TIMOTIUS 1 4:14 - Alkitab Singog In Mongondow Masa In Tanaa

¹⁴ Dika angoian maḷat iko in mopomaké in totabi inta ain pinonotabi i Tuhan kon inimu wakutu in iko binarakatan in itoi mita in jamaat. Umuran torop in koyow i Allah inta pinoguman in nabi mita soaḷ iko.

TIMOTIUS 1 4:14 ပူးပေါင်းရင်းမြစ်များ

OUMAN IN RASUL MITA 11:30

Dá notobatú doman kon gina in mosia, bo nosipun kon totuḷung ogoi kon penatua mita. Totuḷung mita tatua inogoi pinoki dia monia kon i Barnabas bo kon i Saulus.

OUMAN IN RASUL MITA 13:3

Naonda in nopaḷutdon nopuasa bo nosambayang in mosia, binarakatandon monia in ki Barnabas bo ki Saulus bo poḷat pinotabá minayá in taya dua.

OUMAN IN RASUL MITA 19:6

Nopaḷut mako kon tua binarakatandon i Paulus in intau mita tatua, bo Roho i Allah in nongawasadon kon i monia, dá mulaidon in mosia nongonguman kon bonu in bahasa inta mokoherang bo nopotaau in habar mita nongkon i Allah.

OUMAN IN RASUL MITA 22:5

Onu in pinomiaku tatua in kinotaauanbí in Imang Moḷoben bo bayongan tongguḷu in agama. Motaaubí ḻibóon monimu kon i monia in tua. Sin mosia tuata inta ain nomais kon surat ḷouna in singog kon inakó inta inogoi kon intau mita in Yahudi kon Damsyik. Surat tatua in noginsilang kon akuoi in inogoiandon in kasampatan modomok kon intau mita kon tua inta ain dinumudui mita kon totundú nobagu tatua, bo poḷat doman modia kon i monia sin hukumon kon Yerusalem.”

OUMAN IN RASUL MITA 6:6

Taya pitu tua in dinia kon tayowon in rasul mita bo sinambayangan poḷat nopoigum sinbá barakatan i Tuhan in mosia.

OUMAN IN RASUL MITA 8:17

Naonda in binarakatandon i Petrus bo i Yohanes dá mosia notarimadon kon Roho i Allah.

TESALONIKA 1 5:19

Donaai monahang kon onu in kinoibog in Roho i Allah.

TIMOTIUS 1 1:18

Timotius, adíku! Oaidan tanaa in inogoiku kon inimu pinodudui kon koyow i Allah inta ain pinoyaput in nabi mita kon jamaat soaḷ iko. Baḻídon baḷunmu in koyow i Allah tatua in mogaid kon bayongan oaidan inta mopia. Poramuji totu-totuu takin umuran kumadai kon inta moitutui bo paké in gina motuḻid bo modarit.

TIMOTIUS 1 4:15

Tarukira intua komintan bo totu-totuu aidan intua sinbá koontongandon intau in komajuan oaidanmu.

TIMOTIUS 1 5:17

Itoi mita in jamaat inta nopobayá in oaidannea notompia, patusbí in sia ogoian in ponghargaan kodua noguntuḷ in kopianea. Torutama mosia inta morajing totok in motundú bo mopoyaput in Habar Mopia.

TIMOTIUS 1 5:19

Donaaibí tongá tarimaanmu mako natua in onu in pinonapud kon tobatú itoi in jamaat, táe mustibí oyúon in doyowa ande toḷu in intau inta nokoontong tontaní in mobogoi in kosakusian kon pelekara inta pinonapud kon inia tua.

TIMOTIUS 1 5:22

Dikabí gumampanganmai in monantú poḷat momarakat kon intau sin baḻíon mogogaid kon oaidan i Tuhan. Bo aka oyúon in intau nogaid kon inta diá mopia yo donaaibí dumayan in iko. Tantúbí ḷukadai in awakmu bá umuran modarit.

TIMOTIUS 1 6:12

Poramujidon totu-totuu mobiag saḷaku intau inta mopirisaya kon i Kristus. Mobiag mobanar bá mouḻímu in kobiagan mononoi. Sin tuabí in mangaḻe in pinogoinían i Allah kon inimu bo tua doman komintan inta umuran inakumu kon tayowon in intau moantó.

TIMOTIUS 2 1:6

Manangka intua tantúku bui ponorop kon inimu sinbá umuranmu pakéon kopiraan in totabi inta inogoi i Allah kon inimu wakutu in binarakatanku in iko.