TIMOTIUS 2 1:8 - Alkitab Singog In Mongondow Masa In Tanaa

⁸ Manangka intua dikabí moondok in mopotaau bo moguman kon onu inta inaidan i Tuhan naton. Dika doman mooyá, sin akuoi in pinobonu kon ponjara popisíbí in mopirisaya kon i-Nia, táe pakébí in ropot inta inogoi i Allah motanggung moyotakin kon roriga sin mopoyaput in Habar Mopia tatua.

TIMOTIUS 2 1:8 ပူးပေါင်းရင်းမြစ်များ

MAZMUR 119:46

Atorang-Mu in potaaukubí kon datu mita, bo diábí in akuoi mooyá.

MAZMUR 19:7

Sia in noḻibu kon ḷangit nongkon popodnea tobatú nodapot in popodnea ibanea; diábí in kotaḻiban in patúnea.

YESAYA 51:7

Indongogaidon in Akuoi ei bangusa-Ku, kinotaauanbí monimu onu in totuu; totundú-Ku in noitagú kon bonu in ginamu. Dika moondok aka moiko singkuḻeon in intau, dika moḻia-ḻiaw in gina aka moiko singkuḻeon monia.

YESAYA 8:20

Tubagai nanaa, “Indongogai in totundú in Tuhan! Intau inta diá nosingog podudui in totundú tatua, diábí in kamang.”

MARKUS 8:38

Sin ki inekabí in mooyá popisí Akuoi bo popisí in singog-Ku kon yua-yuak in intau mita inta diá mosatia bo binaradosa naa, yo ki Adí intau mooyá doman popisí in intau tatua aka Sia mamangoidon bui kon bonu in kamuliaan i Amá-Nea takin malaekat mita mokudus.”

LUKAS 9:26

Sin intau inta mooyá in mongaku kon sia tua in dumodudui-Ku bo mooyá in mogaid kon onu inta ain sinundú-Ku, yo ki Adí Intau mooyá doman in mongaku kon sia in dumodudui-Ku kon wakutu in moiangoi in Sia takin kawasa-Nea bo kawasa i Amá bo in malaekat mita inta motusi!

YOHANES 15:27

Bo moiko in mustibí doman mobogoi in kosakusian soaḷ Akuoi, sin moiko ain noyotakin-Ku nongkon pinomangkoianpamai.

YOHANES 19:35

Intaubí inta ain nokoontong tontaní kon onu inta ain nobaḻí tatua in nopotaau kon soaḷ tatua, sinbá moiko in mopirisaya doman. Bo onu inta pinotaaunea tatua in totuubí, bo kinotaauannea kon totuubí intua.

OUMAN IN RASUL MITA 5:41

Rasul mita tatua in nobuidon nongkon sidang agama tatua takin pia in gina, sin kinotaauan bidon monia kon natuabí in mobaḻí dumodudui i Yesus. Patusbí in mosia motarima kon singkuḻe lantaran ki Yesus.

SURAT I PAULUS KON JAMAAT RUM 1:16

Mopirisayabí totok in akuoi kon Habar Mopia tatua, sin Habar Mopia tatua in ropotbí i Allah moposaḷamat kon bayongan in intau inta mopirisaya; muna-munamai intau in Yahudi, bo bangusa doman ibanea.

SURAT I PAULUS KON JAMAAT RUM 16:25

Dinayo-dayowdon in ki Allah! Sia in mongawasa moginrigon kon pirisaya monimu podudui in Habar Mopia nongkon i Allah inta pinotaauku soaḷ ki Yesus Kristus. Habar inta pinotaauku tua in notongkai in onu inta pinoontong i Allah kon inakó; tuata in soaḷ tomayá i Allah inta noonggotdon totok in kinotaauan intau.

SURAT I PAULUS KON JAMAAT RUM 8:36

Kon bonu in Buk Motusi in pinais nanaa, “Tumongo singgai in kami moyogintayow mako in popatoi popisí in Iko. Kami in pinomiadon naonda bo domba inta diaandon sin ratáan.”

SURAT I PAULUS KON JAMAAT RUM 9:33

Kon Buk Motusi ain pinais nanaa soaḷ batu tatua, “Tarukiradon in naa: Ain inukatan-Ku in Sion tobatú batu inta mokopopisí kon intau moipintud; tobatú batu moḷoben inta mokopopisí kon intau moidompaḷak. Táe intau inta mopirisaya kon i-Nia in diábí pokopooyáan-Neamai.”

KORINTUS 1 1:6

Bo tua komintan mangaḻenea in moponiatabí kon naanta habar mopia i Yesus Kristus tua in totu-totuu bidon noitonop kon bonu in ginamu.

KORINTUS 2 6:7

bo poḷat doman mopotaau in habar nongkon i Allah takin kawasa i Allah, pinoontongdon nami kon kami naa in mogogaid mita kon oaidan i Allah. Kami in kinumadai kon onu in kinoibog i Allah saḷaku ḷoḷutam nami kon moḷawang andeka pobela kon onu in inaidan nami.

EPESUS 3:1

Akuoi ki Paulus, pinonjara popisí in nogaid kon oaidan i Kristus Yesus sin kopontingan monimu intau inta deeman Yahudi.

EPESUS 3:13

Tuamai naa in igumonku: donaaibí moḻia-ḻiaw in gina in mokoontong kon rorigaku inta popisí in moiko, sin bayongan in rorigaku tua, untukbí kopiaan monimu.

EPESUS 4:1

Manangka intua akuoi – saḷaku intau inta pinonjara sin nogaid kon oaidan i Tuhan – mopoigum totok kon i monimu: sinbá moiko, intau inta inoinídon in kobiag domandon ná inta kaadaanmu saḷaku intau inta inoiní i Allah.

EPESUS 4:17

Tuamai in podoyon kon tangoi i Tuhan, naa in singogku bo ponoropku: donaai in mobiag naonda bo intau inta diá nonotaau kon i Allah bo tongá morai kon inta diá in mangaḻenea.

PILIPI 1:7

Totuubí kon diábí moitaḷá in raianku tanaa kon i monimu, sin moiko umuran kon gina-ginaku mako, popisí in moiko ain nokouḻí domandon kon totabi bo barakat i Allah inta inogoi kon inakó; kon tungkuḷ in akuoi kon bonupa in ponjara tanaa mako ande kon tungkuḷ in kon ḷuaidon mobela kon kinobobanar in Habar Mopia tatua.

PILIPI 3:10

Soaḷ inta totok in kinoibogku in monotaaubí kon i Kristus bo mokoalami kon kawasa inta nokobiag kon i-Nia nongkon kinopatoian. Bo moibog doman in akuoi mokoalami kon roriga ná inta kinorasaan-Nea bo notongkai doman ná kopopatoi-Nea,

PILIPI 4:13

Kawasa inta inogoi i Kristus kon inakó umuran mobogoi in ropot kon inakó in tumayow kon kaadaan noyagi-yagimai.

KOLOSE 1:11

Igumondon mako, sinbá kawasa i Allah inta momulia in tantú moginrigon kon i monimu, sahingga in umuran mosanang bo mopia in gina monimu wakutu in moyogintayow in bayongan roriga

KOLOSE 1:24

Tanaa mopiabí in ginaku in mororiga sin kopontinganmu. Sin aka awakku bo mororiga, yo tua in mangaḻenea akuoi nogintompodon kon roriga inta diápa kinorasaan i Kristus, sin kopontingan in jamaat saḷaku awak-Nea.

TESALONIKA 1 3:4

Sin kon dodai in kami koyota-yotakinpa monimu, muna bidon pinoguman nami, kon kita in pastibí mokorasa kon roriga. Bo totuu kon nobaḻídon intua komintan; kinotaauan bidon monimu intua.

TIMOTIUS 1 2:6

Sia in tobatú intau inta ain noposarakan in awak-Nea sin pinotobut kon dosa mita in bayongan intau. Tua in moponiata kon wakutu inta ain sinantú i Allah, ibogon-Nea in bayongan intau in posaḷamaton.

TIMOTIUS 2 1:10

Bo masa in tanaa pinoontongdon i Allah in totabi-Nea tatua kon i naton. Pinotabá-Nea namangoi in Datu Mopoposaḷamat naton ki Yesus Kristus. Sia inta ain nonaḷow kon kawasa in popatoi. Tuata inta pinotaau kon Habar Mopia tatua.

TIMOTIUS 2 1:12

Tuamai akuoi in nokorasa kon bayongan roriga tatua, táe akuoi in umuranbí moyakin sin kinotaauankubí totok ki ine in pinirisayaku tua. Moyakinbí in akuoi kon onu inta ain inogoi-Nea pinoki aid kon inakó tantúbí koḷukadan-Nea modapot in Singgai Pangabisan.

TIMOTIUS 2 1:16

Táe tombonu in baḷoi i Onesiporus in umuran namangoi moposanang in ginaku, dá poigumonku mako ki Tuhan in tantú mobogoi in barakat kon i monia, sin umpakabí kon bonu in ponjara akuoi táe ki Onesiporus bo tombonu in baḷoinea tua in diábí mooyá in namangoi mokipodungkuḷ kon inakó.

TIMOTIUS 2 2:3

Iko in musti moyotakin rumoriga saḷaku tontara i Kristus inta motoindudui.

TIMOTIUS 2 2:8

Torop in naa: Habar Mopia inta pinoyaputku tua in habarbí soaḷ ki Yesus Kristus inta ain nobiag kon sigad in intau minatoi, inta pinolahir saḷaku buí i Daud.

TIMOTIUS 2 2:9

Bo lantaranbí nopotaau in Habar Mopia tanaa dá akuoi in nokouḻí kon roriga, nodapot in sinokig naonda bo intau moraat, táe pirman i Allah in diábí motaau tokigon monia ná akuoi.

TIMOTIUS 2 4:17

Táe akuoi in umuranbí iḷukadan i Tuhan; bo inogoian-Neadon in ropot in akuoi sahingga in nokosanggupdon nopoyaput in Habar Mopia tatua, sinbá kodongogan domandon in bayongan intau inta deeman Yahudi, sahingga in akuoi noipilatdon nongkon onu inta mokobodito kon inakó.

TIMOTIUS 2 4:5

Manangka intua uḻe kawasaai in ginamu, onukabí in mobaḻí. Mokoposabar aka koantugan in yoyiga, umurai aidai in oaidanmu saḷaku intau inta mopopotaau in Habar Mopia tatua. Kopirabí totok in mogaid kon oaidan inta ain inogoi i Tuhan kon inimu.

PETRUS 1 1:5

Tua komintan in ogoi kon i monimu, sin moiko in mopirisaya kon i Allah. Moiko iḷukadanbí doman in kawasa i Allah sinbá moiko in motarima kon kasaḷamatan inta sinadiadon bo poponiata kon singgai tumi.

YOHANES 1 4:14

Kami tontaní ain nokoontong kon i Adí i Allah, bo kami in nopohabar kon Sia in pinotabá mangoi i Amá sin mobaḻí Datu Mopoposaḷamat in dunia naa.

YUDAS 1:24

Ki Allah, inta mokosanggup moḷukad sinbá moiko diá moḷabú, bo inta mokosanggup modia kon i monimu mayá in tampat pomomarentaannea inta momulia takin gina mosanang bo modarit.

WAHYU 1:2

Dá ki Yohanes nopotaau doman in bayongan inta ain inontongnea tatua; bo naadon in pinogumannea in soaḷ koyow nongkon i Allah, bo inta inirigonan i Kristus Yesus pinongin kosakusiannea.

WAHYU 1:9

Akuoi ki Yohanes, ki utatmu inta kinoantugan doman in roriga inta ná noiantug kon intau mita inta mopirisaya kon i Kristus. Mustibí mokoposabar in monahang kon roriga in kita saḷaku kapunyaan-Nea. Akuoi in iḷumbú kon Pulau Patmos popisí in nopotaau in koyow inta nongkon i Allah, inta inirigonan i Yesus pinongin onu inta inouman-Nea.

WAHYU 12:11

Dugú i Adí in Domba bo Habar Mopia nongkon i Allah inta pinotaau monia, tua in pinaké i utat mita naton nonaḷow kon inia. Mosia in diábí moondok in matoi.

WAHYU 19:10

Dá sinumungkud in akuoi kon tayowonnea sin mosumba kon inia, táe sia in noguman kon inakó, “Donaai! Donaai mosumba kon inakó, sumbadon in ki Allah! Sin akuoi naa in tongábí doman bobantung ná iko nion bo notongkai doman i utatmu mita inta umuran kinumadai norigon kon onu inta pinoguman i Yesus!” Sin onu inta pinoguman i Yesus, tuatabí inta nopogonú kon gina in intau mita inta nopotaau in koyow i Allah.