SAMUEL 1 14:41 - Alkitab Singog In Mongondow Masa In Tanaa

⁴¹ Onda intua nosambayangdon in ki Saul, “Tuhan, Allah in Israel, nongonu sin singgai in naa in diábí sinubagan-Mu in akuoi? Tuhan, tubagaipa in akuoi pongin batu mita inta motusi naa. Aka taḷá tatua bo noiḻitú kon inakó andeka kon i Yonatan, tubagaidon pongin batu Urim, táe aka taḷá tatua bo noiḻitú kon umat-Mu Israel, tubagaidon pongin batu Tumim.” Dá tubag i Tuhan noitundú kon i Yonatan bo kon i Saul; dá rayat pinoniatadon kon diá kotaḷá.

SAMUEL 1 14:41 ပူးပေါင်းရင်းမြစ်များ

AMSAL 16:33

Popisí in monotaau kon ukur, intau mopogonik in undi, táe inta motubag in tongábí ki Tuhan tontaní.

AMSAL 18:18

Pongin undian, ropatoi motaau tompiaan bui, nodapot in bobayowan kon sigad in intau nongawasa in motaaubí doman paḷuton.

YUNUS 1:7

Naonda in ki Yunus bo mododia kon kapaḷ tatua nopoonik, intau mita in kapaḷ tatua in nosigumanan, “Igai bá mopogonik in undi in kita sinbá kotaauan naton mongo ki ine in kotaḷá nodapot in kinoantugan in bodito tanaa!” Mosia in nopogonik in undi, bo tangoi i Yunus in kinotugatan.

OUMAN IN RASUL MITA 1:24

Mosia komintan nosambayang nanaa, “Tuhan, Ikobí inta nonotaau kon bonu in gina in bayongan intau, tundúdon mongo ki ine in koibog-Mu kon sigad inayadua naa, inta motarima kon oaidan inta pinoki aid-Mu táe inta ain sinaḷáanmai i Yudas inta ain notarima kon hukuman pinodudui in oaidnea.”

OUMAN IN RASUL MITA 1:26

Onda intua mosia nopogonik in undi, bo ki Matias in kinopiḻían. Dá sia in binaḻí rasul pinodugang kon rasul inta mopuḷú bo mita tua.

SAMUEL 1 14:40

Bo nogumandon in ki Saul kon bayongan rayat in Israel, “Moiko komintan sindog kon dotá in naa.” Tubag monia, “Pomiadon Tuang Datu in onu inta inanggapmu mopia.”

SAMUEL 1 14:42

Bo ki Saul nosingogdon, “Oo Tuhan, tantúdon kon sigad naminda i Yonatan.” Dá ki Yonatandon in pinoniata kon kotaḷá.