SAMUEL 1 12:3 - Alkitab Singog In Mongondow Masa In Tanaa

³ Tanaa in akuoi sinimindogdon kon tayowon monimu! Aka akuoi in nogaidon kon taḷá, yo potaaudon kon tayowon i Tuhan bo kon tayowon i datu inta piniḻí-Nea. Degá nokoimontandon in akuoi nogamá kon sapi andeka keledai in intau ibanea? Degá nokoimontandon in akuoi nonguboḷ andeka noposikisa andeka notarima kon doit poguboḻi kon taḷá? Pogumandon, sinbá onukabí inta ain ginamáku yo pobuionkudon bui.”

SAMUEL 1 12:3 ပူးပေါင်းရင်းမြစ်များ

SAMUEL 2 22:22

Akuoi in dinumudui kon parenta i Tuhan, bo diá nomaḷong nongkon i Allahku.

NEHEMIA 5:11

Dá moiko in mustibí doman momopat kon boḻi mita in rayat kon inimu tua, pinomayá doit andeka gandum, andeka anggur andeka ḷana in zaitun. Ḷagidon pobui in gobá monia tudunea, gobá in anggur, gobá in zaitun bo baḷoi monia!”

MAZMUR 15:5

bo mopoḷuan in doit bo diá moigum kon rente; inta doí motarima kon doit pomompon kon bibig sin moporugi kon intau inta diá kotaḷá. Intau inta mogaid kon natua, umuranbí mobiag moodom.

IḶUAIAN 20:17

Dika moibog in sinitogi in intau ibanea: baḷoinea, ki buḷoinea bobay, atanea mita, bobiagonnea, keledainea, ande onuka inta nobaḻí sinitoginea.”

IḶUAIAN 23:8

Dika motarima kon doit inta poguboḻi monia sinbá mountung in sia kon pelekara, sin doit tatua in mokopopisí kon mata intau mosindipdon moindoi kon onu in totuu bo mokorugidon kon intau mita inta diá kotaḷá.

AMSAL 15:27

Ki ine in motayak kon kauntungan pongin mosindip, in morimumudbí kon motoḷuadínea tontaní. Ki ine in doí motarima kon doit pinosogó, mobiag mosanang.

IMAMAT 6:4

Intau inta kotaḷá tatua in musti moguboḻi bui kon bayongan inta ain nouḻínea takin oaid diá mojujur. Kon dodai in sia kinotaauandon kon ain nogaid kon inta noitaḷá, dá sia in mustibí moguboḻi kon tua mita kon i toginea, bo dugangan in doyowa nopuḷú noporsen.

PINOGIAPAN 16:15

Ki Musa sinumorú totok bo noguman kon i Tuhan, “Tuhan, dika motarima kon sosumba monia. Diábí dodai in onda in akuoi nokoporugimai kon tobatúmai intau kon sigad monia; nodapot in diábí doman dodai in onda akuoi nogamá kon tongáka keledai tobatú nongkon i monia.”

MATIUS 22:21

Mosia notubag, “Gambar bo pais i Kaisar.” Dá ki Yesus in noguman kon i monia, “Ogoidon kon i Kaisar onu inta musti ogoi monimu kon i Kaisar, bo ogoi kon i Allah inta musti ogoi monimu kon i Allah.”

LUKAS 19:8

Kon baḷoinea tatua, ki Zakheus sinimindog bo noguman kon i Tuhan, “Tuhan, kapunyaanku tobotak ogoikudon kon intau mita bogá bo aka oyúon doman in intau inta pernadon inuboḷanku, yo pobuionkudon bui kon inia koopat noguntuḷ in kobayongnea!”

OUMAN IN RASUL MITA 20:33

Diápabí kon dodai onda akuoi nohaga in doit andeka pakeang nongkon intau ibanea.

KORINTUS 2 12:14

Kotoḷudon naa akuoi in nonomayá mokipodungkuḷ kon i monimu. Bo akuoi in doíbí mokiposusamai kon i monimu, sin deemanbí kapunyaan monimu in tayakonku, táe moikobí. Sin deemanbí mongoadí in musti motayak kon kaanon in guyanganea, táe guyangabí in musti motayak kon kaanon i adínea mita.

ULANGAN 16:19

Kon bonu in mogamá kon kaputusan, mosia in diábí motaau kinotantu-tantúnea ande mobogat kon toḷosi. Mosia in diábí doman motaau motarima kon doit tondan in pelekara, sin tondan in pelekara tua in mokobilog kon intau, nodapot in intau mobijaksana bo mojujur, dá mogamádon kon kaputusan inta diá moadil.

TESALONIKA 1 2:10

Motusi in kobobiag nami, mobanar bo diá in yagi-yagi inta diá mopia in inaidan nami kon i monimu inta ain nopirisaya kon i Kristus. Inontong bidon monimu tontaní in kami bodongka bidon ki Allah in nonotaau kon tua komintan.

TESALONIKA 1 2:5

Kinotaauan bidon monimu kon diábí dodai onda in kami tongá mopia kon ouman andeka monombodok kon i monimu, sin mobuni kon makusud inta tongá motayak kon kauntungan tontaní. Ki Allahbí in nonotaau kon tua komintan!

PETRUS 1 5:2

ḷukadaibí monimu kopiaraan in domba i Allah inta ain pinosarakan kon i monimu. Ḷukadai takin sanang in gina ná inta kinoibog i Allah, dikabí tongá pakisa in gina. Bo dika doman mogaid kon oaidan tatua tongá sakadar motayak kon kauntungan tontaní, táe aidaibí intua sin lantaranbí moiko totu-totuubí moibog mopobayá in oaidan i Allah.

SAMUEL 1 10:1

Onda intua ki Samuel nogamá kon kendi inta kon bonu in ḷana zaitun, bo ḷana zaitun tatua pinopobutak kon uḷu i Saul, bo inayokannea in ki Saul poḷat noguman, “Ki Tuhan ain nopobaḻí kon inimu datu kon Israel umat-Nea. Iko in momarentabí kon umat-Nea bo moḷukad kon i monia nongkon musung mita monia. Naa in mobaḻí tomponuot kon inimu kon ki Tuhan in nomiḻídon kon inimu mobaḻí datu kon Israel umat-Nea:

SAMUEL 1 12:4

Intau mita tatua notubag, “Diá, diábí kon dodai in onda ki Amá nonguboḷ andeka noposikisa kon inami; diábí nokoimontanmai in ki Amá in nogamá kon kapunyaan i ineka.”

SAMUEL 1 12:5

Bo nogumandon in ki Samuel, “Kon singgai in naa ki Tuhan bo datu inta piniḻí-Nea in nobaḻí sakusi kon akuoi in noniatadon kon diábí kotaḷá topiḻikmai.” “Oo totuu, ki Tuhan in nobaḻí sakusi naton,” tubag monia.

SAMUEL 1 2:35

Onda intua Akuoi in momiḻídon kon imang inta mosatia kon i-Nakó bo mogaid kon onu inta pinoki aid-Ku kon inia. Kon inia tua in ogoian-Ku in buí inta umuran mopobayá in oaidan imang kon tayowon in datu mita inta piniḻí-Ku.

SAMUEL 1 24:11

Tanaa in kinorasaandon tontaní i Tuang Datu kon koina kon bonu in angob, pinosarakandon i Tuhan in ki Tuang kon inakó. Akuoi naa in dinondouḷugandon in intau tobatú kon moḻimod kon i Tuang Datu, táe doí in akuoi. Akuoi in notubag kon akuoi in doíbí mopororigamai kon datu inta ain piniḻí i Tuhan.

SAMUEL 1 24:6

Táe nopaḷut mako, ki Daud nokorasa noitaḷádon sin ain nomia kon tua.

SAMUEL 1 24:7

Noguman in sia kon intaunea, “Poigumon mako ki Tuhan in moḷukad sinbá diá in akuoi modapot in momia kon moraat kon i datuku inta ain piniḻí i Tuhan. Topiḻikmai diábí motaau in akuoi mopororiga kon inia, sin sia in datu inta piniḻí i Tuhan!”

SAMUEL 1 26:11

Poigumon mako ki Tuhan mongampag kon inakó in moḻimod kon datu inta ain piniḻí-Nea! Gamádon mako in pandongnea bo tampat in tubignea, bo mayádon in kita!”

SAMUEL 1 26:9

Táe ki Daud in noguman, “Dikabí onuonmu in sia! Sinantú bidon i Tuhan kon hukumon-Neabí in intau inta mogaid kon moraat kon datu inta ain piniḻí-Nea.