SAMUEL 1 3:19 - Alkitab Singog In Mongondow Masa In Tanaa

¹⁹ Ki Samuel nodugangdon nointoi. Ki Tuhan umuran koyota-yotakinnea bo noponiatadon kon bayongan in onu inta siningog i Samuel.

SAMUEL 1 3:19 ပူးပေါင်းရင်းမြစ်များ

KINOBAḺIAN 21:22

Kon dodai intua ki Datu Abimelek bo ki Pikhol, panglima in tontaranea, namangoi kon i Abraham bo noguman, “Ki Allah ain notuḷung kon inimu kon bayongan in yagi-yagi inta inaidanmu.

KINOBAḺIAN 28:15

Toropdon, Akuoi in motuḷung bo mogoḻiung kon inimu, kon ondaka in bayáanmu, bo Akuoi in modia kon inimu mobui mangoi kon butámu tanaa. Akuoi in diábí monaḷámai kon inimu modapot in aidan-Kudon bayongan inta ain pinodandi-Ku kon inimu.”

KINOBAḺIAN 39:2

Ki Tuhan notuḷung kon i Yusup dapot in sia umuran mokodungkuḷ kon inta mopia onukabí in aidannea. Sia in nogutun kon baḷoi i tuangnea, intau in Mesir tatua.

KINOBAḺIAN 39:3

Inontong i Tuangnea kon ki Tuhan notuḷung kon i Yusup dá tuamai ki Yusup umuran mokodungkuḷ kon inta mopira onukabí in aidannea.

DATU MITA IMITÁNEA 8:56

“Dinayo-dayowdon in ki Tuhan inta ain nobogoi in kobiagan notompia kon umat-Nea ná inta pinodandi-Nea pinongin i Musa mogogundoi-Nea. Bayongan inta mopia inta pinodandi-Nea ain inintompodan-Nea.

DATU MITA 2 10:10

Naadon in buktinea kon bayongan inta siningog i Tuhan soaḷ adí bo ompu i Ahab in mobaḻíbí. Ki Tuhan in nogaidon kon bayongan inta pinoguman-Nea pinongin i Elia mogogundoi-Nea.”

DATU MITA 2 22:16

in tosingogon i Tuhan tanaa: “Akuoi in mohukumbí kon Yerusalem bo bayongan in intau inta nogutun kon tua ná inta pinais kon bonu in buk inta bagu binaca i datu.

YESAYA 43:2

Aka iko ḷumoḷan kon tubig yo takinan-Ku in iko, iko in diábí moḷomot kon bonu in rorigamu mita. Aka mongin tuḷú, diábí in iko mopokak, totungkuḷ mita inta mobogat in diábí mokobodito kon inimu.

YESAYA 44:26

Akuoibí in noginrigon kon tosingogon in mogogundoi-Ku, bo nopobayá in tomayá inta pinoniata in totabá-Ku, Akuoi in noguman kon Yerusalem in pogutunanbí bui, bo kotá mita in Yohuda in posindogon-Kubí bui; rumbunnea mita in buibí tompiaan.

YESAYA 55:11

natua doman in tosingogon inta siningog-Ku diábí mobui kon i-Nakó takin diá in mangaḻenea, táe mokoaid kon onu inta kinoibog-Ku, bo mokodapot kon bayongan inta imakusud-Ku.

MATIUS 1:23

“Tobatú mongodeaga in modia kon sian bo mopononggadí kon tobatú adí ḷoḷaki bo adí tatua tangoian monia ki ‘Imanuel’, inta mangaḻenea: Ki Allah kotaki-takin naton.”

LUKAS 1:28

Malaekat tatua sinumuot kon baḷoi i Maria bo poḷat noguman nanaa, “Salam kon inimu inta binarakatan, ki Tuhan in koyota-yotakinmu.”

LUKAS 1:80

Ki adí i Zakharia tatua kodugang-kodugangdon in koḷobennea bo rohonea in koropot-koropot domandon. Bo sia in umuran nogutun kon padang gurun nodapot in singgai inta aindon sinantú kon pokipogontongannea kon intau in Israel.

LUKAS 2:40

Adí tatua nodugangdon in koḷoben bo koropot-Nea. Sia mobijaksana totok bo totok doman kinotabi i Allah.

LUKAS 2:52

Kodugang-kodugangdon in koḷoben bo kopandoi i Yesus, bo Sia in umuran kinotabi i Allah bo kinoibog in bayongan intau.

KORINTUS 2 13:11

Naa in tongginaku pangabisan kon i monimu utatku mita, mokoposanangdon kon gina bo poramujidon sinbá umuran mobiag mosompurna. Umuran kon gina-gina mako in tongginaku mita naa. Umuran motobatú kon gina bo kon raian bo umuran mototabian. Sin ki Allah inta nobaḻí dodoyonan totabi bo kobiagan inta mopia, umuran kotaki-takin monimu.

ULANGAN 18:22

Aka nabi tobatú mosingog podoyon kon tangoi i Tuhan, táe onu in siningognea tua diá noniata, dá tosingogonnea tatua in deemanbí nongkon i Tuhan. Nabi tatua in mosingogbí pinodoyon kon tangoinea tontaní bo dikabí in moiko moondok kon inia.”

TIMOTIUS 2 4:22

Poigumon mako ki Allah in umuran moyotakinmu bo umuran doman mobogoi in barakat kon i monimu komintan! Horomat nami, Ki Paulus

YOSUA 21:45

Ki Tuhan noponotuu kon bayongan onu inta pinodandi-Nea kon umat in Israel; diábí tobatúmai in diá inintompodan-Nea.

HAKIM MITA 13:24

Tongonumai nobuḷan noiduduimai ki buḷoi Manoah tatua nopononggadídon in adí ḷoḷaki bo sinangoiannea ki Simson in adí tatua. Adí tatua noitoidon bo binarakatan i Tuhan;

SAMUEL 1 10:7

Aka bayongan tua mobaḻí, yo aidaidon in onu inta inanggapmu mopia, sin ki Allah in kotaki-takinmu.

SAMUEL 1 12:2

Nongkon tanaadon mako siadon in mobaḻí itoi monimu. Indoiaidon, akuoi naa in nogoguyangdon bo inubanandon. Noonggotdon totok in akuoi in nobaḻí itoi monimu – pinangkoipa kon akuoi nobagupa nodapot in tanaa mako. Nobaḻí bukti kon tua in ki adíku mita in komintandon nongoḷantud.

SAMUEL 1 16:18

Nokodongogmai kon natua bobantungnea tobatú noguman, “Ki Isai intau inta nogutun kon kotá in Betlehem kogadí kon ḷoḷaki tobatú inta mopia mopogogitog in musik. Sia tua in intau inta mobarani bo tontara inta mopia. Apa doman sia tua intau inta motorindog bo motoḻindat mosingog, bo ki Tuhan in umuran motuḷung kon inia.”

SAMUEL 1 18:12

Kinomangaḻeandon i Saul kon iḷukadandon i Tuhan in ki Daud táe sia in sinaḷáandon i Tuhan. Tuamai inagíandon in ondok in sia kon i Daud.

SAMUEL 1 18:14

Umuran in sia mokoḷapat kon bayongan in oaidannea, sin ki Tuhan in notuḷung kon inia.

SAMUEL 1 18:5

Mopia komintan in pinogogai i Daud kon bayongan inta pinoki aid i Saul kon inia. Tuamai in binaḻí i Saul in sia porwira kon bonu in tontaranea, bo ki Daud in kinoibog in bayongan tontara bo bobantung mita i Saul.

SAMUEL 1 2:21

Ki Hana in binarakatan i Allah, dá buipa nopononggadípa in sia in adí ḷoḷaki toḷu bo adí bobay doyowa. Ki Samuel in koitoi-koitoidon kon wakutu in sia mogundoimai kon i Allah.

SAMUEL 1 2:26

Tongá ki Samuel, adí tatua, in koḷantud-koḷantudon bo kinoibogdon totok i Tuhan bo in bayongan intau.

SAMUEL 1 9:6

Bobantung tatua notubag, “Oḷatpa muna! Kon kotá tanaa oyúon in mogogundoi i Allah. Totok in sia ihoromat in intau sin onu in singogonnea in totu-totuubí kon mobaḻí. Igai in kita mayá kon inia, dika-dika bo motaaubí ḻibóon kon inia mongo kon onda in keledai mita tatua.”