TAWARIKH 2 22:9 - Alkitab Singog In Mongondow Masa In Tanaa

⁹ Onda intua nopotabá in sia kon intau notayak kon i Ahazia inta kon dodai intua nogadop kon Samaria. Naonda in nouḻídon in ki Ahazia, dinia in sia kon i Yehu bo iḻimod. Umpaka natua táe iḷobongbí doman monia in sia sin mohoromat in mosia kon i Datu Yosapat, ki akinea inta nogundoi kon i Tuhan takin ḻimbatú in gina. Nongkon motoḷuadí i Ahazia diábí in mokotongod mogamá kon ḷoḻitúan in pomarentaan.

TAWARIKH 2 22:9 ပူးပေါင်းရင်းမြစ်များ

DATU MITA IMITÁNEA 13:21

dá sia in nonoboḷow kon nabi inta nongkon Yohuda tatua, kainia, “Ki Tuhan in noguman kon Iko in diábí motoindudui kon i-Nia. Iko in diábí nogaid kon onu inta pinarenta-Nea kon inimu.

DATU MITA IMITÁNEA 14:13

Bayongan in rayat Israel in mononogumatoidon bo moḷobong kon inia. Tongábí sia tua in motoḷuadí i Yerobeam inta ḷobongon horomaton, sin tongábí sia in kinoibog in gina i Tuhan, Allah in Israel.

DATU MITA 2 9:34

Bo sinumuot in ki Yehu kon komaḻig bo nongaan. Onda intua noguman in sia, “Bobay tatua in kinutuk. Umpaka natua táe ḷobongdon in awaknea sin ki adí bobay i datu in sia.”

TAWARIKH 2 19:3

Umpaka natua táe oyúonpabí in mopia kon i Tuang. Ki Tuang in noḷumbúdon kon bayongan in patong i Dewi Asyera inta sinumba in rayat bo ki Tuang in noḷongasidon nobiag podudui in ibog i Allah.”

TAWARIKH 2 21:17

Mosia in nonubu kon Yohuda, bo nogagow kon komaḻig in datu, bo nodia kon bayongan adí bo buḷoi i Yehoram saḷaku intau mita inta dinakop kon parang koḻikudbí in ki Ahazia ki adínea inta muit.

TAWARIKH 2 21:20

Diábí tobatúmai in nomanasaḷ in kinopatoiannea. Iḷobong in sia kon Kotá i Daud, táe deemanbí kon bonu in poḷoḷobongan in datu mita. Kon dodai in nobaḻí datu ki Yehoram in umur toḷu nopuḷú bodoyowá notaong, bo nomarenta in sia kon Yerusalem waḷu notaong in koonggotnea.

TAWARIKH 2 21:4

Kon dodai in ki Yehoram nokotaaumai kon ḷoḻitúannea in noropotdon, dá pinoki ḻimodneadon in bayongan ki utatnea, bo tongonumai in intau moḷoben ibanea.

TAWARIKH 2 22:8

Koyogot in ki Yehu nopobayá in hukuman i Tuhan kon motoḷuadí tatua, noyodungkuḷ in sia in topaanan i intau mita moḷoben in Yohuda bo pokuadíon mita i Ahazia inta dinumudui kon pinoyodungkuḷan tatua. Dá ki Yehu in noḻimod kon i monia komintan.

TAWARIKH 2 24:25

Ki Yoas in pinaḻían nodaḷom. Naonda in minayá mako in tontara in musung, pogawainea taya dua in noyopopog. Mosia in noḻimod kon inia kon tosiugannea nobaḻí tontuḻí in pinoḻimodan kon i adí i Imang Yoyada. Ki Datu Yoas in iḷobong kon Kotá i Daud, táe deemanbí kon poḷoḷobongan in datu mita. (

TAWARIKH 2 33:24

Pogawai mita i Datu Amon noyopopog noḷawang kon inia bo poḷat noḻimod kon inia kon komaḻig.

YEREMIA 29:13

Moiko in motayakbí kon i-Nakó bo moyodungkuḷ-Kubí, sin moiko in motayak takin ḻimbatú in gina.