TAWARIKH 2 32:5 - Alkitab Singog In Mongondow Masa In Tanaa

⁵ Bo ki datu in noginropot kon poḷoḷukadan in kotá pinongin nonompia kon dindingnea, noposindog in ḷangkeang mita kon tudunea bo noposindog in dinding ibanea kon ḷuai. Koḻikud intua nonompia doman in sia kon dinding inta pinosindognea kon tudu in butá inta pinomumbun kon dotá in pomukaan kon dotá in Yerusalem koyongan. Nopotabá doman in sia nokiaid in nobayong totok in pandong bo kaḻeaw.

TAWARIKH 2 32:5 ပူးပေါင်းရင်းမြစ်များ

DATU MITA IMITÁNEA 11:27

Noiduduimai naa in ouman pinomarontakan i Yerobeam. Kon tungkuḷ in butá kon dotá in toḷatan in Baḷoi Tuhan yogot bumbunan, bo dinding in kotá yogot in tompiaan,

DATU MITA IMITÁNEA 9:24

Butá kon dotá in toḷatan in Baḷoi Tuhan binumbunan i Salomo naonda in ki buḷoinea, inta ki adí i datu in Mesir, nomamping nongkon kotá i Daud minayá in komaḻig inta inaidan i Salomo kon inia.

DATU MITA 2 25:4

dinding in kotá dinangatandon in musung. Doḷom tua, umpaka intau in Babel koyogot mongopung kon kotá tatua, bayongan in tontara in Yohuda noḷagui nopobayá in Ḷopá in Yordan. Mosia in nongin taman in komaḻig, bo iḻumuai nongin bonawang inta nopoyoguput in dinding doyowa tatua.

TAWARIKH 2 12:1

Naonda in ḷoḻitúan in Rehabeam saḷaku datu nobaḻídon noropot, sia bo bayongan in rayat in Israel nonaḷámaidon kon hukum i Tuhan,

TAWARIKH 2 23:1

Kon taong impitunea ki Imang Yoyada in nonantúdon kon oyúon in aidannea. Noyosingogdon in sia takin in porwira taya ḻima, ki Azarya ki adí i Yeroham, ki Ismael ki adí Yohanan, ki Azarya ki adí i Obed, ki Maaseya ki adí i Adaya, bo ki Elisapat ki adí i Zikhri.

TAWARIKH 2 25:23

Ki Yoas in nodomok kon i Amazia bo dinia kon Yerusalem, bo nogumpag kon dinding in kotá tatua inta degá doyowamai nogatut nometer, pinangkoi nongkon Bonawang in Epraim nodapot in Bonawang Sikunea.

TAWARIKH 2 26:8

Intau in Amon noguboḻi kon iba kon i Uzia. Kodugang-kodugangdon in kawasanea dá sia in ponango-nangoiandon nodapot in Mesir.

TAWARIKH 2 33:14

Onda intua ki Manasye in noginḷantud kon dinding in ḷuai inta kon dotá in pomukaan kon Kotá i Daud. Pinangkoinea nongkon tampat tobatú kon ḷopá kon diug in bokaká in Gihon bo minayá ná utuan nodapot in Bonawang Toyá bo dotá in kotá inta sinangoi Opel. Kon batúan in kotá inta dininding kon Yohuda, sinampatnea doman in tobatú tongguḷu totokan in tontara.

AMSAL 25:28

Intau inta diá mokoigon kon ginanea in naonda bo kotá inta ain noumpag in dindingnea.

YEREMIA 39:4

Kon tungkuḷ in ki Datu Zedekia bo bayongan in tontaranea nokoontong kon bayongan inta nobaḻí tatua, mosia in noḷongasi noḷagui minayá in Ḷopá in Yordan doḷom doman tatua. Mosia in nongin taman in komaḻig, bo iḻumuai nongin bonawang inta nopoyoguput in dinding in tampat tatua.

YOËL 2:8

Mosia in diábí mogogundudan, mosia in mayábí podudui in daḷannea. Moyododai in mosia in mondangat kon bayongan poḷoḷukadan, diábí pomayá mako monia in pipidan in mobontow.

HAKIM MITA 9:6

Dá noyosipundon in bayongan intau in Sikhem bo Bet-Milo, bo minayá in pangkoi in kayu terpentin inta mokaramat kon Sikhem. Kon tua binaḻídon monia in ki Abimelek datu monia.