TAWARIKH 1 27:1 - Alkitab Singog In Mongondow Masa In Tanaa

^1-15 Urusan pomarentaan dodatuan in Israel sinompia in tongguḷu in motoḷuadí, itoi mita in inanakan bo porwira mita. Muḷoi in taong kon bonu in tobuḷan topaanan in intau inta mogaid moyo-moyoḷuan kon bonu in tongganut in tongguḷu tobatú. Kon batúan in paanan 24.000 in intau. Naa in tangoi in tongguḷu mita in paanan inta mopobayá in oaidan muḷoi in buḷan: Buḷan imitánea: ki Yasobam ki adí i Zabdiel (sia in agat in inanakan i Peres suku in Yohuda). Buḷan nogindua: ki Dodai buí i Ahohi. Ki Miklot in oḻitnea. Buḷan nogintoḷu: ki Benaya ki adí i Imang Yoyada; sia in itoi “Paanan in Tridasawira” (ki Amizabad in oḻitnea). Buḷan noginggopat: ki Azael ki utat i Yoab (toḻiunea in ki Zebaja, adínea). Buḷan noginḻima: ki Samhut, buí i Yizrah. Buḷan noginggonom: ki Ira adí i Ikes nongkon kotá in Tekoa. Buḷan noginpitu: ki Heles, buí i Epraim nongkon kotá in Peloni. Buḷan noginwaḷu: ki Sibkhai nongkon kotá in Husa (sia in agat in inanakan i Zerah, suku in Yohuda). Buḷan noginsiow: ki Abiezer nongkon kotá in Anatot kon butá in suku Benyamin. Buḷan impuḷúnea: ki Maharai, buí i Zerah nongkon kotá in Netopa. Buḷan impuḷú bomitá: ki Benaya nongkon kotá in Piraton kon butá in suku Epraim. Buḷan impuḷú bodoyowá: ki Heldai buí Otniel nongkon kotá in Netopa.

TAWARIKH 1 27:1 ပူးပေါင်းရင်းမြစ်များ

SAMUEL 2 23:8

Naa in tangoi in tontara mita i Daud inta ponango-nangoian: Inta muna in ki Ishbaal, intau in Hakhmoni, itoi in “Paanan Toḷu”. (Triwira). Nokoimontandon kon pinoparangan sia nonaḷow kon 800 in intau bo noḻimod kon i monia komintan takin nomaké in pandongnea.

DATU MITA IMITÁNEA 4:27

Moyo-moyoḷuan, kon bonu in tobuḷan, batúan in bupati mogatod kon bahan kokaanon kon i Datu Salomo bo kon bayongan intau inta nokouḻí kon kaanon nongkon komaḻig, dá mosia in diábí kogaatan in onukabí.

DATU MITA IMITÁNEA 4:7

Ki Salomo in noduí kon mopuḷú bodoyowá in bupati kon bayongan butá in Israel. Oaidan monia tua in mosipun nongkon butá monia in bayongan kokaanon inta ogoi kon i datu bo tombonu in komaḻignea. Batúan in bupati moyoḷuan mopooyúon kon bayongan tua tumongo buḷan muḷoi in taong.

DATU MITA IMITÁNEA 5:14

bo noduí kon i Adoniram nobaḻí moindoi kon i monia. Sinilai in Salomo in mosia nobaḻí toḷu nosilai, tumopopuḷú noribu in intau kon tongosilai. Toḷu notonsilai tua moyo-moyoḷuan in mogutun tumongo buḷan kon Libanon bo doyowa nobuḷan in kon baḷoi.

TAWARIKH 1 11:10

Naa in tangoi in porwira mita i Daud inta ponango-nangoian. Takin bayongan in rayat in Israel, mosia in noḷongasidon totok sinbá ki Daud in mobaḻí datu ná inta ain pinodandi i Tuhan. Bo mosia in umuranbí moibog kon pomarentaannea.

TAWARIKH 1 13:1

Ki Datu Daud in noyosingog takin bayongan porwiranea inta nobaḻí itoi kon pinonobatúan in 1.000 in intau bo pinonobatúan in 100 in intau.

TAWARIKH 1 26:32

Bayongan in urusan in agama bo pomarentaan kon Israel kon dotá in pomukaan kon Ongkag in Yordan – inta butá in suku Ruben, Gad bo tongosilai in suku Manasye – in inogoi kon 2.700 in itoi in motoḷuadí i Yeria, mosia komintan in intau mita inta nobaḻí tongganut inta piniḻí i Datu Daud.

TAWARIKH 1 28:1

Ki Datu Daud in nomarenta sinbá bayongan in itoi in Israel moyosipun kon Yerusalem. Dá bayongan tongguḷu in suku, pojabat mita inta nokadai kon pomarentaan, tongguḷu mita in inanakan, moḷoḷukad mita kon bayongan kapunyaan bo bobiagon i datu bo ki adínea mita ḷoḷaki – impoḷok mako in tosingogon intau mita moḷoben kon komaḻig, porwira mita bo intau moponting, komintan noyosipun kon Yerusalem.

TAWARIKH 1 29:6

Dá tongguḷu mita in inanakan, tongguḷu in suku, porwira mita bo moḷoḷukad kon kapunyaan i datu in noguman doman kon mosia in moibog doman mosumbang.

TAWARIKH 2 1:2

Bayongan tongguḷu in tontara 1.000 bo 100, bayongan pojabat in pomarenta, bo bayongan tongguḷu in motoḷuadí in Israel pinarentaan i Datu Salomo

IḶUAIAN 18:25

bo sia in nomiḻídon kon tongonumai intau mita mobijaksana kon sigad in bangusa Israel. Sinundúnea in mosia nobaḻí itoi kon paanan intau toribu, itoi kon intau mogatut, itoi kon intau ḻima nopuḷú, bo itoi kon intau mopuḷú.

MIKHA 5:2

Dá, ki Tuhan in mopomayádon in umat-Nea kawasaan in musung mita monia modapot in bobay inta ain sinantú mobaḻí ki iná in mongongawasa tatua mopononggadídon kon i-Nia. Mopaḷut mako kon tua intau mita tongobangusanea inta kon pinoḷumbúan in potobatúondon bui in bangusa monia.

ULANGAN 1:15

Tuamai kon sigad in itoi mita inta piniḻí monimu, tongonumai in intau inta mobijaksana bo inta kopongalaman ginamáku bo binaḻíkudon tongguḷu kon i monimu. Oyúon in binaḻí itoi kon intau toribu, ibanea doman in binaḻí itoi kon intau mogatut, ibanea in itoi kon intau ḻima nopuḷú bo ibanea in itoi kon intau mopuḷú. Akuoi in noduí doman kon itoi mita ibanea sin moindoi bo monompia kon sukumu mita.

YOSUA 23:1

Noonggot naonda in ki Tuhan nobogoi in kobiagan notompia kon umat in Israel; mosia in diá bidon sinuyayow in musung. Kon dodai intua ki Yosua nogoguyangdon totok.

SAMUEL 1 8:12

Ibanea in binaḻínea porwira inta mobaḻí itoi kon intau toribu, bo ibanea in mobaḻí itoi kon intau ḻima nopuḷú. Datu tatua in momakisa kon i adímu mita momajeko kon gobánea, monoinut kon bungai in boyónea, momia kon ḷoḷutamnea mita bo pakakat mita in kereta parangnea.