SAMUEL 2 18:9 - Alkitab Singog In Mongondow Masa In Tanaa

⁹ Kon dodai in ki Absalom sinumakoi kon bagalnea, bo daḻídon in sia noyodungkuḷ in intau i Daud. Bagal tatua in sinumaḻib kon pangkoi in kayu inta moḷoben táe noompá, dá noiandupdon in uḷu i Absalom kon tanganea tobatú. Bagalnea tatua in noribatukdon turus táe ki Absalom in kinotaḷáan bo noitadangdon mako kon tua.

SAMUEL 2 18:9 ပူးပေါင်းရင်းမြစ်များ

SAMUEL 2 13:29

Bobantung mita tatua nogaid kon onu in pinoki aid i Absalom, bo iḻimodon monia in ki Amnon. Nokoontongmai kon natua in ki adí mita ḷoḷaki i Daud ibanea baḷúdon sinumakoi kon bagal monia kon batúannea bo noḷagui.

SAMUEL 2 14:26

Buoknea in totuu mobarong, bo musti in sia mokigonsing totaong in komintan sin mobogatdon in korasaannea. Buok inta ginonsingnea tatua kobogatnea in noiḻiu kon doyowa nokilo podudui in pononimbangan i datu.

SAMUEL 2 17:23

Naonda in kinotaauan i Ahitopel kon tongginanea in diá dinuduian, sia nopopakédon in ḷoḻitúan kon keledainea bo nobui kon kotánea tontaní. Naonda in noginḷapat mako kon bayongan in oaidannea ginumantongdon in sia, bo iḷobong kon bonu in poḷoḷobongan kon inanakannea.

SAMUEL 2 18:10

Intau i Daud tobatú nokoontong kon inia bo pinotaaunea kon i Yoab, “Tuang, koina inontongku in ki Absalom noitadang mako kon tanga in kayu moḷoben!”

SAMUEL 2 18:14

“Natuapa! Modaitdon in kasampatan tongá mobobayowan takinmu,” guman i Yoab. Bo ki Yoab nogamá kon pandong toḷu bo pinotakuḷnea kon dodob i Absalom inta nobiagpa bo noitadang mako kon tanga in kayu.

SAMUEL 2 18:8

Pinoparangan tatua noibaya-bayádon mako kon bayongan in butá tatua, bo mobayo-bayong kon minatoi in intau sin noiḷaḻe kon kayuon noiḻiu kon inta minatoi kon pinoparangan.

AYUB 31:3

Bodito bo roriga in notantúbí kon poangoi-Nea kon intau inta nogaid kon inta moraat!

AMSAL 20:20

Intau inta mogodi-godimai kon guyanganea, kobiagannea in moinggamábí naonda bo togá inta mopiong kon doḷom inta sindip.

AMSAL 30:17

Intau inta moningkuḻe kon i amánea andeka kon i inánea inta ain nogoguyang, patusbí pogambat kon ḷuai sinbá matanea padokon in ḷagapan kawag bo awaknea in kaanon in ḷagapan boniá.

YEREMIA 48:44

Intau inta moḷagui nongkon gogondok in moḷabúbí kon bonu in bubú, bo inta ḷumuai nongkon bubú tatua in kodomokanbí in poyogaḷap. Tua mita in mobaḻíbí kon wakutu inta ain sinantú-Ku kon morimumud kon Moab.

MATIUS 27:5

Bo pinogarabnea in doit tatua kon bonu in Baḷoi Tuhan, bo minayá ginumantong.

MARKUS 7:10

Ki Musa in nobogoidon in parenta nanaa, ‘Horomatdon in ki amá bo ki inámu,’ bo ‘Ki ine in moposingo-singogmai kon i amá ande kon i inánea, musti hukumon matoi.’

GALATIA 3:13

Táe ki Kristus ain nomilat kon i naton nongkon kutukan in hukum i Musa tatua. Sia nopomayádon mako in awak-Nea tontaní kinutuk sinbá kita in mopilat kon kutukan. Sin kon Buk Motusi ain pinais, “Kinutukdon in intau inta minatoi binambé kon kayu pinoyotaḻempang.”

ULANGAN 21:23

yo mayat tatua in diábí motaau pomayá mako kon tua tonggobii tua, táe mustibí ḷobongon kon singgai doman tua. Mayat inta noibambé mokopoangoi kon kutuk nongkon i Allah kon butá. Dá ḷobongdon in mayat tatua sinbá moiko in diá mokokotor kon butá inta inogoi i Tuhan Allahmu kon inimu.

ULANGAN 27:16

‘Kinutuk in intau inta diá mohoromat kon guyanganea bo mopomayá mako kon i monia.’ ‘Amin!’

ULANGAN 27:20

‘Kinutuk in intau inta mopoompámai kon i amánea popisí in nosiugdon takin buḷoi tobatú i amánea.’ ‘Amin!’