TAWARIKH 2 28:5 - Alkitab Singog In Mongondow Masa In Tanaa

^5-6 Popisí in ki Datu Ahas binaradosa, dá ki Tuhan Allahnea nopomayádon kon inia sinaḷow i datu in Siria inta nogakut doman kon nobayong totok in intau in Yohuda nobaḻí intau inta dinakop pinobayá in Damsyik. Pinomayá doman mako i Tuhan in sia sinaḷow i Datu Pekah ki adí i Remalya nongkon Israel, inta kon bonu in tosinggai noḻimod kon 120.000 in tontara in Yohuda inta mongobarani. Ki Tuhan, Allah in mogoguyang monia nopomayádon intua komintan nobaḻí, sin rayat in Yohuda diádon nopandungmai kon i Tuhan.

TAWARIKH 2 28:5 ပူးပေါင်းရင်းမြစ်များ

TAWARIKH 2 24:24

Tontara in Siria in tongábí topiḻik, táe pinomayádon mako i Tuhan in mosia nonaḷow kon tontara in Yohuda inta mobaro-barong tua, sin intau in Yohuda diá mopandungmai kon i Tuhan Allah in mogoguyang monia. Natua in pinohohukum i Tuhan kon i Datu Yoas.

TAWARIKH 2 29:9

Ki amá mita naton minatoi kon pinoparangan, bo adí buḷoi naton in dinia nobaḻí intau mita inta dinakop.

TAWARIKH 2 33:11

Tuamai ki Tuhan in nopoangoi in tongguḷu totokanea in tontara in Asyur sin monubu kon Yohuda. Ki Manasye in dinomok in kokarit, bo inumantungan bo dinia pinobayá in Babel.

TAWARIKH 2 36:17

Ki Tuhan in nopogonú kon gina in datu in Babel sinbá monubu kon i monia. Ki datu tatua in noḻimod kon intau in Yohuda inta nongobagupa, noitakin doman in mosia inta kon bonu in Baḷoi Tuhan. Diábí in Sia nonotabi kon tobatúmai in intau, noguod andeka noguyang, ḷoḷaki andeka bobay, notakit andeka nosehat. Mosia komintan inogoi i Allah kon i datu in Babel.

TAWARIKH 2 36:5

Ki Yoyakin umur 25 notaong kon dodai in sia nobaḻí datu kon in Yohuda, bo sia in nomarenta kon Yerusalem 11 notaong in koonggotnea. Sia in binaradosa kon i Tuhan Allahnea.

YESAYA 7:1

Ki Datu Ahas in ki adí ḷoḷaki i Yotam ki ompu i Uzia. Kon tungkuḷ in sia nomarenta kon Yohuda, nobaḻídon in parang. Dá ki Rezin datu in Siria, bo ki Pekah ki adí ḷoḷaki i Remalya datu in Israel, namangoi nonubu kon Yerusalem. Táe mosia in diábí nokoagow kon kotá tatua.

YESAYA 7:6

Mosia in moibog monubu kon Yohuda bo nopogogondok kon intau inta nogutun kon tua sinbá dumotá kon i monia, bo noduí kon i adí ḷoḷaki i Tabeel nobaḻí datu.

YEHEZKIEL 16:57

bo aidmu moraat diápa kinotaauan? Tanaa in notongkaineadon in iko; iko in kosinganmaidon in intau in Edom, in intau in Pilistin bo in topodiugmumai mita ibanea inta moyaat in gina kon inimu.