SAMUEL 1 30:23 - Alkitab Singog In Mongondow Masa In Tanaa

²³ Táe ki Daud in notubag, “Utatku mita, dikabí pomiaan monimu natua in onu inta ain inogoi i Tuhan kon inaton! Diábí degá kinotaauan monimu kon kita in iḷukadan-Nea bo pinopountung-Neadon nongkon banselang mogogagow tatua?

SAMUEL 1 30:23 ပူးပေါင်းရင်းမြစ်များ

KINOBAḺIAN 19:7

Ki Lot in noguman kon intau mita in Sodom tatua, “Utat mita, poigumonku totok kon i monimu, donaaidon momia kon inta moraat ná tatua!

HABAKUK 1:16

Onda intua ḷaḷa tatua in sinumba monia bo inogoian monia in sosumba kuruban, sin pinongin ḷaḷa tatua mosia in nokouḻídon kon rijiki nobayong totok bo nobaḻídon notomomon.

OUMAN IN RASUL MITA 22:1

“Amáku mita bo bayongan in ginaḷumku! Indongogaipa in singogku tanaa kon i monimu. Sinbá diá moyotaḷá in kita komintan!”

OUMAN IN RASUL MITA 7:2

Dá ki Stepanus in nosingog, “Guyanga mita bo utat! Indongogaipa in singogku naa: Wakutu in mogoguyang naton ki Abraham diápa nomamping kon Haran, wakutu intua sia in nogutunpa kon Mesopotamia, bo ki Allah inta totok in moḷantud in namangoi kon inia

ULANGAN 8:10

Moiko in kinooibogbí in mongaan, bo mopoyaput in sukur kon i Tuhan Allahmu sin butá mopia inta inogoi-Nea kon inimu.”

ULANGAN 8:17

Dá, dika mokoimontanmai in morai kon moikobí in noramuji takin ropotmu tontaní nodapot in moiko nobaḻí nobiag nooyúon.

ULANGAN 8:18

Torop kon ki Tuhan Allahmubí in nobogoi in kaoyúonan tatua kon inimu. Tua inaidan-Nea sin umaai in singgai naa Sia umuranpabí mosatia kon dodandian inta pinomia-Nea takin mogoguyangmu.

HAKIM MITA 19:23

Guranga tatua iḻumuai bo noguman kon i monia, “Dika, uḻe utat mita! Poigumonku, dika momia kon inta moraat bo inta diá patus ná tua, sin sia tua in mokokiangoiku.

SAMUEL 1 2:7

Oyúon in intau in binaḻí-Nea nobiag nobogá, oyúon doman in binaḻí-Nea nobiag nooyúon. Oyúon in intau inta pinopoompá-Nea, oyúon doman in intau inta pinoḷantud-Nea.

SAMUEL 1 30:22

Táe kon sigad in intau mita i Daud inta noyotakinnea, oyúon in moraat bo motamaa. Mosia in noguman, “Intau mita tanaa in diá dinumudui; dá mosia in diábí motaau in silaian in barang mita inta inagow tatua. Mosia in tongábí motaau mogamá kon i buḷoi bo adí monia, bo mayá.”

SAMUEL 1 30:24

Dá dikabí tobatúmai in intau in moibog kon onu in pinoigum tatua! Komintanbí mokouḻí kon tonsilai inta motongkai in kobayongnea: intau inta diá minayá sin noḷukad kon pakakat mita in mustibí doman mokouḻí kon tonsilai motongkai i monia inta minayá noparang.”

SAMUEL 1 30:8

Onda intua noḻibódon in ki Daud kon i Tuhan, “Musti degá batukonku in banselang mononubu tatua? Mokobatuk degá in akuoi kon i monia?” Ki Tuhan notubag, “Oo, batukdon; kobatukanmubí in mosia bo poḷuatonmu in intau mita inta sinoko domok tua.”