ULANGAN 1:8 - Alkitab Singog In Mongondow Masa In Tanaa

⁸ Akuoi, ki Tuhan, aindon nopodandi in bayongan butá tatua kon mogoguyang monimu ki Abraham, ki Ishak bo ki Yakub takin bayongan buí monia. Dá bayádon ḻitúai in butá tatua.’ ”

ULANGAN 1:8 ပူးပေါင်းရင်းမြစ်များ

KINOBAḺIAN 12:7

Ki Tuhan nokipogontong kon i Abram bo noguman kon inia, “Tanaa in butá inta ogoi-Ku kon buímu.” Bo ki Abram noposindog in tobatú mezbah kon tua sin posumbaan kon i Tuhan inta ain nokipogontong kon inia.

KINOBAḺIAN 15:16

Naonda in opat nopobuían, ki adí bo ki ompumu in mobuidon mangoi kon naa, sin Akuoi in diábí moguntun kon intau in Amori aka mosia diápa totok in moraat dapot in paraḷu hukumon.”

KINOBAḺIAN 15:18

Kon dodai doman tuata ki Tuhan nogaid kon dodandian takin i Abram. Guman i Tuhan, “Akuoi in modandi kon ogoi-Ku kon buímu in bayongan butá tanaa, pinangkoi kon sigad in butá in Mesir modapot kon Ongkag in Eprat,

NEHEMIA 9:15

Kon tungkuḷ in mosia ginogoi bo kinodaitan in kaanon, roti nongkon ḷangit pinoangoi-Mu. Bo nongkon buḷud batu pinoangoi-Mudon in tubig moḷoben inta mokoguḻí kon yogang. Pinoki ḻitúan-Mu in mosia in butá inta pinodandi-Mu kon inia takin ibot.

IḶUAIAN 23:31

Sigad mita in butámu in tantúon-Kudon nongkon Teluk Akaba modapot kon Ongkag in Eprat, bo nongkon Dagat Toyuak modapot kon padang gurun. Moiko ogoian-Ku in kawasa mongawasa kon intau mita inta nogutun kon butá tatua, modapot in mosia kountunandon monimu kon dodai in moiko mayá mogagow kon butá tatua.

IḶUAIAN 33:1

Bo ki Tuhan in noguman kon i Musa, “Taḷaaidon in tampat tanaa bo bayádon poyotakin in bangusa inta diniamu nongkon Mesir tatua mopobayá in butá inta pinodandi-Ku kon i Abraham, kon i Ishak bo kon i Yakub bo kon buí monia.

YEREMIA 32:22

Butá inta mopia bo motobai naa inogoi-Mu kon i monia ná inta ain pinodandi-Mu kon mogoguyang monia.

YEHEZKIEL 47:14

Akuoi in nongibotdon kon butá tatua in ogoi-Kudon kon mogoguyangmu. Tuamai in gamádon in butá tatua bo silaidon koadilon kon sigad monimu.

PINOGIAPAN 14:23

Diá! Mosia in diábí moituot kon butá tatua. Kon sigad monia inta noḷawang kon i-Nakó, diábí tobatúmai in moiyitak kon butá tatua.

ULANGAN 1:11

Igumon mako ki Tuhan, Allah in mogoguyangmu, umuran modugang kon kobayong monimu modapot in koribu noguntuḷ, bo mopobaḻí kon i monimu bangusa inta mobiag mooyúon bo motompia ná podudui kon inta pinodandi-Nea!

ULANGAN 1:35

‘Diá tobatúmai in intau mita inta nobiag tanaa in tumuot kon butá mopia inta pinodandi-Ku kon mogoguyangmu.

ULANGAN 10:11

Bo Sia nopotabá kon inakó mayá modia kon i monimu sinbá moiko mokouḻí kon butá inta ain pinodandi-Nea kon mogoguyangmu.”

ULANGAN 11:24

Komintan in butá inta yitakan monimu in mobaḻíbí kapunyaanmu. Butámu in mobendarbí nongkon padang gurun kon dotá in toḷatan modapot kon Buḷud in Libanon kon utuan, bo nongkon Ongkag in Eprat kon pomukaan modapot kon Dagat Toyuak kon toyopan.

ULANGAN 11:9

Bo moonggot in kobiagan monimu kon butá inta nooyúon bo mopia, inta pinodandi i Tuhan kon mogoguyangmu bo kon buí monia.

ULANGAN 2:29

modapot in kami ḷumoḷan kon Ongkag in Yordan sin tumuot kon butá inta inogoi i Tuhan Allah nami kon i nami. Buí i Esau inta nogutun kon Edom bo intau mita in Moab inta nogutun kon Ar nobogoi domandon kon i nami nongin butá monia.’

ULANGAN 26:15

Nongkon tampat-Mu inta motusi kon soroga koibogpa in Iko moḷongow bo momarakat kon umat-Mu Israel; barakataidon doman in butá nooyúon bo mopia inta ain inogoi-Mu kon inami podudui in dandi-Mu kon mogoguyang nami.’ ”

ULANGAN 26:3

Bayádon kon i imang inta nopobayá in oaidan monia kon dodai intua bo pogumandon kon inia, ‘Akuoi moponiatadon kon i Tuhan Allahmu kon akuoi in sinumuotdon kon butá inta pinodandi-Nea kon mogoguyang naton ogoi kon i naton.’

ULANGAN 28:11

Moiko in ogoianbí in adí mobayong. Bobiagonmu in mobaḻíbí mobayong bo bungai in boyó kon butámu in mobarongbí totok kon butá inta pinodandi i Tuhan kon mogoguyangmu kon ogoi kon inimu.

ULANGAN 29:12

Ki Tuhan Allahmu nomia kon dodandian takin monimu, bo moiko komintan noyosipun kon naa sin mopoyotogot in dodandian tatua takin motarima kon kowajibannea mita.

ULANGAN 30:20

Kotabibí in ki Tuhan Allahmu, duduiaidon in Sia, bo pokosatiadon kon i-Nia. Dá moiko bo buímu in mobiag moumur kon butá inta pinodandi i Tuhan kon mogoguyangmu, ki Abraham, ki Ishak bo ki Yakub.”

ULANGAN 31:7

Bo ki Musa nogoiní kon i Yosua, bo kon tayowon in bayongan bangusa Israel sia noguman kon inia, “Korigon in gina bo kobarani, Yosua! Ikodon in modia kon bangusa tanaa mayá ḻimitú kon butá inta pinodandi i Tuhan kon mogoguyang monia.

ULANGAN 34:4

Bo ki Tuhan noguman kon i Musa, “Tuata in butá inta pinodandi-Ku kon i Abraham, kon i Ishak bo kon i Yakub ogoi kon buí monia. Poontong-Ku kon inimu, Musa, tongá diábí ogoi-Ku in iko mayá intua.”

ULANGAN 4:1

Bo ki Musa noguman kon bangusa tatua, “Duduiaidon komintan in hukum inta tundúonku kon inimu, sinbá mobiag in moiko bo moiutun kon butá inta bain ogoi i Tuhan, Allah in mogoguyangmu, kon inimu.

ULANGAN 6:10

“Ki Tuhan Allahmu nodandi kon mogoguyangmu ki Abraham, ki Ishak bo ki Yakub kon Sia in mobogoibí in butá tatua kon inimu. Kotánea mita moḷoben bo mopia, bo deemanbí moiko in noposindog intua.

ULANGAN 7:12

“Aka tarukiraan monimu in parenta mita tatua, bo mosatia in mopoaid, dá ki Tuhan Allahmu in mosatiabí doman kon dodandian inta pinomia-Nea takin i monimu. Sia in mopoontongbí in tabi-Nea inta motantú kon i monimu, ná inta pinodandi-Nea kon mogoguyangmu.

ULANGAN 7:13

Sia in motabibí bo momarakat kon i monimu, dá adímu mobarong bo umuran doman kodugang-kodugang in kobarong monia. Sia in momarakatbí kon gobámu mita, dá mobarong in gandum, anggur bo ḷana in zaitun. Sia in momarakatbí kon i monimu dá mobarong in sapi bo bembé dombamu. Bayongan barakat tatua in tarimaanbí monimu kon butá inta inogoi i Tuhan kon inimu, podudui in dandi-Nea kon mogoguyangmu.

ULANGAN 7:8

Táe ki Tuhan nomiḻí kon i monimu sin motabi in Sia kon i monimu bo mogintompod kon dandi inta pinomia-Nea takin mogoguyangmu. Tuamai in noposaḷamat in Sia kon i monimu takin kawasa inta moḷoben bo nopoḷuat kon i monimu nongkon kawasa i datu in Mesir.

ULANGAN 8:1

“Bayongan in hukum inta inogoiku kon inimu singgai naa musti aidan monimu pokosatia, sinbá moiko umuran mobiag, modugang mobarong bo mogutun kon butá inta pinodandi Tuhan kon mogoguyangmu.

IBRANI 6:13

Sin wakutu in ki Allah nodandi kon i Abraham, nongibot in Sia kon totu-totuubí mobaḻí in onu in pinodandi-Nea tatua. Bo lantaran diábí in moḷantu-ḷantud nongkon i-Nia, dá nongibot in Sia pinodoyon kon tangoi-Nea tontaní.

IBRANI 6:14

Nanaa in kai-Nia, “Akuoi in modandi kon barakatan-Kubí bo baḻíon-Kubí mobayong in buímu.”

YOSUA 1:6

Pokoyakin bo pokobarani in iko, sin ikobí in modia kon bangusa tanaa kon tungkuḷ in mosia ḻimitú kon butá inta pinodandi-Ku kon mogoguyang monia.

HAKIM MITA 2:1

Malaekat i Tuhan nongkon Gilgal minayá in Bokhim bo noguman kon intau mita in Israel, “Akuoi ain nopoḷuai kon i monimu nongkon Mesir, bo nodia kon i monimu sinumuot kon butá inta pinodandi-Ku kon mogoguyang monimu. Ain doman pinoguman-Ku, ‘Dodandian-Ku takin i monimu in diábí bontowon-Ku.