SAMUEL 1 13:14 - Alkitab Singog In Mongondow Masa In Tanaa

¹⁴ Táe tanaa kawasa i Tuang Datu saḷaku pomarenta in diá bidon mononoi. Popisí in ki Tuang Datu in diá dinumudui kon parenta i Tuhan, dá ki Tuhan in nomiḻídon kon intau ibanea inta kinoibog-Nea sin duíon mobaḻí datu kon umat-Nea.”

SAMUEL 1 13:14 ပူးပေါင်းရင်းမြစ်များ

SAMUEL 2 5:2

Nongkon koḻipod, sedang bo kon tungkuḷpabí in ki Saul nomarentapa kon inami, ki Tuang doman inta nodia kon tontara in Israel pomuḷoi in mayá moparang, apa doman ki Tuhan ain nodandi kon i Tuang kon ki Tuangbí in mobaḻí itoi in umat-Nea bo mobaḻí datu monia.”

SAMUEL 2 6:21

Ki Daud in notubag, “Akuoi naa in notayok sin mohoromatbí kon i Tuhan, inta ain nondoí kon i amámu bo kon motoḷuadínea, bo nomiḻí kon inakó nobaḻí itoi in Israel, umat-Nea. Tuamai umuranbí in akuoi motayok sin mohoromat kon i Tuhan.

DATU MITA 2 20:5

buipa bayá kon i Hizkia, datu in umat i Tuhan, bo potaau in koyow tanaa, “Akuoi, ki Tuhan, Allah inta sinumba i Daud mogoguyangmu, ain nokodongog kon sambayangmu bo nokoontongdon kon ḷuámu. Undaman-Kudon in iko; toumá in iko in mayádon kon Baḷoi-Ku.

TAWARIKH 1 10:13

Ki Saul in minatoi popisí in diá in sia mosatia kon i Tuhan, bo diá doman dinumudui kon parenta-Nea mita. Diábí in sia nopoigum in topotundú mita nongkon i Tuhan, táe nopoigumbí kon dimukud mita in intau mita inta ain minatoi. Tuamai in ki Tuhan nohukum kon inia bo noposarakan in tampat pomomarentaannea kon i Daud adí i Isai.

MAZMUR 78:70

Sia in nomiḻí kon i Daud mogogundoi-Nea bo nogamá kon inia nongkon yua-yuak in bobiagon,

AMSAL 27:24

sin kaoyúonan in diábí mononoi, nodapot in kawasa momarenta in diábí doman mononoi.

YESAYA 39:5

Bo ki Yesaya in noguman kon i datu, “Ki Tuhan Inta Totok in mokawasa, noguman,

OUMAN IN RASUL MITA 13:22

Naonda in kinodoídon i Allah in sia, ki Allah nomiḻídon kon i Daud nobaḻí datu monia. Bo tanaa inta pinoguman i Allah soaḷ ki Daud, ‘Nouḻí-Kudon in ki Daud inta ki adí i Isai tobatú intau inta totok in mokosanang kon gina-Ku. Sia tua inta motoindudui kon onu in kinoibog-Ku.’

OUMAN IN RASUL MITA 7:46

Ki Daud in totok kinosanang in gina i Allah nodapot nopoigum in sia sinbá ogoi-Nea moposindog in Baḷoi-Nea. Baḷoi i Allah inta sinumba i Yakub tatua.

IBRANI 2:10

Totuu kon patus bidon in ki Allah inta nomia kon bayongan in yagi-yagi mopobayá in onu inta imakusud-Nea tontaní. Binaḻí-Nea in ki Yesus mopoposaḷamat inta nosompurna pinodoyon kon daḷan inta totok in moyoyiga. Tua in daya i Allah sinbá mobayong intau in motaau oiníon-Nea mayá in tampat inta mopia totok takin i Yesus. Sin Siabí in nobuká kon daḷan kon i monia sinbá mosia in motaau posaḷamaton.

SAMUEL 1 15:23

Sin moḷawang kon parenta i Tuhan notongkaibí in mosihir in koraatnea, bo gina inta mododia notongkaibí in koraatnea ná nosumba kon ilah ibanea, Popisí in ki Tuang Datu ain noḷawang kon parenta i Tuhan, dá diádon akúon i Tuhan kon ki Tuang in datu.”

SAMUEL 1 15:26

Táe ki Samuel in notubag, “Akuoi in doí bidon mobui mangoi moyotakin i Tuang Datu. Ki Tuang ain noḷawang kon parenta i Tuhan, bo tanaa mako in diá bidon akúon-Nea in ki Tuang saḷaku datu in Israel.”

SAMUEL 1 15:28

Bo noguman in ki Samuel kon inia, “Kon singgai in naa ki Tuhan ain nomerak kon dodatuan in Israel nongkon i Tuang, bo nobogoi kon intau ibanea inta mopia-pia nongkon i Tuang.

SAMUEL 1 16:1

Diá noonggot kon tua ki Tuhan noguman kon i Samuel, “Dapotpa in toonu iko umuran mokuyang in gina tongá popisí in ki Saul? Sia tua in diá bidon ináku-Ku datu in Israel! Tanaa in pogamádon kon ḷana in zaitun bo bayádon kon Betlehem, kon intau inta ki Isai in tangoinea, sin ki adínea tobatú ain piniḻí-Ku nobaḻí datu.”

SAMUEL 1 16:12

Dá pinoki oinídon i Isai in ki adínea tatua. Noniata magí yo sia tua in tayowmobiagbí inta moḷunat bo mosehat, bo matanea in totuu mogaga. Bo ki Tuhan in noguman kon i Samuel, “Naadon in sia; duídon in sia!”

SAMUEL 1 2:30

Akuoi, ki Tuhan Allah in Israel, koḻipod ain nodandi, kon motoḷuadímu bo bui inanakanmu in mogundoi kon i-Nakó mobaḻí imang mononoi. Táe tanaa in kinodoí-Kudon intua! Sin ki inta mohoromat kon i-Nakó in horomaton-Kubí táe inta mopoonagmai kon i-Nakó, in pokoonag-Kubí doman.

SAMUEL 1 24:20

Moḷawábí totok in intau tobatú in moyodungkuḷ in musungnea táe tongá pobiónea mako in musungnea tatua in mobiag! Dá, igumon mako ki Tuhan in momarakat kon inimu sin aidmu inta mopia kon inakó singgai in naa!

SAMUEL 1 25:30

Ki Tuhan in mopoaidbí in bayongan in kopiaan inta pinodandi-Nea kon i Tuangku, bo diádon moonggot in ki Tuangku baḻíon-Nea datu kon Israel.

SAMUEL 1 9:16

“Ikoḷom doḷo-doḷom degá orasmai nanaa, Akuoi in mopotabádon mangoi kon intau tobatú nongkon suku Benyamin mamangoi kon inimu. Duídon in sia takin upacara popotoguḷuan in ḷana sin baḻíon datu kon umat-Ku Israel. Sia in moposaḷamat kon umat-Ku nongkon intau in Pilistin. Akuoi in nokoontongdon kon roriga in umat-Ku bo nokodongogdon kon ombaḷ monia mokituḷung.”