SAMUEL 2 14:2 - Alkitab Singog In Mongondow Masa In Tanaa

² tuamai nokioiní in sia in bobay mobijaksana tobatú inta nogutun kon Tekoa. Naonda in bobay tatua noyaput mangoi, noguman in ki Yoab kon inia, “Ki iná in musti ki ubo-uboḷmaidon nonogumatoi; pogiḷambungdon in ḷambung pinonogumatoian, bo dika momaké in ḷana mobondu. Pomiadon naonda bo bobay inta ain noonggot in nongombaḷmai kon kinopatoian in intau inta totok in kinotabinea.

SAMUEL 2 14:2 ပူးပေါင်းရင်းမြစ်များ

KINOBAḺIAN 38:19

Ki Tamar nobui kon baḷoinea bo nobuká kon oḻingoi in pogotnea, bodongka nomaké bui in ḷambungnea saḷaku mobobaḷu.

SAMUEL 2 11:26

Naonda in kinodongogan i Batsyeba kon ki buḷoinea in minatoidon, nonogumatoidon in sia.

SAMUEL 2 12:20

Dá sinimindogdon in ki Daud nongkon taḷog, bo noinggú poḷat nonaid kon buoknea, bo nomaḷuidon kon ḷambung. Onda intua minayá in sia noibada kon Baḷoi Tuhan. Nopaḷut mako kon tua minayádon bui in sia kon komaḻig, bo nokioḷud in kaanon pongaanannea, bo nongaandon in sia.

SAMUEL 2 20:16

Kon kotá tatua oyúon in bobay tobatú inta mobijaksana, bo sinimindog in sia kon dinding bo nomaḷú, “Indongogai! Indongogai! Poigumdon bá ki Yoab mamangoi in naa; akuoi in moibog mongonguman takinnea.”

DATU MITA IMITÁNEA 14:2

Noguman in ki Yerobeam kon i buḷoinea, “Posadiadon sin mayá in Silo kon baḷoi in Nabi Ahia inta koḻipod noguman kon akuoi in mobaḻí datu in Israel. Táe tumon intau ibanea sinbá diá kotaauan in intau mongo ki ine in iko.

DATU MITA IMITÁNEA 14:5

Táe ki Tuhan in nopotaaudon kon inia kon ki buḷoi i Yerobeam in nion namangoi sin moḻibó kon takit i adínea. Bo pinotaau domandon i Tuhan kon i Nabi Ahia onu in musti pogumannea. Naonda in ki buḷoi Yerobeam noiyaput intua, sia in kimia-miamai naonda bo intau ibanea.

TAWARIKH 2 11:6

kotá in Betlehem, Etam, Tekoa,

TAWARIKH 2 20:20

Nopoikoḷomai kon singgai, subupa totok, rayat iḻumuai bo minayá in butá kon padang gurun kon diug in Tekoa. Kon dodai in mosia mobuatdon, ki Yosapat nobogoi in koyow tanaa kon i monia, “Rayat in Yohuda bo Yerusalem! Popirisayabí kon i Tuhan Allahmu, dá mokotongodbí in moiko. Tarimadon in tonggina mita in nabimu mita, dá kodapotanbí monimu in sinayak monimu!”

NEHEMIA 3:27

Tongonumai nosilai in dinding noiduduimai in sinompia in intau mita tanaa kon bonu in pipidan noiduduimai naa: Intau mita in kotá in Tekoa: dinding nongkon muna in ḷangkeang poḷoḷukadan kon Baḷoi Tuhan noidapot kon dinding in butá in Opel. Imang mita inta nogutun kon diug in Bonawang Kabaḷo: dinding inta noyogintayow in baḷoi monia kon batúannea nongkon bonawang tatua nopobayá ná utuan. Ki Zadok ki adí i Imer: dinding inta noyogintayow in baḷoinea. Ki Semaya ki adí i Sekhanya, moḷoḷukad kon Bonawang kon dotá in pomukaan: dinding inta noyogintayow in baḷoinea. Ki Hananya ki adí i Selemya bo ki Hanun ki adí Zalap inta inggonomnea. Ki Mesulam ki adí i Berkhya: dinding inta noyogintayow in baḷoinea. Ki Malkia, mogogaid kon buḷawan: dinding inta noyogintayow noidapot kon asrama in intau mita inta mogaidmai kon Baḷoi Tuhan bo baḷoi mita in mododagang kon muna in Bonawang Mipkad bo noidapot kon diug in gopot kon ḻimonik kon siku in dinding kon dotá in timur laut. Mogogaid mita kon buḷawan bo mododagang: kon dinding inta imbuitnea pinangkoi kon gopot kon ḷundukan kon siku in dinding noidapot kon Bonawang Domba.

MAZMUR 104:15

bo mobogoi in anggur inta mokopia kon gina. Ḷana in zaitun doman inta mokotarimbuka mako kon pogotnea, bo kaanon inta mokoropot kon inia.

MOHOHUTUBA 9:8

Pokotarimbukabí bo pokopobayag in pogotmu.

YEREMIA 6:1

Bayádon poḷagui, ei intau mita in Benyamin! Taḷaaidon in Yerusalem! Irupdon in torompet kon Tekoa, bo poyongkitdon in tuḷú tomponuot kon Bet-Kerem! Bodito bo roriga moḷoben in mongindoyó nongkon utuan.

AMOS 1:1

Ki Amos in gombala tobatú in domba nongkon kotá in Tekoa. Sia in nobaḻí nabi kon tungkuḷ in butá in Yohuda pinarentaan i Datu Uzia, bo Israel in pinarentaan in Datu Yerobeam, ki adí ḷoḷaki i Yoas. Doyowa notaong kon tungkuḷ in diápa nobaḻí in ḻinug, ki Allah in noponiata kon i Amos in inta mobaḻí mita kon Israel.

MATIUS 6:17

Táe aka moiko bo mopuasa, yo pogiminyabí bo pongiamot,

RUT 3:3

Yo poinggúdon in tanaa, pomakédon in ḷana mobondu bo pogiḷambungdon in ḷambung inta totok in mopia. Bo bayádon in tampat inta poḷoḻintogan i Boas kon gandumnea. Oḷatdon kon tua modapot in sia mopaḷut mongaan bo monginum, táe ramuji bá diápa kotaauannea kon iko in kon tuadon.