúon in mongaku ki Mesias bo mongaku nabi táe mosia tua intaubí mongongakaḷ, tongá mosia in mogaid doman kon tanda mita inta moḷoben bo soaḷ mita inta mokoherang sahingga in aka mobaḻí, yo mosia in mokoakaḷ doman kon intau mita inta ain piniḻí.

ULANGAN 13:13

kon tongonumai intau moraat nongkon bangusamu aindon nopoḷaḻe kon intau inta nogutun kon kotá sin mosumba kon ilah mita inta diá kinotaauan monimu.

ULANGAN 13:6

Aka utatmu ande adímu ḷoḷaki ande bobay, ande ki buḷoimu inta kinotabimu ande yobayatmu modagin takin umado-adop modondouḷug kon inimu sin mosumba kon ilah mita ibanea inta diá kinotaauan monimu bo diá doman kinotaauan in mogoguyangmu, ilah mita inta nongkon bangusa mita inta nogutun noyodiugan ande noyogiyayúan,

ULANGAN 18:20

Táe aka nabi tobatú mobarani mopotaau in koyow podoyon kon tangoi-Ku bokaka Akuoi in diábí nopotabá kon inia mogaid kon tua, yo sia tua in mustibí matoi; natua doman in bayongan nabi inta mosingog podoyon kon tangoi in ilah mita ibanea mustibí matoi.’

ULANGAN 18:22

Aka nabi tobatú mosingog podoyon kon tangoi i Tuhan, táe onu in siningognea tua diá noniata, dá tosingogonnea tatua in deemanbí nongkon i Tuhan. Nabi tatua in mosingogbí pinodoyon kon tangoinea tontaní bo dikabí in moiko moondok kon inia.”