SAMUEL 2 12:7 - Alkitab Singog In Mongondow Masa In Tanaa

⁷ Guman i Natan kon Daud, “Ki Tuangbí in intau tatua! Bo naadon in pinoguman i Tuhan, Allah in Israel, ‘Iko in dinuí-Kudon nobaḻí datu kon Israel bo pinosaḷamat-Ku nongkon i Saul.

SAMUEL 2 12:7 ပူးပေါင်းရင်းမြစ်များ

SAMUEL 2 14:13

Guman in bobay tatua, “Takin tosingogon i Tuangku tatua, dá ki Tuangku ain nongaku kon ki Tuangku tontaní in kotaḷádon sin diá nobogoi kon i adí ḷoḷaki i Tuangku mobui nongkon pinoḷaguiannea. Nongonu sin ki Tuangku in momiabí kon noitaḷá ná tatua kon umat i Allah?

SAMUEL 2 22:1

Naonda in ki Tuhan noposaḷamat kon i Daud nongkon i Saul bo nongkon musungnea ibanea, nopodondong in ki Daud in dondong tanaa kon i Tuhan: [

SAMUEL 2 22:49

Pinosaḷamat-Nea in akuoi nongkon musungku mita. Tuhan, pinopountung-Mu in akuoi nongkon musungku, Iḷukadan-Mu in akuoi nongkon intau mita inta moromú.

SAMUEL 2 7:8

Tuamai, Natan, potaau kon mogogundoi-Ku ki Daud, kon Akuoi, ki Tuhan Inta Totok in Mokawasa, noguman kon inia, ‘Iko in biningkat-Kudon nongkon oaidanmu moḷoḷukad kon domba kon tampatnea bo dinuí-Kudon nobaḻí datu kon umat-Ku Israel.

DATU MITA IMITÁNEA 14:7

Pobuidon bo potaaudon kon i Yerobeam kon naa in pinoguman i Tuhan, Allah in Israel, ‘Iko in piniḻí-Kudon kon sigad in rayat bo ain binaḻí-Ku pongawasa kon umat-ku Israel.

DATU MITA IMITÁNEA 18:18

“Akuoi in deemanbí mononuyayow,” tubag i Elia, “táe ki tuang datubí tontaní. Ki Tuang datubí bo motoḷuadí i Tuang datu in mononuyayow. Pinongin mosumba kon berhala mita in Baal, Ki Tuang datu in iḻimimpatdon kon parenta mita i Tuhan.

DATU MITA IMITÁNEA 20:40

Táe noiduduimai kon tua naonda in akuoi nobarong in oaidan, intau tatua in nokoḷagui.” Ki datu in notubag, “Iko in nopoḷabúdon in hukumanmu tontaní. Iko in mustibí mobaba tontaní.”

DATU MITA IMITÁNEA 20:42

Dá ki Nabi tatua in nogumandon kon i datu, “Naadon inta pinoguman i Tuhan: ‘Intau inta pinoki ḻimod-Ku aindon biniómu mako in minayá. Tuamai iko in mustibí matoi mobaḻí toḻiunea. Tontaramu in morimumudbí popisí in pinomayámudon mako in musung noḷagui.’ ”

MAZMUR 18:1

Kon i itoi in Koor. Mazmur i Daud, mogogundoi i Tuhan. Pinodondong kon i Tuhan kon tungkuḷ in ki Daud pinosaḷamat nongkon i Saul bo musungnea mita.

YEREMIA 34:6

Dá koyow i Tuhan tua in pinotaauku kon i Datu Zedekia kon Yerusalem,

DANIEL 4:22

Oo, Tuangku, ki Tuangkubí in pangkoi in kayu inta moḷantud bo moropot tatua. Koḷoḷoben i Tuangku modugang modapot in ḷangit bo kawasa i Tuangku in moiyoyanú modapot kon popod in dunia.

MATIUS 14:14

Naonda in mosia sinumubu ki Yesus nokoontong kon intau nobarong totok, dá noḻiai in gina-Nea popisí in tabi-Nea kon i monia. Bo inundaman-Nea in mosia inta notakit.

SAMUEL 1 13:13

Nokodongogmai kon natua, ki Samuel in noguman kon i Saul, “Mobodok totok in aid i Tuang tatua. Aka kuma bo ki Tuang in dinumudui kon parenta i Tuhan Allah kon i Tuang Datu, yo tantúon bidon i Tuhan kon mononoi in Tuang Datu bo buí i Tuang Datu in momarenta mobaḻí datu kon Israel naa.

SAMUEL 1 15:17

Ki Samuel in noguman, “Tantú kinotaauanbí i Tuang Datu, kon umpakabí kon raianmu tontaní ki Tuang Datu naa in mointok táe binaḻí bidon itoi kon suku mita in Israel? Bo iko nion in binarakatandon i Tuhan nobaḻí datu kon Israel,

SAMUEL 1 16:13

Baḷúdon in ki Samuel nogamá kon ḷana zaitun tatua bo noduí kon i Daud takin upacara pinopoinggúan in ḷana kon tayowon i guya-guyangnea mita. Kon dodai doman intua ki Daud kinawasaan in Roho i Tuhan. Nongkon singgai tua nodapot in singgai noiduduimai mita Roho i Tuhan koyota-yotakinnea. Onda intua nobuidon in ki Samuel kon Rama.

SAMUEL 1 18:11

“Ponakuḷku in pandong tanaa kon i Daud dapot in moidapot kon dinding!” tua in kon raian i Saul, bo pinonampoknea in pandong tatua kon i Daud kodua, táe ki Daud sinimí.

SAMUEL 1 18:21

Kainia, “Tungkuḷanku ḻibóon kon i Daud mongo moibog in sia kon i Mikhal, sinbá ki Daud moaḷapku bo koḻimodan in intau in Pilistin.” Dá kon induaneadon in ki Saul noguman kon i Daud, “Tanaa iko in motaaudon mobaḻí mototakaku.”

SAMUEL 1 23:14

Nopaḷut mako kon tua ki Daud in nogutun kon angob mita kon buḷud kon padang gurun Zip. Sia in umuran aḷo-aḷowan mako i Saul, táe diábí i Tuhan inogoi in sia kon i datu tatua.

SAMUEL 1 23:7

Naonda in pinotaau kon i Saul kon ki Daud in kon Kehila, ki Saul in norai nanaa, “Ki Daud in inogoidon i Allah kon inakó. Noituotdon in sia kon poyogaḷap sin sinumuotdon kon bonu in kotá inta dininding bo sinon ngara moḷoben.”