SAMUEL 1 2:22 - Alkitab Singog In Mongondow Masa In Tanaa

²² Ki Eli in nogoguyangdon totok. Umuran in sia mokodongog kon guman in intau soaḷ oaid i adínea mita kon intau in Israel. Kinotaauan domandon i Eli kon ki adínea mita tatua in nosiug domandon takin bobay mita inta nogaid kon tayowon ngara in Ḷoḷaigan Koangoian i Tuhan.

SAMUEL 1 2:22 ပူးပေါင်းရင်းမြစ်များ

KINOBAḺIAN 35:22

Kon tungkuḷ in mosia kon tampatpa tatua ki Ruben nosiugdon noyotakin i Bilha, ki buḷoi amánea inta bobantung tatua. Soaḷ tatua kinodongogan i Yakub, bo sia in totok sinumorú. Ki Yakub kogadí kon ḷoḷaki mopuḷú bodoyowá.

KINOBAḺIAN 37:2

bo naadon riwayat motoḷuadí i Yakub: Kon tungkuḷ in ki Yusup, ki adí i Yakub umur mopuḷú bo pitu notaong, sia in moḷukadmai kon paanan in bembé domba moyotakin i guya-guyangnea mita, inta ki adí mita i Bilha bo i Zilpa, ki buḷoi amánea inta bobantung. Sia in nopotaau kon oaid mita diá mopia i guya-guyangnea kon inia.

IḶUAIAN 38:8

Ki Bezaleel nomia kon tampat in tubig nongkon porunggu inaipan in porunggu doman. Porunggu tatua nongkon posilag mita kapunyaan in bobay mita inta mogogundoi kon tayowon ḷoḻingkop in Ḷoḷaigan i Tuhan.

YEHEZKIEL 22:26

Imang mita in Israel iḻimimpat kon hukum-Ku mita bo nokokotor kon pakakat mita inta ain sinantú-Ku kon i-Nakó. Diá bidon pinoyoposi monia onda in motaau bo onda in diá motaau. Mosia in diá doman notundú kon rayat mopoyoposi kon onu in modarit bo onda in nonajis podudui in atorang in agama. Mosia in diá bidon mopandungmai kon singgai in Sabat. Aid monia natua in pinoningkuḻebí in bangusa Israel kon i-Nakó.

SAMUEL 1 2:23

Tuamai in noguman in sia kon i adínea mita, kainia, “Akuoi nokouḻídon kon guman in bayongan umat soaḷ dodia monimu inta moraat. Nongonu sin inaidanbí monimu intua?

SAMUEL 1 3:13

Aindon pinotaau-Ku kon inia kon motoḷuadínea in umuran hukumon-Ku popisí in ki adínea mita ain nokopoonagmai kon i-Nakó. Kinotaauanbí i Eli in dosa mita monia tua, táe diábí sinorúannea.

SAMUEL 1 8:1

Naonda in ki Samuel nogoguyangdon, binaḻíneadon in ki adínea hakim kon Israel.