TAWARIKH 2 1:11 - Alkitab Singog In Mongondow Masa In Tanaa

¹¹ Tubag i Allah kon i Salomo, “Onu inta inigummu tua in mopiabí totok. Iko in diábí noigum kon kaoyúonan andeka kapunyaan andeka ponango-nangoian andeka kopatoian in musungmu mita andeka moumur in kobiaganmu tontaní, táe kabijaksanaanbí bo pongotahuan momarenta kon umat-Ku inta pinoki ḷukad-Ku kon inimu.

TAWARIKH 2 1:11 ပူးပေါင်းရင်းမြစ်များ

DATU MITA IMITÁNEA 10:24

Bayongan in intau kon dunia naa in moḷongasibí mokipodungkuḷ kon i Salomo sin mokidongog kon totundú inta mobijaksana inta inogoi i Allah kon inia.

DATU MITA IMITÁNEA 3:28

Kon dodai in bangusa in Israel nokodongog kon soaḷ bontow in tosingogon i Salomo kon bonu in pelekara tatua, nobangkaḷdon in mosia kon inia. Sin noniatadon kon ki Allah ain nobogoi kon inia in kabijaksanaan sin mopoaid in inta moadil.

DATU MITA IMITÁNEA 8:18

Táe ki Tuhan in noguman kon inia, ‘Mopiabí in makusudmu tatua.

TAWARIKH 1 28:2

Ki Daud in sinimindog kon tayowon monia bo noguman, “Utatku mita inta tongobangusaku, indongogaipa! Noonggotdon in niatku moposindog in baḷoi tobatú sin potagúan kon Poti Dodandian, pomomuntukan i Tuhan Allah naton. Akuoi in nosadiadon kon moposindog in baḷoi tobatú tampat pososumbaan kon i-Nia.

TAWARIKH 2 1:12

Tuamai in kabijaksanaan bo pongotahuan in ogoi-Kubí kon inimu. Koḻikud intua baḻíon-Kubí in iko mobiag mooyúon totok, moiḻiu kon kooyúon bo moiḻiu kon tangoi in datu nongkon ondakabí pinomayá dungkuḷmai andeka kon singgai moiduduimai.”

AMSAL 14:8

Intau mobijaksana in kotaauanneabí onu in aidannea, intau bodok koakaḷan in kobobodoknea.

AMSAL 23:7

Sin, sia in moguman, “Igai mongaan; podugangpabí,” bokaka makusudnea in deemanbí natua. Mopia in singognea, táe toposibí in kon ginanea.

AMSAL 8:15

Datu mita in dinuḷuanku momarenta, mongongawasa mita in sinuḷunganku moposindog in inta moadil.

OUMAN IN RASUL MITA 5:4

Butá tatua in butámubí wakutu in diápa pinotaḷuimu. Bo naonda in pinotaḷuimudon, boḻinea in ikobí doman in kitogi. Dá nongonu sin monomayábí in iko kon diá mopia natua? Deemanbí intau in inuboḷanmu, táe ki Allahbí!”

IBRANI 4:12

Sin pirman i Allah tatua in singogbí inta nobiag bo moropot bo Siabí in moḷani-ḷanit nongkon pitow inta doyowa in matanea. Singog tatua in tumurak nodapot in nopoyotondí in jiwa bo roho; boḻikatog bo tuḷan bobubuton, sahingga in kotaauanneadon totok in raian bo niat in intau.

YAKOBUS 3:13

Aka kon sigad monimu oyúon intau inta mobijaksana bo mopandoi, yo mustibí intua poniatanea kon kobobiag mopia takin mogaid kon soaḷ mita inta mopia, inta sinakinan in gina inta diá mosiḷantud bo kabijaksanaan.

YAKOBUS 3:17

Táe intau inta nokouḻí kon kabijaksanaan nongkon i Allah, yo sia in muna-munamai totok modarit, onda intua moibog in sia kon dodamean, mobahasa mako, bo motoindudui. Moḷoben in tabinea bo oaidnea mongopia. Diábí in sia momiḻí kon intau bo diábí tongá ki ubo-uboḷmai mopia.

SAMUEL 1 16:7

Táe ki Tuhan noguman kon i Samuel, “Dikabí in iko koakaḷan in pogotnea inta moḷunat bo awaknea inta moḷantud; deemanbí sia in kinoibog-Ku. Deemanbí ná poyoyindoi in intau in poyoyindoi-Ku. Intau in moindoi kon batangannea, táe akuoi in moindoibí kon ginanea.”