TAWARIKH 1 21:12 - Alkitab Singog In Mongondow Masa In Tanaa

¹² Butá tanaa in kotugatan in bodito kodaitan in kaanon kon bonu in toḷu notaong, andeka ki Tuang Datu in moḷagui magí-mako sin aḷo-aḷowan mako in musung kon bonu in toḷu nobuḷan, andeka bayongan in butá tanaa kon bonu in toḷu nosinggai tubuon i Tuhan in pitownea inta pinongin yampoi in takit, bo malaekat-Nea in modia kon popatoi kon ondaka in bayáannea. Tantú in tanaa mako mongo onu in musti potaauku kon i Tuhan.”

TAWARIKH 1 21:12 ပူးပေါင်းရင်းမြစ်များ

SAMUEL 2 21:1

Kon tungkuḷ in ki Daud nomarenta, nobaḻídon in malarat moḷoben inta nobaḻí kon bonu in toḷu notaong nouput. Bo nopoigum in ki Daud in topotundú kon i Tuhan soaḷ tatua, bo ki Tuhan in noguman, “Malarat tatua in popisíbí in taḷá i Saul bo motoḷuadínea, mosia in noḻimodon kon intau mita in Gibeon.”

DATU MITA IMITÁNEA 17:1

Oyúon in nabi tangoinea in ki Elia. Sia in nongkon Tisbe, kotá tobatú kon butá in Gilead. Kon singgai tobatú namangoi in sia kon i Datu Ahab bo noguman, “Pinodoyon kon i Tuhan inta nobiag, Allah inta sinumba in intau in Israel bo inta pinogundoianku, akuoi in mopotaau in naa kon i Tuang, kon bonu in doyowa andeka toḷu notaong moiduduimai naa in diábí in oḷú andeka uyan tongopiḻikmai, koḻikudbí in aka pogumankudon.”

DATU MITA 2 19:35

Doḷom doman tua malaekat i Tuhan in namangoi kon pinononḷoḷaigan in intau in Asyur, bo noḻimod kon 185.000 in tontara. Nobangon monik doḷo-doḷom mayat mita monia tatua in noiyayitdon magí mako.

DATU MITA 2 8:1

Kon wakutu tobatú ki Tuhan nopoangoi in bodito malarat in kaanon kon butá in Israel inta nobaḻí pitu notaong in koonggotnea. Kon tungkuḷ in diápa nobaḻí intua munadon pinotaau i Elisa intua kon bobay nongkon Sunem inta ki adínea in biniagneadon bui. Pinoki pomampingan domandon i Elisa in sia takin motoḷuadínea kon ḻipú ibanea.

TAWARIKH 1 21:11

Bo minayádon in ki Gad kon i Daud bo nopotaau in koyow i Tuhan tua, gumannea, “Onda in piḻíon i Tuang Datu:

MAZMUR 91:6

kon bodito inta namangoi nongkon sindip, andeka korimumudan inta moidantug kon tungkuḷ in moutu in singgai.

IḶUAIAN 12:23

Kon dodai in ki Tuhan modondaḷoi kon butá tanaa sin moḻimod kon intau mita in Mesir, ki Tuhan in mokoontong kon dugú inta kon oigi ḷoḻingkop doyowa bo kon ngara kon dotá in ḻimonik; dá tongá taḻiban-Nea mako natua bo diá ogoi-Nea in Malaekat Maut tumuot kon baḷoimu sin moḻimod kon i monimu.

YESAYA 66:16

Sin bayongan in intau inta kinokadapatan kotaḷá in hukumon-Neabí in tuḷú bo pitow, bo mobayongbí in hukumon matoi.

YEREMIA 12:12

Nongkon ḷoḷan in padang gurun kon buḷud, intau mita mamangoi sin mogagow. Akuoi in nopoangoi in parang sin momoguyaat kon bayongan in ḻipú dá diádon tobatúmai in mobiag modame.

YEREMIA 42:16

“Parang bo gogoy inta kinoondok monimu tua in momatukbí kon i monimu modapot in Mesir, bo moiko in matoibí kon butá tatua.

YEREMIA 47:6

Moiko in momaḷú, ‘Modapot in toonu iko in monubu, ei pitow i Tuhan? Tungkogdon kon gumámu bo kibio-biómaidon kon tua kaasí!’

OMBAḶ 4:9

Mororiga in mosia bo koonggot-koonggot matoidon, popisí in beresidon diá in kaanon; inta matoi kon poparangan, in mopia-pia kon inta matoi in gogoy.

IMAMAT 26:10

Bungai in boyó kon butá monimu in moguntu-guntuḷdon, dá tugatbí kaanon kon bonu in totaong. Modapot in pakisadon poḷuaion monimu in ḻiu in bungai in boyó inta noonggotdon sinbá oyúonpa in potagúan kon bungai in boyó inta bagu binatun.

IMAMAT 26:17

Hukumon-Ku in moiko, modapot in moiko taḷowondon in musungmu mita moiko kawasaandon in intau mita inta mosaturu kon i monimu. Agían totok in ondok moiko dapot in moḷagui moiko, umpaka diá in mogaḷow.

LUKAS 4:25

Táe indongogai in singog-Ku naa: kon tungkuḷ i Nabi Elia, wakutu in kinodaitan kaanon sin toḷudon notaong kapin in diá nonguya-nguyan. Wakutu intua noantó in dongkadon boba-bobay kon Israel.

OUMAN IN RASUL MITA 12:23

Bo kon dodaipa doman intua sinokap in malaekat i Allah in sia sin totokdon mopoompámai kon i Allah. Pangabisannea minatoi in sia bo kinaan in oḷuasi mita.

ULANGAN 28:15

“Táe aka moiko diá motoindudui kon i Tuhan Allahmu, bo diá doman mosatia in mopoaid kon bayongan parenta bo hukum-Nea inta pinotaauku kon inimu singgai naa, dá bayongan in kutuk tanaa in moiuma kon i monimu:

ULANGAN 28:22

Ki Tuhan in mohukum kon i monimu pongin takit mita inta dumodakit, bobagá mita bo patú. Sia in mopoangoi doman in patú inta mokoingkag kon butá bo tompot inta mokopokak dá bungai in boyómu mogoguyaat. Bodito mita tatua in tantú moiuma kon i monimu modapot in moiko moyopú.

ULANGAN 28:25

Aka moiko diá motoindudui kon i Tuhan Allahmu, baḻíon-Nea in moiko taḷowon in musungmu mita. Motompiabí in pononubú monimu, táe posibayádon in moḷagui. Bayongan in bangusa kon dunia mokoningkimdon mokoontong kon kososoemu.

ULANGAN 28:27

Ki Tuhan in mohukumbí kon i monimu takin mopouma in bituḷ mita ná inta pinopouma-Nea kon intau mita in Mesir. Awakmu in mopuḻingdon in kekeb bo momuka inta mokokatoḷ, táe diábí in undamnea.

ULANGAN 28:35

Ki Tuhan in mopomukádon in kekeb mita inta monakit bo inta diádon mopia; nongkon sioḷ modapot in uḷu monimu mopuḻingdon in bituḷ mita.