SAMUEL 1 8:11 - Alkitab Singog In Mongondow Masa In Tanaa

¹¹ “Nanaa in bain popoaid i datumu kon i monimu,” natuata in pinogoginsilang i Samuel. “Pakisaanneadon in ki adímu mita tumuot in tontara; tongosilai nongkon i monia mobaḻí tontara inta tumakoi kon kereta, tongosilai doman in kon kabaḷo, bo ibanea mako in tontara inta maya-mayá in sioḷ.

SAMUEL 1 8:11 ပူးပေါင်းရင်းမြစ်များ

SAMUEL 2 15:1

Nopaḷut mako kon tua ki Absalom nosadiadon kon kereta in parangnea tobatú bo kabaḷo takin intaunea ḻima nopuḷú

DATU MITA IMITÁNEA 1:5

Popisí in ki Absalom ain minatoi, dá ki Adonia, adí ḷoḷaki i Daud nogindua in nobaḻí adí guya-guyang. Ki inánea in ki Hagit. Ki Adonia naa in ḷoḷaki inta moḷunat. Diábí dodai onda in torúan i amánea in sia aka momia kon inta moitaḷá. Ki Adonia in moibogbí totok in mobaḻí datu, dá nosadiadon in sia kon tongonumai in kereta in parang bo tontara mita inta tumotakoi kon kabaḷo takin moḷoḷukadnea ḻima nopuḷú.

DATU MITA IMITÁNEA 10:26

Ki Salomo in nogoiní kon intau mita binaḻí tontara in parang inta ná tanaa: 1.400 in kereta in parang bo 12.000 in tontara tumotakoi kon kabaḷo. Ibanea in pinobayánea kon Yerusalem bo ibanea doman in kon bayongan in kotá ibanea.

DATU MITA IMITÁNEA 12:10

Mosia in notubag, “Nanaa in singogon i tuang datu kon i monia, ‘Naondaka i koyangkóku, táe akuoibí in moropo-ropot in ki amáku!’

DATU MITA IMITÁNEA 12:4

“Ki amá i tuang datu in nobogoidon in oaidan inta mobogat kon inami. Tanaa aka ki Tuang moibog monggaat kon oaidan nami bo monggaat doman kon roriga nami, dá kami in mobantungbí kon i tuang datu.”

DATU MITA IMITÁNEA 14:27

Dá nobaḻí toḻiunea ki Datu Rehabeam nomia kon kaḻeaw mita bitú bo inogoi kon porwira mita inta noḷukad kon bonawang in komaḻig in datu.

DATU MITA IMITÁNEA 18:46

Kon dodai intua ki Elia nokouḻí kon ropot nongkon i Tuhan. Nongopí in sia kon jubahnea pinodamonik bo pinopotogotnea kon ogotannea bodongka noribatuk inumuna kon i Ahab kinoouput in daḷan nodapot kon bonawang in kotá Yizreel.

SAMUEL 1 10:25

Noiduduimai kon tua ki Samuel noginsilang kon bangusa tatua soaḷ hak bo kowajiban in datu, bo pinaisnea kon bonu in buk inta sinagúnea kon tampat inta motusi. Nopaḷut mako kon tua ki Samuel nopotabá kon bayongan in bangusa tatua nobui kon baḷoinea-baḷoinea.

SAMUEL 1 14:52

Kon bonu in kinobiagannea ki Saul tantú moparang totok moḷawang kon intau in Pilistin. Tuamai, aka mokoontong in ki Saul kon intau moropot bo mobarani, yo baḷunea baḻíon tontaranea.

SAMUEL 1 22:7

noguman in sia kon porwiranea mita tatua, “Indongogaidon, ei intau mita in Benyamin! Eta degá ki Daud tua in mobogoi in gobá in tudunea bo gobá in anggur kon inimu? Eta degá moiko komintan in baḻíonnea doman porwira mita in tontaranea?

SAMUEL 1 8:9

Tuamai in duduiaidon onu inta pinoigum monia; táe ogoiaidon in mosia in tompoingat totu-totuu, bo potaau kon i monia naonda in popoaid i datu kon i monia.”