TAWARIKH 2 15:2 - Alkitab Singog In Mongondow Masa In Tanaa

² dá minayá in sia nokipodungkuḷ kon i Datu Asa, bo noguman, “Uḻe Datu Asa, bo bayongan in intau inta nogutun kon Yohuda bo kon Benyamin! Indongogai! Ki Tuhan modagin kon i monimu aka moiko modagin kon i-Nia. Aka moiko mopoigum in topotundú i Tuhan, yo ogoian-Neabí doman. Táe aka moiko doí mopandungmai kon i-Nia, yo diábí doman in Sia mopandungmai kon i monimu.

TAWARIKH 2 15:2 ပူးပေါင်းရင်းမြစ်များ

DATU MITA IMITÁNEA 11:25

Ná doman ki Hadad, ki Datu Rezon in nosaturu doman kon Israel kon tungkuḷ in ki Salomo nobiagpa, bo nonuyayow kon butá tatua.

DATU MITA IMITÁNEA 18:18

“Akuoi in deemanbí mononuyayow,” tubag i Elia, “táe ki tuang datubí tontaní. Ki Tuang datubí bo motoḷuadí i Tuang datu in mononuyayow. Pinongin mosumba kon berhala mita in Baal, Ki Tuang datu in iḻimimpatdon kon parenta mita i Tuhan.

DATU MITA 2 21:14

Intau mita inta nogutunpa kon tua in pomayá-Kudon mako mobaḻí kokaanon in musungnea mita, inta momilang kon i monia bo mogagow kon butá monia.

TAWARIKH 1 28:9

Bo ki Daud in noguman kon i Salomo nanaa, “Adíku, igumonku sinbá ki Allah inta sinumba i amámu, in akuonmu nobaḻí ki Allahmu. Iko in mustibí mogundoi kon i-Nia takin ḻimbatúon in gina bo gina mobayag. Sin kinotaauan-Neabí in bayongan raian bo ibog naton. Aka iko motayak kon i-Nia, yo mouḻímubí in Sia, táe aka iko monaḷámai kon i-Nia, yo indoíon-Nea bidon in iko modapot in mononoi.

TAWARIKH 2 11:12

takin kaḻeaw bo pandong. Dá butá in Yohuda bo Benyamin umuran kon bonu in kawasanea.

TAWARIKH 2 12:5

Kon dodai intua ki Datu Rehabeam bo itoi mita in Yohuda ain noyosipun kon Yerusalem sin moḷagui kon i Sisak. Ki Nabi Semaya namangoi kon i monia bo noguman, “Nanaa in kai Tuhan, ‘Moiko in nonaḷámaidon kon i-Nakó, dá tanaa in taḷaan-Ku domandon in moiko modapot in moiko in kawasaandon i Sisak.’ ”

TAWARIKH 2 13:12

Itoi nami in ki Allah tontaní bo imang-Nea mita in kon naa. Mosia in nosadiadon mogirup kon torompet nobaḻí tomponuot kon kami in monubudon kon i monimu. Ei intau in Israel, dikabí moḷawang kon i Tuhan, Allah in mogoguyangmu! Diábí in moiko mokountung!”

TAWARIKH 2 13:4

Doyowa nopaanan in tontara tatua noyogintayowandon kon butá kon buḷud in Epraim. Ki Abia in notakod kon Buḷud in Zemaraim bo nomaḷú kon i Yerobeam bo kon intau in Israel, “Pokodongog!

TAWARIKH 2 15:15

Bayongan in rayat Yohuda noḷunganga in gina sin mosia in nomiadon kon ibot tatua takin ḻimbatú in gina. Mosanang in gina monia in noibada kon i Tuhan, bo ki Tuhan in noibog doman notarima kon i monia. Inogoi-Nea kon i monia in kaadaan inta moonow kon butá monia.

TAWARIKH 2 15:4

Táe naonda in mosia kinoantugan in roriga, yo nopoigumbí in mosia in totuḷung kon i Tuhan, Allah in Israel. Nopoigum in mosia in topotundú-Nea bo inogoi-Nea doman.

TAWARIKH 2 20:15

bo noguman in sia, “Tuang inta momulia takin bayongan utat mita. Ki Tuhan in noguman kon moiko in dikabí kobuḻian in kamang andeka moondok in monayow kon tontara inta mobayong tatua. Sin deemanbí moiko in moparang táe ki Allahbí.

TAWARIKH 2 20:17

Moiko in diá bidon paraḷu moropatoi kon bonu in parang tanaa. Bayádon kon tampat inta ain sinantú kon inimu bo oḷatdon kon tua. Moiko in mokoontongbí kon ki Tuhan in mobogoi in kauntungan kon i monimu. Ei intau in Yohuda bo Yerusalem, dikadon moḻia-ḻiaw in gina andeka moondok. Bayádon kon parang tatua, ki Tuhan in motuḷungbí kon i monimu!”

TAWARIKH 2 20:20

Nopoikoḷomai kon singgai, subupa totok, rayat iḻumuai bo minayá in butá kon padang gurun kon diug in Tekoa. Kon dodai in mosia mobuatdon, ki Yosapat nobogoi in koyow tanaa kon i monia, “Rayat in Yohuda bo Yerusalem! Popirisayabí kon i Tuhan Allahmu, dá mokotongodbí in moiko. Tarimadon in tonggina mita in nabimu mita, dá kodapotanbí monimu in sinayak monimu!”

TAWARIKH 2 24:20

Bo Roho i Allah in nongawasa kon i Zakharia ki adí i Imang Yoyada. Ki Zakharia in sinimindog kon tayowon in rayat bo nomaḷú, “Ki Tuhan Allah in noguman, ‘Nongonu sin moiko in diábí motoindudui kon parenta-Ku mita bo mopoboditobí in awakmu tontaní. Moiko in diábí mopandungmai kon i-Nakó, dá Akuoi in diábí domandon mopandungmai kon i monimu!’ ”

TAWARIKH 2 26:5

Ki Zakharia in mononongginanea. Kon bonu in ki Zakharia nobiagpa, ki Uzia in umuranbí nosatia in noibada kon i Tuhan dá binarakatan i Tuhan in sia.

TAWARIKH 2 32:8

Kon inia in ropot in intau, táe kon inaton in ropot i Tuhan Allah naton inta motuḷung bo moparang kon kopontingan naton.” Nokodongogmai kon tosingogon mita in datu monia tatua, rayat inangoian in barani.

TAWARIKH 2 33:11

Tuamai ki Tuhan in nopoangoi in tongguḷu totokanea in tontara in Asyur sin monubu kon Yohuda. Ki Manasye in dinomok in kokarit, bo inumantungan bo dinia pinobayá in Babel.

TAWARIKH 2 33:12

Kon bonu in roriganea tatua sinumonsiup in sia kon i Tuhan Allahnea, bo nosambayang nopoigum in totuḷung-Nea.

TAWARIKH 2 34:3

Naonda in waḷudon notaong in nobaḻí datu, kon umur inta totokpa in noguod, ki Yosia in nomangkoidon noibada kon i Allah inta sinumba i Datu Daud mogoguyangnea. Opat notaong noiduduimai nomangkoidon in sia norimumud kon tampat mita pososumbaan kon berhala, patong mita i dewi Asyera, bo berhala mita ibanea.

EZRA 8:22

Akuoi in mobangkaḷ moigum kon i datu in tontara tumotakoi kon kabaḷo sin moḷukad kon inami nongkon musung kon binayáan. Sin akuoi in nogumandon kon inia, kon ki Allah nami in momarakat kon bayongan in intau inta mogundoi kon i-Nia bo mondoí poḷat mohukum kon intau inta diá mosatia kon i-Nia.

MAZMUR 34:4

Poḷantudon in ki Tuhan takinku, igai moyotakin mopomulia kon tangoi-Nea.

MAZMUR 53:2

Intau dondunguḷ in mosingog kon bonu in gina, “Diábí in ki Allah.” Oaid monia in moraat bo moḻingá; diábí in momia kon inta mopia.

YESAYA 45:19

Akuoi in diábí tongá umuni-uni in mosingog, andeka tongá bunion kon intau ibanea. Akuoi in diábí nopotabá kon umat-Ku Israel motayak kon i-Nakó takin diá in mangaḻenea. Akuoi, ki Tuhan, mosingog kon inta banar, bo mopotaau kon onu inta totuu.”

YESAYA 51:1

Ki Tuhan in noguman: “Indongogaidon in Akuoi, ei moiko inta moibog posaḷamaton bo angoi kon i-Nakó mopoigum in totuḷung. Toropdon in buḷud batu nongkon onda in moiko noikurig, bo pongongaḻian kon batu nongkon onda in moiko in kinaḻi.

YESAYA 7:13

Bo ki Nabi Yesaya in noguman, “Aka natua, indongogai uḻe buí i Datu Daud! Diápa tugat in moiko in monungkuḷ kon kososabar in intau, modapot in moiko in monungkuḷ doman kon kososabar i Allahku?

YEREMIA 2:17

Iko tontaní in nokopopisí kon bayongan inta nobaḻí kon inimu, sin kon tungkuḷ in iko kinapit-Ku kon binayáan, iko in nonoḻikud kon i-Nakó, Ki Tuhan Allahmu.

AMOS 5:14

Poḷongasidon pogaid kon inta mopia bo dikabí in moraat, sinbá moiko in mobiag. Dá ki Tuhan Inta Totok in Mokawasa in totu-totuudon mogutun kon sigad monimu ná inta pinoguman monimu.

ZAKHARIA 1:3

Táe tanaa Akuoi in moguman kon inimu: Pobuidon mangoi kon i-Nakó, dá Akuoi in mobui domandon kon inimu.

PINOGIAPAN 14:42

Dikabí mayá! Taḷowonbí in musung mita monimu in moiko sin ki Tuhan diá kotaki-takinmu.

PINOGIAPAN 14:43

Kon dodai in moiko moyogintayow in intau in Amalek bo intau in Kanaan tatua, matoi in moiko kon parang tatua. Ki Tuhan in diábí tumakin kon i monimu sin moiko diá motoindudui kon i-Nia.”

MATIUS 13:9

“Aka kobongoḷan, yo indongogai!”

ULANGAN 20:1

“Aka moiko mayá moparang moḷawang kon musungmu mita, dika moondok in mokoontong kon kereta in parang bo kabaḷo monia inta mobayong takin tontara monia inta noiḻiu in kobayongnea nongkon i monimu. Ki Tuhan Allahmu inta nopoḷuai kon i monimu nongkon Mesir, in motuḷungbí doman kon i monimu.

ULANGAN 31:17

Aka tua bo mobaḻí, yo torú-Ku in moḷobendon kon i monia. Mosia in taḷaan-Kudon bo yopúon-Ku. Mobayong in bodito mokoondok in moiuma kon i monia, bo mosadardon in mosia kon tua mita in nobaḻí popisí in Akuoi, ki Allah monia diádon koyota-yotakin monia.

ULANGAN 4:29

Bo moiko in motayakdon kon i Tuhan Allahmu, bo aka moiko motayak kon i-Nia takin ginamu totu-totuu, yo mouḻímubí in Sia.

IBRANI 10:38

Bo umat-Ku inta mobanar in mopirisayabí bo mobiag; táe aka oyúon in kon sigad monia tua in nobaḷui in pirisaya, dá diábí mosanang in gina-Ku kon inia tua.”

IBRANI 12:25

Manangka intua mokopoingat, sin dikabo moiko in doídon mokidongog kon i-Nia inta nosingog tatua. Mosia inta doí mokidongog kon i-Nia inta namangoi in dunia naa bo inta nopoyaput in koyow nongkon i Allah, diábí mokoḷagui. Apa doman kita naa inta nokodongog kon i-Nia inta nosingog nongkon soroga! Aka kita bo doí mokidongog kon i-Nia, yo diábí mokoḷagui in kita!

YAKOBUS 4:8

Diugaidon in ki Allah, bo ki Allah in dimiugdon kon i monimu. Daritaidon in ḻimamu, moiko inta binaradosa! Bo insilangaidon in ginamu, moiko inta nonanga in gina!

YOSUA 22:31

Dá guman i Pinehas, adí i Imang Eleazar, kon intau mita in suku i Ruben, i Gad bo i Manasye kon Pomukaan, “Naa bo kinotaauandon nami kon ki Tuhan nonakindon kon i naton, sin moiko in diábí noḷawang kon i-Nia. Moiko in noposaḷamatdon kon umat in Israel nongkon hukuman i Tuhan.”

WAHYU 2:11

Ki ine in mokodongog, yo tarukira in onu in pinoguman in Roho i Allah kon jamaat mita! Mosia inta mountung, beresi bidon diá mokorasa kon roriga in kopatoian induanea.”

WAHYU 2:17

Ki ine in mokodongog, yo tarukira in onu inta pinoguman in Roho i Allah kon jamaat mita! Mosia inta mountung, ogoi-Ku mokaan kon manna inta noibuni, bo kon batúannea in motarima kon tobatú batu mobudó nongkon i-Nakó. Kon batu tatua in pinaisdon tangoi mobagu inta diábí kinotaauan i inekadon, koḻikudbí intau inta notarima kon tua.”

WAHYU 2:29

Ki ine in mokodongog, yo tarukira in onu in pinoguman in Roho i Allah kon jamaat mita!”

WAHYU 2:7

Ki ine in mokodongog, yo tarukiradon onu in pinoguman in Roho i Allah kon jamaat mita! Mosia inta mountung, ogoi-Ku mokaan kon bungai inta nongkon pangkoi in kobiagan inta nobiag kon taman i Allah.”

WAHYU 3:13

Ki ine in mokodongog, yo tarukira onu in pinoguman in Roho i Allah kon jamaat mita!”

WAHYU 3:22

Ki ine in mokodongog, yo tarukira in onu inta pinoguman in Roho i Allah kon jamaat mita!”

WAHYU 3:6

Ki ine i mokodongog, yo tarukira onu in pinoguman in Roho i Allah kon jamaat mita!”

HAKIM MITA 10:13

Umpaka natua, yo moiko in umuranpabí doman nonoḻikudmai kon i-Nakó, bo minayá nosumba kon dewa mita. Yo naa in doí bidon in Akuoi mopoḷuat kon i monimu.

HAKIM MITA 9:7

Naonda in dinongog i Yotam in soaḷ tatua, sia minayá sinimindog kon tudu in Buḷud Gerizim, bo nomaḷú kon intau mita tatua, “Indongogai in akuoi, ei intau mita in Sikhem, sinbá indongogan domandon i Allah in moiko!

SAMUEL 1 12:14

Mosanangdon totok in moiko aka mohoromat kon i Tuhan, bo mogundoi kon i-Nia, bo mokidongog poḷat dumudui kon parenta-Nea, apa doman aka moiko bo datumu tua in umuran mosatia kon i Tuhan Allahmu.

SAMUEL 1 12:15

Tongá, aka moiko diá mokidongog kon i Tuhan, bo modapotdon in moḷawang kon parenta-Nea, yo notantú bidon kon moiko bo datumu in ḷawangon bidon i Tuhan.