TAWARIKH 2 31:2 - Alkitab Singog In Mongondow Masa In Tanaa

² Ki Datu Hizkia in nonantúdon bui kon paanan mita in imang mita bo intau in Lewi podudui in tonsilai in oaidan monia. Oaidan mita tatua in soaḷ mita inta noiduduimai naa: moposumba in kuruban payongon bo kuruban dodamean, mopobayá in upacara ibada kon Baḷoi Tuhan, bo modayow poḷat mopoyaput in sukur kon i Tuhan kon bayongan tampat kon bonu in Baḷoi Tuhan.

TAWARIKH 2 31:2 ပူးပေါင်းရင်းမြစ်များ

TAWARIKH 1 16:37

Onda intua ki Datu Daud nonantúdon kon i Asap bo intau mita in Lewi ibanea kon umuran monompia kon soaḷ mita inta noyotogot in ibada kon tampat inta pinotagúan kon Poti Dodandian i Tuhan. Muḷoi in singgai mosia in mustibí mopobayá in oaidan monia kon tua,

TAWARIKH 1 24:1

Ki Harun in kogadí kon adí ḷoḷaki opat: ki Nadab, ki Abihu, ki Eleazar bo ki Itamar. Ki Nadab bo ki Abihu in minatoi noiuna kon i amá monia bo diápa kogadí. Tuamai in ki Eleazar bo ki Itamar inta ki utat monia in nobaḻí imang. Ki Daud in nosilai kon buí i Harun kon bonu in tongonu notonsilai podudui in oaidan monia. Kon bonu in oaidan podudui in kolompó tatua ki Daud in binantungan i Zadok buí i Eleazar bo i Ahimelek buí i Itamar.

TAWARIKH 1 26:26

Ki Selomit bo ki utatnea mita in inogoian in oaidan moḷukad kon bayongan inta inogoi inta pinosumba i Datu Daud, in tongguḷu mita in motoḷuadí, itoi mita in inanakan, bo porwira mita moḷantud.

TAWARIKH 2 23:8

Parenta i Yoyada tatua inaidan in intau mita in Lewi bo rayat in Yohuda. Intau mita inta noiḷuatdon kon oaidan kon singgai in Sabat diápa inogoi nobui. Dá bayongan in porwira motaau mopotabá in intau pinomayá inta noiḷuat kon oaidan andeka inta mosia inta bagupa sinumuot sin mopobayá in oaidan monia.

TAWARIKH 2 24:14

Naonda in oaidan tatua nopaḷut, buḷawan bo saḷaka inta ḻiunea kon tua in inogoi kon i datu bo kon i Yoyada. Bo buḷawan bo saḷaka tatua pinaké pinogaid kon pakakat mita in Baḷoi Tuhan, kon sigadnea: pakakat mita inta pakéon kon upacara ibada, pakéon kon kuruban payongon, pindan mita inta potuduan kon dupa, bo palo mita. Kon bonu in nobiagpa in ki Imang Yoyada, kuruban payongon tantúbí pinosumba kon Baḷoi Tuhan.

TAWARIKH 2 31:17

Imang mita in pinais mita in tangoi monia podudui in inanakannea, bo intau in Lewi inta umurdon doyowa nopuḷú notaong bo namonik in pinaisdon podudui in oaidan monia bo paanannea.

TAWARIKH 2 35:2

Ki Yosia in nosilai kon bayongan imang in oaidan mita inta musti aidan monia kon Baḷoi Tuhan, bo pinoki aidnea kon i monia intua mita kopiraan.

TAWARIKH 2 5:11

Bayongan in imang inta kon tua, nongkon bayongan in kolompó, ain nosadia sin momia kon upacara tatua. Bayongan in mododondong bo intau inta mopogogitog in musik kon bonu in suku i Lewi, inta ki Asap, ki Heman, ki Yedutun bo bayongan in inanakan monia, nomaké in ḷambung nongkon kaeng in lenan. Intau mita in Lewi mita tatua sinimindog kon dotá in pomukaan kon mezbah kokadai-kadai in simbal bo kecapi. Noyotakin monia 120 in imang inta nogirup kon torompet. Dondong in mododondong noyobamban in singog in musik torompet, simbal bo pakakat in musik ibanea mako. Naa in singog pinodondong monia kon i Tuhan: “Dayowdon in ki Tuhan, sin mopia in Sia. Tabi-Nea in mononoi.” Kon tungkuḷ in imang mita iḻumuai nongkon Baḷoi Tuhan, daḻídon in baḷoi tatua nopuḻing in sindar kino angoian i Tuhan, dá diádon in mosia nongingguput kon upacara ibada.

TAWARIKH 2 8:14

Podudui kon atorang mita i Daud ki amánea, ki Salomo in nonantú kon oaidan pomuḷoi in singgai in imang mita bo intau mita in Lewi inta musti mopodondong in dondong dodayow kon i Tuhan bo mobantung kon imang mita mopobayá in upacara mita ibada. Bo moḷoḷukad mita doman in Baḷoi Tuhan in sinilainea kinolompok sin moḷukad kon batúan in bonawang, pinodudui in topotundú i Daud mogogundoi i Allah.

EZRA 6:18

Bo inta pinaké kon pinogundoian kon bonu in Baḷoi Tuhan mosia in nopoyotondí kon imang mita bo intau mita in Lewi podudui in atorang inta pinais kon bonu in buk i Musa.

MAZMUR 134:1

Dondong mayá in Baḷoi Tuhan. Igai, dayow in ki Tuhan, ei bayongan in mogogundoi i Tuhan, bayongan inta mosumba kon Baḷoi-Nea kon tungkuḷ in doḷom.

YEREMIA 33:11

Táe kon tampat mita tatua in kodongoganbí bui in singog ḷunganga bo pia in gina takin dowawá in ponikaan. Kodongoganbí doman in dondong in intau mita inta nodia kon kuruban sukur kon Baḷoi-Ku. Mosia in mogumanbí, ‘Posukurdon kon i Tuhan Inta Totok in mokawasa, sin mopia in Sia bo tabi-Nea in mononoi.’ Butá tanaa in baḻíon-Kubí mobiag motompia ná dungkuḷ. Akuoi, ki Tuhan, ain noguman.”

LUKAS 1:5

Wakutu in ki Herodes nobaḻí datu kon butá in Yudea, oyúon inang, tangoinea ki Zakharia. Ki Zakharia naa in inang nongkon kolompó inta sinangoian “kolompó Abia” (imang mita buí i Eleazer). Ki buḷoinea buí doman in inang, tangoinea in ki Elisabet.

LUKAS 1:8

Kon singgai tobatú, wakutu in kolompó i Abia naa nokouḻí kon tonsilai tumuot kon Baḷoi Tuhan, dá ki Zakharia in minayá bo nogaid kon oaidan in imang kon tayowon i Allah.