TAWARIKH 1 25:6 - Alkitab Singog In Mongondow Masa In Tanaa

⁶ Bayongan in adí i Heman tua in mopogogitog in musik simbal, kecapi bo gambus kon bonu in tongganut i amá monia sin moguyun kon upacara ibada kon Baḷoi Tuhan. Ki Asap, ki Yedutun bo ki Heman in nokouḻí kon oaidan podudui in topotundú i datu.

TAWARIKH 1 25:6 ပူးပေါင်းရင်းမြစ်များ

SAMUEL 2 6:5

Ki Daud bo bayongan in bangusa Israel minayá kon muna in Poti tatua sindaḷan motayok inimibo-ibogbí bo nodondong sin mohoromat kon i Tuhan. Nopogogitog in mosia in kecapi, gambus, rebana, kelentingan bo simbal.

DATU MITA IMITÁNEA 10:12

Kayu tatua in inaidan i Salomo bonoboi mita kon Baḷoi Tuhan bo kon komaḻig in datu; bo inaidan doman kecapi bo gambus kon intau mita mododondong. Kayu mita tatua in kayu mita sondana inta totok in mongopia inta nokoimontandon dinia mangoi kon Israel, diádon kon dodai in onda in intau nokoontong kon kayu ná kopia in kayu tatua.)

TAWARIKH 1 15:16

Ki Daud in nopotabá doman kon itoi mita in intau mita in Lewi tatua sinbá mopotabá kon tongonumai in intau nongkon suku monia sin mopodondong bo mopogogitog in dondong mita pia in gina takin kecapi bo simbal.

TAWARIKH 1 15:22

Ki Kenanya in piniḻí sin mobaḻí tongguḷu in intau mita inta mopogogitog in musik nongkon suku Lewi, sin sia in totok in motaau in musik.

TAWARIKH 1 23:5

4.000 in moḷoḷukad, bo 4.000 doman in modayow kon i Tuhan mopomaké in pakakat mita in musik inta ain sinadia.

TAWARIKH 2 20:28

Naonda in nodapot kon kotá, mosia in nopipid nopobayá in Baḷoi Tuhan sinakinan in kecapi bo torompet.

TAWARIKH 2 23:13

Inontongnea in datu inta mobagu tatua sinimindog kon ngara tumuot kon Baḷoi Tuhan, kon tampat inta pinoduían kon inia, iḻibu in porwira mita bo intau inta mogogirup kon torompet. Bayongan in rayat norogiow nopia-pia in gina poḷat doman nogirup kon torompet, bo intau mita inta mogogogitog in musik kon Baḷoi Tuhan dinumudui doman noginrame kon pinoramean tatua takin nopomaké in pakakat mita in musik monia. Takin sakí in gina ki Atalya nomerak kon ḷambungnea bo nomaḷú, “Bangkang! Bangkang!”

TAWARIKH 2 29:25

Podudui in topotundú mita inta inogoi i Tuhan kon i Daud pinongin i Nabi Gad, inta nogaid kon i datu bo pinongin i Nabi Natan, ki datu in nonampatdon kon intau mita in Lewi kon Baḷoi Tuhan sin mopogogitog in kecapi bo gambus,

NEHEMIA 12:24

Kon bonu in tongganut i Hasabya, i Serebya, i Yesua, i Binui bo ki Kadmiel, intau mita in Lewi sinilai kon bonu in paanan mita. Pomuḷoi mako doyowa nopaanan in modayow kon i Tuhan bo mopoyaput in sukur kon i-Nia mositubagan, podudui in atorang i Datu Daud, mogogundoi i Allah tua.

NEHEMIA 12:46

Pinangkoi kon i Datu Daud bo ki Asap inta monotaau totok kon musik, intau mita mododondong ain nopodondong in dondong dodayow sukur kon i Allah.

MAZMUR 68:25

Komintanbí moindoi kon pawai kinountungan-Mu, o Allah, Allahku, Datuku, sinakinan minayá kon pogogutunan-Nea.

EPESUS 5:19

Pakédon in singog mita inta nongkon Mazmur, dondong inta pinodayow kon i Allah bo dondong rohani, kon wakutu in moiko moyosingog. Kosanang in gina bo mopodondong in dodayow kon i Tuhan.

KOLOSE 3:16

Umuran kon gina-gina mako in totundú mita i Kristus inta mobarakat tua, sahingga moiko in mobijaksana bo mopandoi in motundú bo mononggina kon utat mita. Dika mokoḻiong in mopodondong in Mazmur bo dondong mita rohani; podondongdon kon i Allah takin porasaan mosukur kon bonu in ginamu.