TAWARIKH 2 6:4 - Alkitab Singog In Mongondow Masa In Tanaa

^4-6 Sia in noguman, “Dungkuḷmai ki Tuhan in nodandidon kon i amáku ki Daud nanaa, ‘Pinangkoipamai kon Akuoi nodia kon umat-Ku iḻumuai kon Mesir noidapot kon singgai naa, kon butá in Israel diábí in tobatúmai in kotá in piniḻí-Ku nobaḻí tampat inta musti poposindogan in baḷoi sin tampat poibadaan kon i-Nakó, bo diábí tobatúmai in piniḻí-Ku sin mobaḻí itoi in umat-Ku Israel. Táe tanaa in piniḻí-Kudon in Yerusalem nobaḻí tampat pooibadaan kon i-Nakó. Bo iko, Daud, piniḻí-Kudon sin momarenta kon umat-Ku.’ Dinayo dayowdon in ki Tuhan Allah in Israel inta ain nogintompod kon dandi-Nea tatua.!”

TAWARIKH 2 6:4 ပူးပေါင်းရင်းမြစ်များ

DATU MITA IMITÁNEA 8:15

Sia in nosingog, “Koḻipod in ki Tuhan in nodandidon kon i amáku ki Daud nanaa, ‘Pinangkoi Akuoi nodia kon umat-Ku iḻumuai nongkon Mesir, kon bayongan in butá in Israel diábí in tobatúmai in kotá inta piniḻí-Ku nobaḻí tampat poposindogan in baḷoi tampat poibadaan kon i-Nakó. Táe Iko, Daud, piniḻí-Ku sin momarenta kon umat-Ku.’ Dinayo-dayowdon in ki Tuhan Allah in Israel inta ain nogintompod kon dandi-Nea tatua!”

TAWARIKH 1 29:10

Kon tayowon in intau mobayong tatua ki Datu Daud nodayow kon i Tuhan. Sia in noguman, “Oo Tuhan Allah inta sinumba i Yakub mogoguyang nami, dinayo-dayowdon in Iko modapot in mononoi!

TAWARIKH 1 29:20

Nopaḷut mako nosambayang natua, ki Daud in noguman kon intau nobayong inta noyosipun kon tua, “Dayowdon in ki Tuhan Allahmu!” Dá bayongan in intau kon tua nodayow kon i Tuhan, Allah inta sinumba in mogoguyang monia. Bo sinumungkud in mosia sin mohoromat kon i Tuhan bo datu.

TAWARIKH 2 6:15

Iko in nogintompodon kon dandi-Mu kon i amáku ki Daud. Onu in pinodandi-Mu tua inaidan-Mudon singgai in naa.

TAWARIKH 2 6:3

Nopaḷut mako nosambayang, ki datu in inimindoidon kon bayongan in rayat inta sinimindog mako kon tua, bo pinoigumannea kon barakat i Allah in mosia.

NEHEMIA 8:6

Ki Ezra in noguman, “Dinayo-dayowdon in ki Tuhan, Allah inta moḷoben!” Bayongan in rayat notonggó kon ḻima kinoḷantud bo notubag, “Amin, amin!” Bo mosia in sinumungkud nosumba kon i Allah.

MAZMUR 41:13

Iko in motuḷung kon inakó popisí in ginaku motuḻid, bo binaḻí-Mu in akuoi nobiag moyotakin-Mu modapot in mononoi.

MAZMUR 68:4

Táe intau motoḷutui in mopia takin moḷunganga in gina, mosia in moronggiow pia in gina kon tayowon i Allah.

MATIUS 24:35

Ḷangit bo butá in moyoyangbí, táe singog-Ku naa in mononoibí.”

EPESUS 1:3

Dinayo-dayowdon in ki Allah, ki Amá i Tuhan naton ki Yesus Kristus! Sia ain nobogoi in barakat kon i naton, barakat rohani kon bonu in soroga, sin kita ain notobatú i Kristus.