TAWARIKH 1 20:1 - Alkitab Singog In Mongondow Masa In Tanaa

¹ Kon sempo in pononubú noiduduimai, kon tungkuḷ in datu mita biasamai mayá moparang, ki Yoab in nonongganutdon kon tontaranea bo nogagow kon butá in Amon. Kon tungkuḷ intua ki Datu Daud in umuranpa kon Yerusalem bo diá dinumudui. Ki Yoab bo tontaranea in nongopung kon kotá in Raba, bo nonubu poḷat nomayong kon kotá tatua.

TAWARIKH 1 20:1 ပူးပေါင်းရင်းမြစ်များ

SAMUEL 2 11:1

Datu mita biasamai in mayá moparang kon sempo in pononubú in kayu. Bo kon sempo in pononubú in kayu kon taong tatua nopotabá in ki Daud kon i Yoab minayá noparang takin porwiranea mita bo bayongan tontara in Israel; bo nonaḷow in mosia kon intau in Amon poḷat noḻibut kon kotá in Raba. Táe nogutunpa in ki Daud kon Yerusalem.

SAMUEL 2 17:27

Naonda in ki Daud noidapot kon Mahanaim, sinontomu in sia i Sobi adí i Nahas nongkon kotá in Raba kon Amon, bo i Makhir adí i Amiel nongkon Lodebar, bo i Barzilai nongkon Rogelim kon Gilead.

DATU MITA IMITÁNEA 20:22

Onda intua nabi tatua in namangoi kon i Ahab bo noguman, “Tanaa, maníka in ki tuang in mobui bo dugangan kon ropot bo poḷat monompia bui kon tomayá, sin ki datu in Siria in buibí mamangoi monubu kon sempo in pononubú moiduduimai.”

DATU MITA IMITÁNEA 20:26

Kon sempo in pononubú noiduduimai nopotabádon in sia in tontaranea bo nopobayá ná kotá in Apek sin monubu kon intau in Israel.

DATU MITA 2 13:20

Diá noonggot kon tua minatoidon in ki Elisa bo iḷobong. Kon dodai intua banselang mita in Moab biasamai in monubu kon butá in Israel komintan in totaong.

TAWARIKH 1 19:19

Kon dodai in datu mita inta kinawasa i Datu Hadadezer, nokoontong kon mosia in sinaḷowdon in tontara in Israel, mosia in nopoigum sinbá modamedon takin i Daud, bo motoguondok kon inia. Nopaḷut mako kon tua intau in Siria doídon mobantung bui kon intau in Amon.

YESAYA 54:16

Akuoibí inta nomaḻí kon mononontaḷ inta nongokab kon tuḷú sin ponontaḷan kon sonjata. Akuoibí doman inta nomaḻí kon tontara inta nopomaké in sonjata tatua sin moḻimod.

YESAYA 6:11

Akuoi in noḻibó, “Dapot in toonu in kaadaan tanaa, Tuhan?” Tubag-Nea, “Modapot in kotá mita mogoguyaatdon bo diádon in mogogutunnea, baḷoi mita diádon inutunan, bo butá in diádon in bonunea bo moḷogatdon,

YEHEZKIEL 25:5

Kotá in Raba in baḷuian-Ku mobaḻí popokaanan kon unta, bo sinangkub in butá in Amon mobaḻí popokaanan in domba. Dá kotaauandon monimu kon Akuoibí in ki Tuhan.’ ”

AMOS 1:14

Tuamai, potabá-Kubí in tuḷú kon dinding mita in kotá in Raba, bo momokak komintan kon bentengnea mita. Kon tungkuḷ intua kodongogandon in dowawá in parang, bo parang tumagabdon naonda bo deḷang.

ULANGAN 3:11

Ki Datu Og naa in intau in Repaim inta pangabisan. Poti mayatnea pinomia nongkon batu, kobanatnea in opat nometer bo kooḷadnea in gogió bo doyowa nometer podudui in ukuran inta ain sinantú. Umaai in tanaa motaaupabí indoian kon Raba, kotá in intau in Amon.)