SAMUEL 2 20:9 - Alkitab Singog In Mongondow Masa In Tanaa

⁹ Ki Yoab in noguman kon i Amasa, “Onu in habar, yobayat?” ḻimanea koḷanan in nokadai kon kumi i Amasa naonda bo mongayok kon inia.

SAMUEL 2 20:9 ပူးပေါင်းရင်းမြစ်များ

SAMUEL 2 15:5

Aka oyúon in intau in dimiug kon i Absalom sin tumungkud mosumba kon inia, dá ki Absalom mopoabat in ḻimanea bo gakapannea poḷat ayokannea.

SAMUEL 2 17:25

Ki Absalom ain noduí kon i Amasa nobaḻí tongguḷu in tontara nonoḻiu kon i Yoab. Ki Amasa adí i Yitra intau in Ismael; ki inánea tangoinea in ki Abigail adí i Nahas, inta ki utat bobay i Zeruya ki iná i Yoab.)

SAMUEL 2 18:29

Ki datu in noḻibó, “Nosaḷamat degá in ki Absalom inta nobagupa in kinobiagannea tua?” Ki Ahimaas in notubag, “Tuang datu, koina kon dodai in akuoi pinotabá i Yoab, akuoi in nokoontong kon pinoropatoian moḷoben, táe diábí kinotaauanku mongo onu in nobaḻí.”

SAMUEL 2 3:27

Naonda in ki Abner nodapotdon kon Hebron, inanutan i Yoab in sia minayá sinimí nopobayá in diug in ngara moḷoben, naonda bo oyúon in oumanon inta diá motaau kodongogan in intau ibanea. Bo daḻídon sinumbuk i Yoab kon sian in ki Abner nodapot in minatoi in sia. Ki Abner minatoi iḻimod i Yoab sin nonuḻí kon kinopatoian i ai-ainea ki Asael.

DATU MITA IMITÁNEA 2:32

Ki Tuhan in mohukum kon inia popisí in sia noḻimod diá kinotaa-taauanmai i amáku. Ki Abner porwira in Israel, bo ki Amasa porwira in Yohuda, taya dua in tumpaḷa diá kotaḷá. Mosiabí in mopia-pia nongkon i Yoab, táe iḻimodnea in mosia.

MAZMUR 55:21

Yobayatku dungkuḷmai monubu kon yobayatnea mita, iḻimimpatdon in sia kon dodandiannea.

AMSAL 26:23

Naonda bo kuyon butá sinopuan in saḷaka, natuata in intau inta mopia kon singog, táe moraat kon gina.

AMSAL 27:6

Yobayat in mopomongkug in tabi, táe musung in monggakap takin bisa.

YEREMIA 41:2

ki Ismael takin intaunea taya mopuḷú tua in norabut kon kedang monia bo noḻimod kon i Gedalya, gubernur inta dinuí in intau in Babel tatua.

MIKHA 7:2

Intau motuḻid diádon in kon butá, intau inta motoindudui kon i Allah diádon mouḻí. Batúan in intau komintandon mogoḷat kon kasampatan moḻimod. Kon batúannea motaan kon poyogaḷap kon tumpaḷa intau.

HAKIM MITA 3:15

Táe naonda in umat Israel nokuani nokituḷung kon i Tuhan, inogoi i Tuhan in ki Ehud sin nopoḷuat kon i monia. Ki Ehud naa in ḻimanea koḷoigi in moropot; sia in ki adí i Gera nongkon suku Benyamin, bo sia tua inta biasamai mogatod kon i Datu Eglon kon iba inta musti uboḻian in umat in Israel.