SAMUEL 2 1:21 - Alkitab Singog In Mongondow Masa In Tanaa

²¹ Ei buḷud mita in Gilboa, indongogaidon in baḷúku: Dika modapot in oḷú bo uyan momuntad kon inimu! Pomayádon mako moingkag bo moḷogat in gobá bo tampat popokaanmu in biag. Sin kon tuata in kinogambatan in kaḻeaw in intau mita mobarani. Bo kaḻeaw i Saul in kaḻiotáan, diádon iḻepoan bui in ḷana.

SAMUEL 2 1:21 ပူးပေါင်းရင်းမြစ်များ

TAWARIKH 1 10:1

Intau in Pilistin in noparang takin intau in Israel. Mosia in noparang kon buḷud in Gilboa. Nobarong in intau in Israel in minatoi kon tua bo ki agatnea noitakin doman in ki Datu Saul bo ki adínea mita ḷoḷaki in noḷagui.

TAWARIKH 1 10:8

Nopoikoḷomai kon singgai kon dodai in intau in Pilistin namangoi sin mogagow kon mayat mita, nouḻídon monia in ki Saul bo ki adínea ḷoḷaki taya toḷu minatoidon kon buḷud in Gilboa.

DONDONG MOḶANTUD 4:4

Sigogowmu naonda bo ḷangkeang i Daud, inta pinosindog sin potagúan kon ḷoḷutam. Boboḷmu notongkai in kaḻeaw toribu, tungkud in intau mita mongobarani.

YESAYA 21:5

Inontongku doman in pinongaanan bobutungan inta ain sinadia; ḷoḻitúan in intau mita inta sinoko oiní ain sinadia. Mosia in nongaan bo nonginum. Bo daḻídon kinodongogan in parenta: “Ei porwira mita! Sadia in kaḻeawmu!”

YESAYA 5:6

Pomayá-Kubí mako in sia in kobiagan in bonok. Pangkoi in anggurnea diábí rapadan-Ku, bo diábí tuyangan-Ku. Modapotbí in pomayá-Ku mako kokoḷoban in mainggoa bo bonok, nodapot in goḷom mita diá ogoi-Ku mopoḷabú in uyan kon tudunea.”

YEHEZKIEL 31:15

Nanaa in singog i Tuhan Inta Totok in moḷantud, “Aka pangkoi in kayu tatua moponag kon dunia in intau minatoi, potabá-Ku in tubig kon ḻimonag in butá nonagom kon inia nobaḻí tomponuot nonogumatoi. Pogogaion-Kubí in toḷog in ongkag bo modimpot kon tapá mita. Popisí in pangkoi in kayu tatua minatoidon, popoangoi-Kubí in sindip kon buḷud mita in Libanon bo poḷaḷowon in bayongan in kayu kon kayuon.

YOËL 1:9

Gandum bo anggur in diádon nongkon Baḷoi i Tuhan. Dá ponogumatoidon imang mita, inta motoḷutui in mogundoi kon i Tuhan.

YOËL 2:14

Dika-dika ki Tuhan Allahmu mobaḷui in gina, bo mobogoi in barakat mobayong totok kon i monimu. Dá moiko in motaau moposumba in kuruban anggur bo gandum kon i Tuhan Allahmu.

HAKIM MITA 5:23

“Kutukdon in Meros, bo intau inta nogutun kon tua,” guman in malaekat i Tuhan “sin mosia in diá namangoi notuḷung nobaḻí pahlawan inta nogaid kon onu in pinoki aid i Tuhan.”

SAMUEL 1 10:1

Onda intua ki Samuel nogamá kon kendi inta kon bonu in ḷana zaitun, bo ḷana zaitun tatua pinopobutak kon uḷu i Saul, bo inayokannea in ki Saul poḷat noguman, “Ki Tuhan ain nopobaḻí kon inimu datu kon Israel umat-Nea. Iko in momarentabí kon umat-Nea bo moḷukad kon i monia nongkon musung mita monia. Naa in mobaḻí tomponuot kon inimu kon ki Tuhan in nomiḻídon kon inimu mobaḻí datu kon Israel umat-Nea:

SAMUEL 1 31:1

Kon dodai intua intau in Pilistin in noparang takin intau in Israel kon buḷud in Gilboa. Nobayong in intau in Israel in minatoi kon tua, bo ibanea mako takin doman in ki Saul bo ki adínea mita ḷoḷaki in noḷagui.

SAMUEL 1 31:8

Nopoikoḷomai kon singgai naonda in intau in Pilistin mamangoi sin mogamá kon barang mita kon intau mita inta ain minatoi, nouḻímai monia yo ki Saul bo ki adínea toḷu in minatoidon kon buḷud in Gilboa.