TAWARIKH 2 17:4 - Alkitab Singog In Mongondow Masa In Tanaa

⁴ táe tongábí moibada kon i Allah. Sia in motoindudui kon bayongan in parenta i Allah, bo kobobiagnea in diábí ná datu mita in Israel.

TAWARIKH 2 17:4 ပူးပေါင်းရင်းမြစ်များ

DATU MITA IMITÁNEA 12:28

Naonda in noporai-raimai kon tua, nomia in sia kon patong sapi buḷawan bo noguman kon rayat, “Bangusa in Israel! Noonggotdon in moiko in minayá in Yerusalem sin moibada. Tanaa in naadon in ilahmu mita inta ain nodia kon i monimu iḻumuai nongkon Mesir!”

DATU MITA IMITÁNEA 12:30

Dá rayat in nomia domandon kon dosa, sin mosia in minayá in Betel bo kon Dan sin moibada.

DATU MITA IMITÁNEA 3:3

Ki Salomo in motabi kon i Tuhan bo dinumudui kon topotundú mita i amánea, táe umuranpa in sia noratá bo noposumba in biag kon bayongan tampat.

DATU MITA IMITÁNEA 9:4

Aka iko mogundoi kon i-Nakó takin gina motuḻid bo mobanar ná ki Daud ki amámu, bo iko in motoindudui kon bayongan hukum bo parenta-Ku,

DATU MITA 2 17:19

Intau mita in Yohuda in diádon dinumudui kon hukum mita i Tuhan, Allah monia. Mosia in dinumudui kon kabiasaan mita in intau in Israel,

DATU MITA 2 8:18

Sia in notonibuḷoi takin i adí i Ahab, bo ná inta pinomia in motoḷuadí i Ahab, sia in binaradosa doman kon i Tuhan ná datu mita in Israel.

TAWARIKH 2 14:6

dá notaaudon in sia noposindog poḷoḷukadan mita kon kotá mita in Yohuda. Tongonumai notaong diábí in parang sin ki Tuhan in nobogoi in kaadaan noonow kon inia.

TAWARIKH 2 17:3

Ki Tuhan in nomarakat kon i Yosapat sin sia in dinumudui kon aid i amánea; diá in sia nosumba kon Baal,

TAWARIKH 2 21:12

Bo ki Yehoram in nokouḻí kon surat tobatú inta pinais i Nabi Elia kon wakutu in sia nobiagpa. Nanaa in tombonu in surat tatua, “Ki Tuhan, Allah inta sinumba i Daud mohukum kon i Tuang sin ki Tuang in diá dinumudui kon aid i amá bo i aki i Tuang.

TAWARIKH 2 22:9

Onda intua nopotabá in sia kon intau notayak kon i Ahazia inta kon dodai intua nogadop kon Samaria. Naonda in nouḻídon in ki Ahazia, dinia in sia kon i Yehu bo iḻimod. Umpaka natua táe iḷobongbí doman monia in sia sin mohoromat in mosia kon i Datu Yosapat, ki akinea inta nogundoi kon i Tuhan takin ḻimbatú in gina. Nongkon motoḷuadí i Ahazia diábí in mokotongod mogamá kon ḷoḻitúan in pomarentaan.

TAWARIKH 2 27:6

Kodugang-kodugang in kawasa i Yotam sin mosatia in sia bo motoindudui kon i Tuhan Allahnea.

TAWARIKH 2 29:2

Ki Hizkia in nogaid kon onu inta kinoibog i Tuhan ná ki Datu Daud mogoguyangnea.

TAWARIKH 2 34:2

Sia in nogaid kon onu inta mokosanang kon gina i Tuhan; sia in dinumudui kon oaid mopia i Datu Daud mogoguyangnea, bo dinumudui kon bayongan in hukum i Allah takin ḻimbatú in gina.

HOSEA 4:15

Ei moiko intau in Israel, moiko in diá motoindudui kon i-Nakó! Táe, harapon-Ku mako Yohuda in diá mogaid kon taḷá ná inta inaidan monimu! Dika moibada kon Gilgal andeka kon Betel. Dika mongibot kon tua podoyon kon tangoi i Tuhan inta nobiag.

LUKAS 1:6

Kobobiag inayadua motonibuḷoi tua mokosanang kon gina i Allah, sin taya dua in umuranbí dinumudui kon parenta bo atorang i Tuhan, diábí in sinaḻiban monia.

TESALONIKA 1 2:12

Kami umuran mononggina bo mobogoi in moginrigon kon gina monimu bo mondodak sinbá moiko in moidudui kon inta kinoibog i Allah. Inoiní-Nea in moiko sinbá mobaḻí umat kon Dunia-Nea inta Mobagu bo mokorasa kon kawasa-Nea inta moḷoben.

TESALONIKA 1 4:1

Pangabisannea uḻe utat mita, naa in poigumon nami takin tonggina kon i monimu inta pinodoyon kon kawasa i Tuhan Yesus, sinundúdon bo ain inontong monimu kon inami naonda in kobobiag podudui kon inta mokosanang kon gina i Allah. Moiko in nobiag bidon natua, táe tanaa pinodoyon kon kawasa i Yesus, kami in mopoigum totok kon i monimu bo mokiramuji sinbá totu-totuudon in moiko mogaid kon tua komintan!