SAMUEL 2 6:20 - Alkitab Singog In Mongondow Masa In Tanaa

²⁰ Kon tungkuḷ in mobuidon in ki Daud kon komaḻig sin mopoyaput in salam kon motoḷuadínea, iḻumuai in ki Mikhal nokipodungkuḷ kon i Daud bo noguman, “Singgai in naa datu in Israel totu-totuudon nopohoromat kon awaknea tontaní! Nomilangdon in sia naonda bo intau dondunguḷ inta diádon kooyá kon tayowon in ata mita bobay buḷoi in pogawai mita in komaḻig!”

SAMUEL 2 6:20 ပူးပေါင်းရင်းမြစ်များ

KINOBAḺIAN 18:19

Sia ain piniḻí-Ku sinbá motundú kon i adínea mita bo kon buínea sinbá motoindudui kon i-Nakó bo mogaid kon onu inta mopia bo moadil. Aka soaḷ tatua aidan monia, yo bayongan in dandi-Ku kon i Abraham in intompodan-Ku.”

SAMUEL 2 6:14

Onda intua notayokdon totok in ki Daud takin ḷunganga in gina sin mohoromat kon i Tuhan. Kon dodai intua tongá in sia nomaké in sosapi linen inta nopoḷok inta sinogot kon ogotannea.

SAMUEL 2 6:16

Naonda in Poti tatua diniadon potuoton kon bonu in kotá, ki Mikhal adí bobay i Saul iḷumongow nongkon jandela bo inontongnea in ki Datu Daud ḷumansi-ḷansik in motayok sin mohoromat kon i Tuhan, bo nooyá in ki Mikhal in nokoontong kon i Daud.

SAMUEL 2 6:18

Bo sia in nomarakat kon rayat in Israel pinodoyon kon tangoi i Tuhan Inta Totok in Mokawasa.

SAMUEL 2 6:19

Bodongka nosilai kon kaanon kon i monia komintan. Bayongan in intau inta kon tua, ḷoḷaki andeka bobay inogoiannea in ponoyá tumongo bonsig inta inangag, roti bo kukis kismis. Nopaḷut mako kon tua nobuidon in mosia kon baḷoinea-baḷoinea.

TAWARIKH 1 16:43

Onda intua nobuidon in bayongan intau kon baḷoinea-baḷoinea. Natua domandon ki Daud nobui sin moindoi kon motoḷuadínea.

AYUB 30:8

Mosia tua in diá in tangoi bo diá in boḻinea, intau mita inta ain binuntun nongkon butánea.

MAZMUR 101:2

Akuoi in monaridi kon kobobiag inta diá in bogit. Moibog degá in Iko mamangoi kon inakó? Akuoi in moibog mobiag motusi kon baḷoiku,

MAZMUR 30:1

Mazmur i Daud. Dondong pongimpaḷutan kon baḷoi i Allah.

MOHOHUTUBA 7:17

Dika doman moiḻiu in raat andeka moiḻiu in bodok. Onubí in mangaḻe in matoi aka deemanpa wakutunea?

MARKUS 14:66

Wakutu in ki Petrus kon palaspa, tobatú ata bobay i imang moḷoben minayá intua.

MARKUS 3:21

Intau mita in noguman, “Nobundaidon in Sia nion!” Bo naonda in kinodongogan in ginaḷum-Nea in singog monia tua, binayádon monia ginamá in ki Yesus.

YOHANES 13:6

Bo nodapotdon in Sia kon i Simon Petrus. Ki Simon Petrus naa noguman, “Tuhan, umpaka dá ki Tuhanbí in mondarit kon sioḷ-Ku?”

YOSUA 24:15

Aka kuma bo moiko doí mogundoi kon i Tuhan, ponantúdon kon tosingogon in singgai naa doman ki ine in koibog monimu sumbáan: kon i ilah mita ibanea inta sinumba in mogoguyangmu kon Mesopotamia koḻipod ande kon ilah mita in intau in Amori inta butánea in pinogutunan monimu masai naa. Táe kami – akuoi bo tombonu in baḷoiku – in umuranbí mogundoi tongá kon i Tuhan.”

HAKIM MITA 9:4

Onda intua mosia nobogoi kon inia in doit saḷaka pitu nopuḷú inta ginamá nongkon baḷoi pososumbaan kon i Baal-Berit. Doit tatua pinonondan i Abimelek kon kolompó in intau mita inta mongoraat sinbá moyotakinneadon,

SAMUEL 1 14:49

Ki adí mita ḷoḷaki i Saul in ki Yonatan, ki Yiswi, bo ki Malkisua. Ki adínea bobay inta guya-guyang tangoinea in ki Merab, bo inta nogindua tangoinea in ki Mikhal.

SAMUEL 1 18:20

Ki Mikhal adí bobay i Saul inta ibanea noibogdon kon i Daud. Naonda in ki Saul nokodongog kon tua, noibog doman in sia.