Tontara i Datu Asa in 300.000 in intau in Yohuda inta nomaké in kaḻeaw bo pandong, bo 280.000 in intau in Benyamin inta nomaké in kaḻeaw bo piot. Mosia in komintanbí tontara mita inta mongobarani bo nobiasadon noparang.
Kon singgai tobatú intau in Sudan inta ki Zerah in tangoinea nonubu kon Yohuda takin tontaranea inta 1.000.000 bo 300 in kereta in parang. Mosia in minayá nodapot in Maresa.
Táe ki Nabi Eleazer ki adí i Dodawa nongkon kotá in Maresa nobogoi in tompoingat kon i Yosapat, kainia, “Popisí in ki Tuang nomiadon kon yoyobayatan takin i Ahazia, ki Tuhan in morimumudbí kon oaidan i Tuang.” Dá norimumudon in kapaḷ mita inta ain pinomianea dá beresidon diá notaau iḷumeag.
Ki Uzia in noparang nonayow kon intau in Pilistin. Sia in norumbun kon dinding mita in kotá in Gad, Yabne, bo Asdod, bo noposindog in kotá mita inta dininding kon diug in Asdod bo kon butá ibanea kon Pilistin.
Bo mopuḷú doman in kotá noiduduimai noitakin doman in ḻipú mita kon diugnea: Maon, Karmel, Zip, Yuta, Yizreel, Yokdeam, Zanoah, Kain, Gibea bo Timna.
Nopaḷut mako kon tua ki Daud in nogutun kon angob mita kon buḷud kon padang gurun Zip. Sia in umuran aḷo-aḷowan mako i Saul, táe diábí i Tuhan inogoi in sia kon i datu tatua.
Onda intua tongonumai in intau nongkon Zip in namangoi kon i Saul kon Gibea bo noguman, “Ki Daud in nogadop kon butá nami kon bonu in angob mita kon diug in Hores, kon tudu in Buḷud in Hakhila kon dotá in toḷatan kon padang gurun Yohuda.
