SAMUEL 2 17:11 - Alkitab Singog In Mongondow Masa In Tanaa

¹¹ Tuamai nanaa in tongginaku: Sipundon in bayongan intau in israel nongkon bayongan in butá, modapot in kobayongnea in nádon bungaion kon pintad. Bo ki Tuangdon tontaní in modia kon i monia mayá moparang.

SAMUEL 2 17:11 ပူးပေါင်းရင်းမြစ်များ

KINOBAḺIAN 13:16

Akuoi in mobogoi kon inimu in buí inta totok in mobarong, dapot in diádon tobatúmai intau in mokoiap kon i monia. Ná doman ḷobud inta diá koiapan in intau, yo ná doman tua in buímu mita diá doman koiapan in intau.

KINOBAḺIAN 21:14

Nobangon monik doḷo-doḷom, ki Abraham nobogoi in kaanon bo botutu kuḻit binonuan in tubig sin baḷun monia kon daḷan. Pinopobabaneadon kon i Hagar in adí tatua, bodongka pinotabánea minayá in bobay tatua. Ki Hagar in nobuatdon bo minayá nongin padang gurun Bersyeba.

KINOBAḺIAN 22:17

Akuoi mobogoi in barakat kobarongon totok kon inimu bo baḻíon-Ku in buímu moantó naonda bo tundi kon ḷangit bo ná kobayong in bungayon kon bingkí in dagat. Ki adí bo ki ompumu in monaḷowdon kon musung mita monia.

SAMUEL 2 12:28

Tanaa, in mokituḷungpa kon i Tuang bo sipunonpa in ki agat in tontara naton, bo modia kon i monia mayá moparang mogagow kon kotá tatua. Sinbá diá tangoion in intau kon akuoi in nogagow kon kotá tatua.”

SAMUEL 2 24:2

Bo ki Daud in nogumandon kon i Yoab Tongguḷu totokan in tontaranea, “Bayádon takin porwiramu mita kon bayongan in suku Israel bo kon bayongan in butá sin mogiap kon intau. Moibog in akuoi monotaau kon kobayong monia.”

DATU MITA IMITÁNEA 20:10

“Ki datu nami in mopotabádon mangoi in tontara inta mobayong totok sin morimumud kon kotámu, modapot in ḷobud kinogoguyaatan in kotámu tatua koakutan monia modait tongábí momaké in ḻima monia. Sia in nongibot sinbá dewa mita mohukum, nodapot doman in moḻimod kon inia, aka diá in sia momia kon tua!”

DATU MITA IMITÁNEA 4:20

Rayat in Yohuda bo in Israel kobayongnea in naonda bo bungaion kon pintad. Kon i monia tua oyúonbí in kaanon bo inumon inta tugat pakéon bo nobiag doman nosanang.

MAZMUR 9:16

Bangusa mita inta diá nonotaau kon ini-Mu notopak kon bubú inta kinaḻi monia tontaní; mosia in noibaaḷ kon pukot monia tontaní.

YOSUA 11:4

Dá namangoidon in datu mita tatua takin bayongan in tontara monia inta totok in mobayong nádon bungaion kon pintad. Kabaḷo bo kereta in parang monia in mobarong domandon totok.

HAKIM MITA 20:1

Dá namangoidon in bayongan umat in Israel nongkon Dan kon utuan nodapot in Bersyeba kon toḷatan, bo Gilead kon pomukaan, sin dumudui kon oiní tatua. Mosia in noyosipun bo notobatú kon Mizpa kon tayowon i Tuhan.

SAMUEL 1 13:5

Bo kon dodai intua intau in Pilistin noyosipun domandon sin monubu kon intau in Israel; kon dotá monia oyúon in 30.000 in kereta in parang, 6.000 in intau sinumakoi kon kabaḷo, bo prajurit mita ná kobayong in bungaion kon pintad. Mosia in noyosipun kon Mikhmas kon dotá in pomukaan kon Bet-Awen.

SAMUEL 1 3:20

Tuamai in bayongan umat in Israel nongkon bayongan butá tatua nongaku kon ki Samuel tua in nabi i Tuhan. Pomuḷoi in ki Samuel mosingog, bayongan in bangusa Israel in mokidongogdon. Ki Tuhan umuranpabí mokipogontong kon Silo, kon tampat inta pinoki pogontongan-Nea muna kon i Samuel bo moyosingognea.