TAWARIKH 1 25:8 - Alkitab Singog In Mongondow Masa In Tanaa

⁸ Bo aka monantú kon wakutu monia mogaid, dá morabutbí in mosia komintan kon undi, pinomayá inta nobagupa andeka inta ain nogurang, pinomayá inta ain kopongalaman andeka inta bagupa mobalajar.

TAWARIKH 1 25:8 ပူးပေါင်းရင်းမြစ်များ

TAWARIKH 1 15:22

Ki Kenanya in piniḻí sin mobaḻí tongguḷu in intau mita inta mopogogitog in musik nongkon suku Lewi, sin sia in totok in motaau in musik.

TAWARIKH 1 24:31

Kon dodai in mosia mopobayá in oaidan monia, kon batúan in tongguḷu in motoḷuadí takin ki ai-ainea tobatú inta ḷoḷaki morabut kon undi ná inta inaidan in ginaḷum monia, inta imang mita buí i Harun. Porabutan kon undi tatua inindoian mako i Datu Daud takin i Zadok, i Ahimelek bo tongguḷu mita in motoḷuadí nongkon golongan in imang mita bo nongkon golongan in intau in Lewi.

TAWARIKH 1 24:5

Sin pinomayá kon bonu in buí i Eleazar andeka kon bonu in buí i Itamar oyúon in pojabat mita in Baḷoi Tuhan bo itoi mita in agama, dá kon mosilai kon oaidan in nomaké in undian.

TAWARIKH 1 25:2

Ki adí ḷoḷaki i Asap taya opat: ki Zakur, ki Yusup, ki Netanya bo ki Asarela. Itoi monia in ki Asap, inta mopotaau in koyow nongkon i Allah, aka pokiaidan i datu.

TAWARIKH 1 25:9

Intau inta 288 tatua in sinilai kon bonu in 24 notonsilai podudui kon batúan in motoḷuadí monia. Batúan in tonsilai kobayongnea in 12 in intau kon bonu in tongganut in intau tobatú. Naa in tundugan tangoi monia podudui in undian: 1. Ki Yusup motoḷuadí i Asap 13. Ki Subael 2. Ki Gedalya 14. Ki Matica 3. Ki Zakur 15. Ki Yeremot 4. Ki Yizri 16. Ki Hananya 5. Ki Netanya 17. Ki Yosbekasa 6. Ki Bukia 18. Ki Hanani 7. Ki Yesarela 19. Ki Maloti 8. Ki Yesaya 20. Ki Eliata 9. Ki Matanya 21. Ki Hotir 10. Ki Simei 22. Ki Gidalti 11. Ki Azareel 23. Ki Mahaziot 12. Ki Hasabya 24. Ki Romamti-Ezer

TAWARIKH 1 26:13

Kon batúan in inanakan pinomayá inanakan inta mobarong andeka inanakan inta moyakag, morabut kon undi sin monotaau mongo bonawang táonda in poḷukadan monia.

TAWARIKH 1 26:16

Ki Supim bo ki Hosa in nokouḻí kon bonawang kon dotá in toyopan bo bonawang Syalekhet inta kon daḷan motakod. Oaidan moḷukad tua in sinompia námai tua dá umuran oyúon in moḷukad kon bonawang.

TAWARIKH 2 23:13

Inontongnea in datu inta mobagu tatua sinimindog kon ngara tumuot kon Baḷoi Tuhan, kon tampat inta pinoduían kon inia, iḻibu in porwira mita bo intau inta mogogirup kon torompet. Bayongan in rayat norogiow nopia-pia in gina poḷat doman nogirup kon torompet, bo intau mita inta mogogogitog in musik kon Baḷoi Tuhan dinumudui doman noginrame kon pinoramean tatua takin nopomaké in pakakat mita in musik monia. Takin sakí in gina ki Atalya nomerak kon ḷambungnea bo nomaḷú, “Bangkang! Bangkang!”

NEHEMIA 12:24

Kon bonu in tongganut i Hasabya, i Serebya, i Yesua, i Binui bo ki Kadmiel, intau mita in Lewi sinilai kon bonu in paanan mita. Pomuḷoi mako doyowa nopaanan in modayow kon i Tuhan bo mopoyaput in sukur kon i-Nia mositubagan, podudui in atorang i Datu Daud, mogogundoi i Allah tua.

AMSAL 16:33

Popisí in monotaau kon ukur, intau mopogonik in undi, táe inta motubag in tongábí ki Tuhan tontaní.

IMAMAT 16:8

Kon tua sia musti mopogonik in undi inta batu doyowa, tobatú in sinontandaan “ogoi kon i Tuhan” bo inta tobatú doman in “kon i Azazel”.

OUMAN IN RASUL MITA 1:26

Onda intua mosia nopogonik in undi, bo ki Matias in kinopiḻían. Dá sia in binaḻí rasul pinodugang kon rasul inta mopuḷú bo mita tua.