TIMOTIUS 1 2:5 - Alkitab Singog In Mongondow Masa In Tanaa

⁵ Sin tongábí totobatú in ki Allah bo tongábí doman tobatú in mononigad kon intau bo kon i Allah, Sia tuata in ki Kristus Yesus.

TIMOTIUS 1 2:5 ပူးပေါင်းရင်းမြစ်များ

AYUB 9:33

Táe kon sigad nami diá in hakim inta motaau mopoyotutui kon inaminda.

YESAYA 44:6

Naa in guman i Tuhan Inta Totok in Mokawasa, Datu bo moḷoḷukad in Israel, “Akuoi in Allah inta tongá totobatú, Inta muna-munamai bo inta imbuitnea totok.

MATIUS 1:1

Nanaa in asaḷ-usuḷ i Yesus Kristus, buí i Daud inta buí i Abraham.

MATIUS 1:23

“Tobatú mongodeaga in modia kon sian bo mopononggadí kon tobatú adí ḷoḷaki bo adí tatua tangoian monia ki ‘Imanuel’, inta mangaḻenea: Ki Allah kotaki-takin naton.”

LUKAS 14:22

Onda intua simpaḷ tatua namangoidon bui kon i tuangnea bo noguman nanaa, ‘Tuang, onu in pinoki aid i tuang aindon nodait dinuduianku, táe oyúonpa doman in ḷoḻitúan in diá iḻitúan.’

YOHANES 1:14

Pirman ain nobaḻí intau, Sia in nogutun kon sigad naton, bo kita ain nokoontong kon kamuliaan-Nea. Kamuliaan inta sinarima-Nea saḷaku Adí tuḷong i Amá. Pinongin i-Nia tua kita mokoontong kon i Allah bo tabi-Nea kon i naton.

YOHANES 17:3

Nanaa in kobiagan mononoi tua; ibogon tua bayongan intau in monotaau kon i Amá inta tongábí Sia tua in ki Allah inta mobanar, bo monotaau doman kon i Yesus Kristus inta pinotabá i Amá.

OUMAN IN RASUL MITA 4:12

Diábí in kasaḷamatan kon ibanea mako koḻikudbí in kon i Yesus tontaní, sin kon dunia naa in diábí in intau ibanea in inogoian i Allah in kawasa moposaḷamat kon i naton.”

SURAT I PAULUS KON JAMAAT RUM 1:3

Habar Mopia tatua in soaḷbí ki Adí i Allah, inta ki Tuhan naton, ki Yesus Kristus. Inta aka podudui in awak ilo-ilow naa, yo Sia tua in buíbí i Daud.

SURAT I PAULUS KON JAMAAT RUM 10:12

Tua in pakéonbí kon bayongan intau, sin diábí in yoposinea kon intau in Yahudi bo bangusa mita ibanea. Sin ki Allah inta tobatú tua in Tuhanbí in bayongan in intau. Sia in mobogoibí in barakat mobayong kon bayongan in intau inta mokituḷung kon i-Nia.

KORINTUS 1 8:4

Yo soaḷ mokaan kon kaanon inta ain pinosumba kon berhala, sabanarnea in kinotaauanbí naton kon berhala tua in diábí onda. Sin kinotaauanbí doman naton kon tongábí tobatú in ki Allah; diábí in ibanea mako.

KORINTUS 1 8:6

Táe kita in nopirisayabí kon tongábí tobatú in ki Allah. Inta nomaḻí kon bayongan bonu in dunia naa. Bo tongábí mobiag kon kopontingan-Nea in kita. Ki Tuhan in tongábí doman tobatú, tuata in ki Yesus Kristus. Pinongin i-Nia tua bayongan in yagi-yagi binaḻí, bo lantaran doman Sia dá nobiag in kita.

GALATIA 3:20

Tuamai mustibí oyúon in posibotak bain tua bo baraguna in intau mononigad. Táe ki Allah in diábí nomaké in mononigad, Siabí tontaní in namangoi.

EPESUS 4:6

bo tobatú in Allah inta nobaḻí ki Amá in bayongan intau. Sia tuata in Tuhan in dunia naa inta nogaid pinongin bayongan in yagi-yagi bo nongawasa kon bonu in yagi-yagi.

ULANGAN 6:4

Utat mita, toropdon! Tongábí ki Tuhan, bo tongábí ki Tuhan tontaní in Allah naton!

TIMOTIUS 1 6:13

Bo tanaa mako, kon tayowon i Allah inta ain nobogoi in kobiagan kon bayongan in yagi-yagi, bo kon tayowon i Kristus Yesus inta ain noguman kon onu in totuu kon i Pontius Pilatus. Poigumonku in naa kon inimu:

IBRANI 12:24

Moiko in namangoi sinumayow kon i Yesus, tonsigad in dodandian inta mobagu tua; moiko in sinumayow kon dugú pinomisik inta nojamin kon soaḷ mita inta mopia-pia nongkon onu inta jinamin in dugú i Habel.

IBRANI 7:25

Manangka intua ki Yesus in umuranbí motaau moposaḷamat kon intau mita inta namangoi kon i Allah inta mongin i-Nia. Sin Sia in nobiag mononoi bo umuran mopoyaput in mintahang kon i Allah sin kopontingan intau mita tatua.

IBRANI 8:6

Táe tanaa ki Yesus in nokouḻí kon tugas imang inta momuli-mulia nongkon inta inaidan in imang mita tatua. Sin dodandian inta pinomia-Nea kon sigad i Allah bo in intau tua in dodandianbí inta totok in mopia sin pinodoyon doman kon dandi inta totok in mopia.

IBRANI 9:15

Tuamai ki Kristus in nobaḻí tonsigad kon tobatú dodandian inta nobagu, sinbá intau inta inoinídon i Allah in motarimadon kon barakat mita mononoi inta ain pinodandi i Allah. Tua komintan in mobaḻíbí sin oyúon in minatoi; Siata in ki Kristus. Kinopatoian-Nea tatua in nopobebasbí kon intau mita nongkon taḷá mita inta pinomia monia wakutu in dodandian inta muna pinaképa.

YOHANES 1 2:1

Adíku mita! Naa mita in pinaisku kon i monimu, sinbá moiko in diádon mogaid kon dosa. Tongá aka oyúon in mogaid kon dosa, dá oyúon in mototuḷung naton, Sia tua in ki Yesus Kristus inta moadil. Sia in mayá in tayowon i Allah bo mopoigum sinbá ampungandon in taḷá mita naton.

WAHYU 1:13

Kon yua-yuak in sioḷ mita pototuduan kon togá tatua, inontongku in naonda bo intau. Sia in nogi jubah moḷanggó noidapot in sioḷ. Kon dodob-Nea oyúon in oḻingoi in dodob inta pinomia nongkon buḷawan.