TIMOTIUS 2 1:3 - Alkitab Singog In Mongondow Masa In Tanaa

³ Akuoi mopoyaput in sukur kon i Allah inta binantunganku takin gina motuḻid bo modarit ná inta inaidan in mogoguyangku tungkuḷ intua. Umuranku sambayangan in moiko pomuḷoi in kotoropanku doḷom ande singgai.

TIMOTIUS 2 1:3 ပူးပေါင်းရင်းမြစ်များ

LUKAS 2:37

táe tanaa sia dongkadon boba-bobay, bo umurnea aindon waḷu nopuḷú boopat notaong. Sia umuranbí mamangoi in Baḷoi Tuhan. Doḷom bo singgai sia mogaid kon onu inta kino ibog i Tuhan, sia in mosambayang bo mopuasa.

OUMAN IN RASUL MITA 22:3

“Akuoi naa intaubí in Yahudi, pinononggadí kon Tarsus kon butá in Kilikia, táe akuoi in nointoi kon kotá tanaa, ki Gamaliel in guru moḷobenku inta ain notundú kon i nakó notompia totok. Sia in notundú kon hukum i Musa inta inogoinea kon mogoguyang naton. Sahingga in akuoi nobaḻí mogogaid i Allah inta totok in morajing, ná tanaa mako.

OUMAN IN RASUL MITA 23:1

Ki Paulus inimindoipa magí mako kon anggota in Mahkama Agama inta kon tua bodongka sia in nosingog, “Utatku mita! Umaaibí in singgai naa rasaanku kon akuoi in diábí kotaḷá kon i Allah. Ginaku in motuḻidbí totok kon tayowon i Allah.”

OUMAN IN RASUL MITA 24:14

Táe akuonkubí kon i Tuang kon akuoi in nosumbabí kon i Allah in mogoguyang nami podudui in onu inta ain pinais kon bonu in buk i Musa bo buk in nabi mita.

OUMAN IN RASUL MITA 24:16

Tuamai akuoi in umuran moramuji totok sinbá ginaku in umuran modarit kon tayowon i Allah bo kon tayowon in intau.

OUMAN IN RASUL MITA 26:4

Bayongan intau in Yahudi nonotaaubí komintan kon kobobiagku pinangkoipamai akuoi tayowmobiagpa, sin akuoi in nobiagbí kon yua-yuak monia kon Yerusalem.

OUMAN IN RASUL MITA 27:23

Sin kogobíi malaekat i Allah inta sinumbaku, ki Allah inta ki togi kon inakó in namangoi kon inakó.

SURAT I PAULUS KON JAMAAT RUM 9:1

Onu in pogumanku tanaa in totuubí, akuoi in diábí monguboḷ, sin ki Kristus in nongawasadon kon inakó. Ginaku inta sinakinan in Roho i Allah, mopoyakin kon inakó doman kon singogku tua in totuubí.

KORINTUS 2 1:12

Noḷunganga totok in gina nami, sin noyakin bidon in kami kon kobobiag nami kon dunia naa – apapa doman hubungan nami bo i monimu – tantúbí nami sinompia takin gina motuḻid bo nobayag. Tua komintan in inaidan nami, deemanbí pinodoyon kon kapandoian raian in intau, táe pinodoyonbí kon ropot inta pinonotabi i Allah.

GALATIA 1:14

Bo aka tongá mopobayá in parenta in agama Yahudi, yo noiḻiubí in akuoi kon intau mita in Yahudi inta topobiagku. Bo akuoi in totok doman moḷukad kon adat in mogoguyang nami.

EPESUS 1:16

dá akuoi in tantú mopoyaput in sukur kon i Allah sin lantaran moiko. Pomuḷoi in akuoi mosambayang umuranku doman kotangoian i moiko.

TESALONIKA 1 3:10

Doḷom bo singgai kami in umuran mosambayang sinbá kita in motaaupa moyodungkuḷ moyogintayow mako bo mogintompod kon onu inta paraḷupa pakéon monimu kon mopobayá in pirisaya monimu kon i Kristus.

TIMOTIUS 1 1:19

Sin oyúondon in intau inta doídon dumudui kon ibog in ginanea inta mopia bo modarit, sahingga in nogoguyaatdon in pirisaya monia.

TIMOTIUS 1 1:5

Akuoi in mononggina nanaa sinbá intau kopakéandon in gina modarit motuḻid bo totu-totuudon mopirisaya kon i Tuhan, sahingga in oyúondon in totabian kon tumpaḷa intau.

TIMOTIUS 1 5:5

Intau boba-bobay inta nobiagdon tontaní sin diádon in haraponnea mako motuḷung monompia kon inia, bo dongkadon ki Allah in poharapannea mako, yo musti in sia doḷom bo singgai in mosambayang bo mopoigum in totabi kon i Allah.

TIMOTIUS 2 1:5

Umuran kotoropanku in kopopirisayamu kon i Kristus inta totu-totuu tua naonda bo kopopirisaya i baaymu ki Lois bo ki inámu ki Eunike. Bo moyakinbí totok in akuoi kon kopopirisayamu nion ná bí doman onda bo kopopirisaya monia tua.

TIMOTIUS 2 3:15

Musti umuran toroponmu mako, kon nongkon mointokanpamai iko ain nonotaau kon Buk Motusi. Bo Buk Motusi tatua in nobogoi in pongortian kon inimu, sinbá mokouḻí kon kasaḷamatan inta pinodoyon kon pirisaya kon i Kristus Yesus.

IBRANI 13:8

Ki Yesus Kristus in diábí mobaḷu-baḷui, koḻipod, masai naa bo modapotkabí in kopaḷutannea.

SAMUEL 1 12:23

Soaḷ akuoi, poigumon mako akuoi in diá modapot in mogaid kon dosa kon i Tuhan sin diádon nosambayang kon kopontingan monimu. Táe akuoi in umuranbí motundú kon inimu kon soaḷ mita inta mopia bo inta noitutui.